Vullnet Mato: Pulëbardha emigrante

Vullnet Mato

PULËBARDHA EMIGRANTE

Ka bukuroshe Tirana

dhe rrethinat me fshatra, 

që të ndezin

fijet e shkrepëses së trurit.

Po pulëbardha emigrante

m’i bëri të mëndafshta

velat e braktisura

të joshjes së burrit.

Ndryshe nga çafkat

e shkujdesura të trollit,

kjo pulëbardhë 

fluturimesh të largëta,

që erdhi krahëhapur

nga përtej horizontit,

më mahniti me fuqinë

e përmallimit në flatra.

Me tingujt drithërues

të mbledhur nga bota,

me kujtimet ruajtur

nën pendët e gjoksit

dhe me gugitjet e saj

aq të ngrohta,

më magnetizoi trupin,

mendjen ma trullosi.

S’jam i pabesë t’i zgjidh

kurorës tërkuzën,

por kam syrin që zbutet

nga një pikë vesë.

Ajo qeshje lozonjare

në cepat e saj të buzës,

me dy rrudhëza nazike

më bën të vdes...