Vangjush Ziko: Emri i trëndafilit

Vangjush Ziko

EMRI I TRËNDAFILIT

LOTI I SORKADHES

Më tregoi gjahtari

për çiften në mur,

për gjerdhanin

 përbri saj varur.

Binin erë barut

dhe gjak të patharë.

Më tregoi qetë-qetë

një saçmë të qelqtë,

diamant me vesë të larë.

Ky lot sorkadheje

më ka

vrarë.

EVERESTI!

Ai qe alpinist.

Po vdiste në shtrat.

Nuk rënkonte aspak.

Akull i heshtur ish.

Mbi jastëkët e bardhë,

mbi bëborën e çarçaftë

dha shpirt.

Buzëqeshi:

Everesti!...

... edhe Everestin...!

EMRI I TRËNDAFILIT

Kur pa atë pa kopshtari,

kopshtar' i trëndafilave

atje përmbi siparin

bardhezi të filmave...

Zgjodhi më të brishtën

të gonxheve plot er'.

Ia hoq emrin e saj,

Ia vu

 Sofia Loren.

Kur flokët e tij sterrë

u ngjyen ngjyrë gri,

e pa të parën herë

me ngjyra nimfn' e tij.

Dhe

ishte aq i lumtur

i thinjuri kopshtar!

Gonxheja m' e bukur

kish marrë

nur' e saj.