Demir Krasniqi: Gëzimet e fëmijërisë sime

GËZIMET E FËMIJËRISË SIME

 

N’ vitet e pleqërisë –

Kujtoj fëmijërinë ,

Vuajtjet e  vegjëlisë ,

Skamjet, varfërinë !...

 

Kohën kur çdo gjë

E kishim lakmi,

Kohën kur nuk kishim

As bukë për t’u ngi !

 

E kujtoj me ëndje

Ditën  e Shën Gjergjit –

Kur i  vinte radha

Qumështit dhe përsheshit !

 

Sa  gëzim kur vinte

Ndonjë Natë e Madhe –

Nëna kur na e ziente

Me sheqer ndo ‘i  hallve !

 

Vetëm për Bajrame ,

Nga  dy herë në vite –

Pritnim me shumë ëndje

Për t’ kërkuar  pite !

 

Festën e Bajramit ,

Pritnim me hare –

Ndoshta na blenë babi ,

Ndonjë këmishë të re !

 

Të zbathur , të zdeshur ,

Gjatë stinëve t’ motmotit –

Në veshje të leshta ,

Apo prej konopit !...

 

Deri kur erdh  mbrëmja

E semimaturës –

Ne kishim të mbathura

Opinga të lëkurës !

 

Edhe pse të rënda

Janë këto përjetime –

Janë gëzimet më t’ ëmbla

Të  fëmijërisë sime !

Për varfëri nuk dinim ,

Vuajtjet , as sehiret !...

Sa me gëzime  pritnim –

Kur t’ vijnë mysafirët !

 

Sa gëzim kur vinte

Ai , daja Sefer –

Se  gjithmonë na e binte

Nga një gurë sheqer !

 

Sa gëzim kur vinte

Ai, daja Shaban –

Se  gjithmonë ne e  binte

T’ gjithëve  nga ‘i  bomban !

 

Sa gëzim  kur vinte

Ai , daja  Kosum –

Se  gjithmonë na e binte

Nga ‘i copë llokum !

 

Sa gëzim kur  vinte

Babagjyshi  Latë –

Se  gjithmonë na e binte

Nga  një çokolatë !

 

Sa gëzim kur vinte

Kjo tezja Betulla –

Se ajo na binte

Një sahan me petulla !

 

Kur na vinin  bija ,

Seç na u çelshin sytë –

Binin gurabija

Dhe kuleç të grytë !

 

Sa gëzim kur vinin

Prej qytetit burra –

Se ata  na e binin

Nga një bukë nga furra !

 

Sa  gëzim kur  shkonim

Te tezja Magbule –

Atje do t’ kërkonim

Ndonjë kaçik pule !

 

Sa  gëzim kur shkonim

Te daja  Feriz –

Atje do t’ kërkonim

Tambël  me  oriz !

 

Sa  gëzim  kur  shkonim

N’ fshat  te  dada  Havë –

Atje  do t’ kërkonim

Nga një copë bakllavë !

 

Sa  gëzim  kur  shkonim

Te  halla Shatli –

Atje do t’ kërkonim

Nga një copë tatli !

 

Sa  gëzim  kur  shkonim

Te tezja  Nazlije –

Atje do t’ kërkonim

Ndonjë petull flije !

 

Sa gëzim kur shkonim

Ne,  te gjyshja Zade –

Atje  do t’ kërkonim ,

Çka është kafja  sade ?!

 

Gjilan, më 03.02.2011.      Demir KRASNIQI