Zemra Shqiptare
https://www.zemrashqiptare.net/
https://www.zemrashqiptare.net/
| E marte, 28.12.2010, 07:03 PM |
Cikli 5.
SEVDIJE REXHEPI
Sevdije Rexhepi: “BALADË MBI BALAD”, poezi, botoi Shtëpia Botuese “FAIK KONICA”
Prishtinë 2010. Botues: Nazmi Rrahmani; Redaktor dhe pasthënien: Shefqet Dibrani; Recensentë: Ramadan Musliu dhe Fehmi Ajvazi; Ballina: Skënder Hajdari; Redaktor teknik dhe realizimi kompjuterik: Enver Sulejmani. Libri ka 150 faqe, kurse Katalogimi në publikim – (CIP), Biblioteka Kombëtare dhe Universitare e Kosovës me nr. ISBN 978-9951-06-309-8.
MOLLË E NDALUAR
Ecje nëpër rrugë të vjetra
Të vjetra sa bota vetë
Në kopshtin ku lulet çelën së pari
Ku së pari u takuan
Shpirtrat që flisnin pa fjalë
Nën hije të një molle të ndaluar
U këput molla
Që atëherë dhe sot
Fajësohet belholla
20 janar 2010.
AMERIKËS...
Ty që më dhe dorën
E me fshive lotin
Të shkela Tokën...
Në shtizën tënde
Vara dashurinë
Krenarisht, erdha tek ti
Yjet nga qielli më thanë
Se ti gjithmonë pranë meje je
E unë si nuse e bukur
Në ditët e Lirisë
Me Ty gjithmonë
Mikja ime!...
16 nëntor 2006.
NË KËRKIM TË PROMETEUT
Në një botë pa emër
Ndërtoj muret e Trojës
Me lutjet pafund
Të mos depërtojë
Kjo uturimë qiellore
Që të çon peshë
Dhe nuk e lë rehat
Vallen e yjeve këtë natë
E shurdhër bëhem
Dhe roje e bindshme
Zgjuar...
Në kërkim të Prometeut
Të shndrisë errësirën
Hëna edhe ajo zgjuar, e ngratë
Të dyja të frikësuara deri në asht
Nga Kali i Drunjtë
U ngjita në Olimpin
E mendimeve të mia
Përsëri u luta në heshtje...
Zeusi – zot i zotave
Më fali ninullën – uratë
Mua dhe asaj
26 tetor 2009.
SI BOHEM
Mbi liqenin e Shkodrës
Reflektohet bukuria jote
Në pasqyrën e saj
Çiftëzohesh me ngjyrat
Që të falin jetë
Shikimi nuk ndalet aty
Ti si bohem
Shëtit luginave
Pa dalë më në horizont
Ndihet veç...
Shushurima e hapave të tu
Humbësh ende pa ardhur
Tek burimi që rrjedh rrëke
Në gjethe i lë fjalët...
Që unë dhe hëna
Bashkë me erën që frynë
Ti lexojmë
8 tetor 2009.
KËNGË PA FJALË
Ditës çdoherë i vë parmakët
Të mbahet e mos rrëzohet
Tek ngjitet e zbret
Shkallëve të kohës
Ruaj kokën
Nga plumbat e gjallë
Që fluturojnë
Më shumë se zogjtë
Kufjet mbaj mbi vesh
Se rafalët janë refren
Të një kënge pa fjalë
Edhe më: Shpresa varet diku tjetër
Lutem: Pa fjalë të mos mbetem!...
5 nëntor 2009.
EMERA
Në Lindje u errësua
Perëndimi përqafon të renë
Nga qielli
Emera do të zbres ngadalë
Në dritaren tënde
Fije rrezesh
Do të përkëdhelin fytyrën
Të të thonë se...
Ditë e re po lind
Ti do zgjohesh
Nga prekje të lehta fluture
Kur të mbërthehesh
Nga ujëvarë mëngjesi
A do qeshesh
Nga ëndërr e boshatisur?
20 nëntor 2009
METAMORFOZË
Mes roje tempujsh
Ndiej tek frymojnë perënditë
E shkuara më ngre për flokë
Hijet e se tashmes më ndjekin
Si Perseu
Do vjedh syrin nga Graitë
Për të më treguar
Të vërtetën e fshehur
Në copëza letrash
Ngjall kujtimet
Në miliarda pjesë të shpërbëra
E lodhur...
Kthehem tek të gjallët
Lë vdekjen fillikat
Supet nuk durojnë më
Kacafytje kohësh
12 nëntor 2009.
SHPRESËJETA
Kalova...
Nëpër Via Egnatia
Lexova lavdinë
E lindje – perëndimit dikur
Veriu e Jugu
Me bisht të syrit më përcjellin
Pa dashje...
Provokatore për dreq u bëra
Dëshmitare në grindje akrepash
Dhe orë që njëra – tjetrën gëlltisin
Në sfond dëgjoj zëra poliglotësh
Që ditës i ngecin në orbitë
Nëpër rrugë shkronjash
Ecje e lehtë të mos thyhen ato
Mbështjellur me petkun e shpresëjetës
25 nëntor 2009.
MALLPALOSUR
Në valixhen e lodhur
Nga rrugëtimi i gjatë
Nxjerr...
Mallin e palosur
E shuaj
Me pakëz ditë të numëruara
Lodhjen... harroj
Nën jastëkun e shtëpisë
Ku më pushojnë eshtra e shpirt
Ku gjej me bollëk dashurinë
Këtu...
Ndihem e gjallë sërish
Ah, sërish...
7 gusht 2009.
METAFORË
Në luftën e dyfishtë
Jashtë dhe brenda nesh
Thellë e më thellë gërmohet
Qetësinë për ta gjetur
Kur ditët sëmbohen
Helmohen...
Zbrazen nga kuptimi
Për antishok
Mbetur veç shpresa
E nesërmja mesopotamiane
Lind sërish metaforën
14 shkurt 2010.
ANKORIM NË MUZËN E POEZISË
Përtyp çastet që lënë gjurmë
E gjurmët hieroglife mbesin
Në thellësinë e detit shpirtëror mbyllen
Ku Poseidoni ruan fshehtësitë
Të mos grabiten nga Erinitë
Se pastaj...
Si Pandora do shpërndajnë
Shtrëngimin në zemër
Trishtimin e përjetuar
Ngushëllimin për mik
S’e dua...
Në muzën e poezisë
Do t’i zbraz frikën e mërzinë
Sulm orësh...
Luftë akrepash
Rëndësi sekondash...
Ndriçim kometash...
Veç në shkronja do të ankoroj
Patundshmërinë e palmave të jetës
30 tetor 2009.
PANORAMË
Muzgu...
Lodhur bie dhembja mbi Balad*
Me ngjyra të ylberta
Qëndiset horizonti
Si letra e djegur
Panorama tretet në sekondë
Dikush flet në altoparlant
Mbi bunkerin e natës
Bien mortajat...
Si një klithmë e marrë...
2 dhjetor 2006.
*Balad – qytet në veri të Bagdadit
NATË E FUNDIT
Edhe në fund të botës
Vjen fundi i vitit
Tretet në heshtje
Natë e fundit
Edhe pa ardhur
Fundi i saj
Pa cakërrime gotash
Uroj:
GËZUAR!...
Thërras pastaj gjumin
Të më shpie
Në të nesërmen e bardhë
31 dhjetor 2006.
RRETH MEJE
Nën ritmin e Celine Dion
Kujtime motmotesh parakalojnë
Në një vend tjetër
Shtyj minutat e vjetër
...Program i çuditshëm festiv
Ushtimë aeroplanësh nga jashtë
Brenda Unë...
Mes të djeshmes e të nesërmes
Pres... dhe lutem në heshtje
Me gjuhën e paqes
Vetëm për P A Q E...
31 dhjetor 2006.
ARRATISJE...
Në lakuriqësi nate
U zhveshën yjet
Për të fjetur
Hëna... u skuq
Nga paturpësia
Poshtë...
Luftohej marrëzisht
Luftë... jo veç e shkruar
Por bindshëm e vërtetë
Qielli mbeti në terr
Nata u bë rrëmujë
Hënë e yje
Trishtimthas u arratisën
21 shkurt 2010.
INCOGNITO
Pasdite e lodhshme
Frymëzënë në heshtje e terr
Ulur në një karrige
Të punuar hiç pa stil
Shikoj radhë makinash
Zhurmë pa mbarim e neveritshme
Tek gumëzhijnë me dritat ndezur
Presin shokët të ecin atje...
Ku as vetë se dinë
Jashtë nga këtu
Dhe telave gjemborë që na ndajnë
Nga zjarr e furtunë
Incognito* më shumë
Fobosi** tërbohet
Se Ata edhe më tutje qeshin
Nuk frikohen
Nisen bashkë me engjëjt
Njëri pas tjetrit
Të gjithë bashkë luten...
27 tetor 2009.
EVA
Rastësisht
Në kopshtin e Edenit erdha
M’u kujtua sa larg
Nëpër diagonale të botës
Bredhim...
...e mendimet tërhiqen
Si në një pikë magneti
Dhe vetëm atëherë ndiej
Ashtu siç ndiente Eva dikur
Dashurinë e saj
Kopshti Eden, 2 dhjetor 2006.
LOT I HESHTUR
Sot...
Një jetë e njomë
U këput si një lule
Thanë...
Ka ndodhur
Aksidentalisht
...
Në sytë e saj e pashë
Lotin e heshtur
Humbje e një jete të njomë në Balad,
3 janar 2007.
YJE E NYJE
Nga njëri skaj në tjetrin
Larg dhe afër
Kur gjumi hyjnorë të na kaplojë
E të humbkemi ndër yje
Ndoshta...
Me ndjenjën e kristaltë
Takohemi ëndrrave
E zgjidhim nyje
27 dhjetor 2009.
DET DËSHIRASH
Në parehatinë tënde
U bëra pagjumësi
Ëndrrat t’i mori Orfeu
E me to krijoi meloditë
Humbur në kërkim të Euridikës
Ti… kthen kokën kah fjalët
Unë shikoj presjet
Për t’i ngjallur sërish ëndrrat
As ato...
Nuk të vijnë më mysafir
Se bashkë me yjet
Ti i mat netët e gjata
Në det dëshirash
Zhytur në kujtime
Ndoshta i vetmuar
8 dhjetor 2009.
JAM KËTU...
Ti më thua
Këtu jam
Kur me erën vjen
Valëvit pak orët
Shpirtin ëmbël trazon
Pastaj shpejt ik
Atje...
Pas shtatë fushave
E maleve shtatë
Shtatë herë në ditë
Kthehem e vij
këtu ku jam
UNIVERS MES NINULLASH
Nata më mori në krahët e saj
Tinëzisht...
Me nektar gjumi më mashtroi
Qerpiklëshuar...
Në mbretërinë time një çast humba
Si në djep fëmije...
Përkundej universi mes ninullash
Ëmbëlsisht...
Dëgjova zërin e feniksit n’fluturim
Kur nën dritën e hënës befas ateroi
Në rizgjimin tim...
E që më futi në ëndrra
Pafundësisht
MBI QERPIK
Mbi qerpik varur shpresa
Sytë hapur mundohem t’i mbaj
Gjumi mos t’më mashtrojë
Kapakët e lodhur t’i lëshojë
Aksidentalisht të mos rrëzohet
Lënduar e kokëthyer pastaj
Si do të ngjitet shpresa sërish
Aty në majë jete
Aty mbi qerpik
12 janar 2010.
NDËR PLANETE TË PASHKELURA
Me mijëra vjet drite larguar
Diku ndër planete të pashkelura
Tinëzisht ikur në mbretëri të paqena
Që ndërtohen veç në ëndrra
Përreth teje fytyrat e vjetra
Që afër kishe në ditë apokalipse
Më nuk kanë rëndësi
Afërsinë e zhduku gënjeshtra
Fjalët i përpiu kolera
Vranësisht dhimbje...
A e di?!
15 janar 2010.
NË MBRETËRI DRIADASH
Me Ty jam sirenë
Notoj e palodhur nëpër legjenda
Shpirtkështjellën ngritëm nën dete
Njelmësinë ëmbël e zhduk era
Fluturimthi në dendësi pyjesh
Driadat thërrasin në valle
Mysafirë jemi në mbretërinë e tyre
Nën shushurimë gjethesh
Dirigjent... qetësia e kësaj nate
Orkestër... zemrat që rrinë zgjuar
Lidhim bashkë shkronjat
Që për ne shndrisin
Qielli lexohet pa fjalë
Çasteve kur Hypnosi
Ka harruar të na marrë
9 janar 2010.
AURORË E DHIMBSHME
Në zbrazëtirën pa emër
Si zogu i tmerruar
Përpiqet kot për aterrim
Krahëlodhur
Shtrëngon fort Gjirin
Të shpëtoj shpirtrat
Ushtimë...
Cicërima...
Zjarr...
Ra përtokë
Siç bie rrufeja
As një pupël...
As një shpresë...
S’iu gjet dikujt
Ashtu sikurse
Dita që puthitë Natën
U bënë bashkë
Dashuria me dhembjen
Qiell i mjegulluar
Shtrydhi njelmësinë e lotit
lagu datën...
“KULAK”, 9 janar 2007,
Balad / Rrëzim aeroplan udhëtarësh
KURRË MË...
Ag e terr end shekujt
Mbarë e mbrapsht
Si në vek trikon
Me ngjyrat e jetës
Bëj ylber kohën
Mbërthej dhe i bëj bashkë
Krahët e ndarë dikur
Dhe betohem më kurrë
Në mes qëndis shqiponjën
8 shkurt 2010.
PËR OSKAR
Nën dritë abazhuri
E lodhur nga përditshmëria
Shfletoj faqet e një libri ngadalë
Teshtij dy a tri herë
Tek ndiej aromën e vjetërsisë së saj
E përhumbur ndër rreshta
Zhytur në një botë ku vetë bëj skenarin
Filmi si për Oskar në sytë e mi shfaqet
Papritmas aurora ëmbël më buzëqesh
Shoh librin jashtë shtratit larguar
Kur gjumi tradhtisht më kishte mashtruar
E ëndrra më ka pushtuar gjer në mëngjesin e ri
11 shkurt 2010.
SHPIRT I TRËNDAFILTË
(Mësueses Flora Durmishi)
Kur në majë gishtash
Mundohesha të prek qiellin
Si ëndërr fëmije atëherë
Ti m’i zbrite yjet e ndritura
Duke m’i bërë gjerdan dashurie
Fanarë drite për mua
Ndër shtrëngata të kohës
Këtyre stinëve të vështira
Kur u rrita...
Ti përsëri më mbajte për dore
Edhe shtigjeve të largëta
Edhe mërgimeve të pafund
Shpirti yt i trëndafiltë
I dha zemrës time aromë
Ditët e panjohura
I pata më të lehta
Nën ombrellën
e kujtimit për ty
Kur eca unë...
Shpirti yt eci me mua
Edhe në rrugët gjarpër
Edhe në fronte lufte
Edhe larg kur shkova
Të pata afër - Mësuese
Si nënë të kam dashur
Shoqe kahmot
Se ti F L O R A . . .
Përherë mbushullon në mua
Që më mësove të ujis si duhet
rrënjët e jetës jeshile
Me rastin e 7 Marsit (2008).
URNË ROZAFEJE
Zhytem në buzëqeshjen tënde
Humnerë ku ëmbëlsisht humbem
Herë pluhur, herë n’fluturim
Ringjallem si feniks
Ndërtoj ndjenjën
Me tjegulla kohe
Ia bëjë urnën Rozafës
Të cilën do ta varros
Në muret e Kalasë së Rozafatit
Ku tjetër veç në Shkodren Loce
E pastaj do të vij deri aty
Ku ndihet fryma jote
Të më lidhësh
Fjongon ngjyrë ari
E mos ta kujtoj më
Luftën
Frikën
E zjarrin
8 tetor 2009.
3 X 364...
Në këtë formulë vjetore
Fitova...
Rrudha më shumë
Në mes e përmes ballit
Nga diell i fortë
A nga ndjenja e mallit
Nuk e di?!...
LUTJE
Përnatë
I lutem Zotit
Yjet nga qielli
Të mos bien
Ëndrrat e nisura
Të mos m’i djegin
As flokët e rritura
20 qershor 2007.
DALLDISJE RESH
Në këtë prush ferri
Sodis dalldisje resh
Tek i japin qiellit
Një nur të brishtë
Bëhem pjesë pikturash
Pa emër...
Mendja më humbi
Në soditjet e kota
Vetëm mbështillem...
Nëpër ditët e zymta
Që jetës ia marr hua
Nuk më besohet
Mbase jam në ëndërr
E jo në fundin e Botës
Të një çmendurie të pafund
28 maj 2007.
SI NË RINGJALLJE
Më tha (?!...)
Përditë takohem
Me Vdekjen
Por s’ia kam frikën
Pasi do të ringjallem
Në yjet e flamurit tim
... i besova ...
. . . . . . . . .
1 qershor 2007.
MURAL
Shikoj përditë
Një pikturë që flet
Për ata që erdhën
Dhe jetën peng lanë
Dhe jetën peng e morën
Çdokush që këtë mur
Parë s’e ka
Bënë fotografi kujtimi
Pastaj i lidhin shkronjat...
Si ura që i lidh brigjet
Duke numëruar në heshtje
Ditët dhe emrat që ikin
1 qershor 2007.
RUTINË
Mendimet e lodhura
Udhëtojnë drejt
Atdheut
Kur dita ik
Shtrëngoj dhëmbët
Duke u lutur në heshtje
Për një datë të plakur
Symbyllazi
Dëgjoj zëra monotonë
Përplasje...
Se jeta m’u bë lojë guralecësh
Mbrëmjeve
Shikohen filma pirat
Blerë në Bazaar irakian
Me më pak dollarë
Netëve korb
Me baterinë në dorë
Ndriçoj hapat e mi
Ah,
Ç’ironi...???...!!!...
ËNDRRA PËRHITURE
Stinëve të ftohta
Ndiej dorë ëndrrash
Që më shkrijnë dëborën
Them...
Ku jemi të 2-të?
Shtjellë pluhuri
M’i mbyll
Sytë e mi të malluar
Pyes:...
Janë ëndrra përhiture
A gjumë borëbardhe
Apo Tren Luftërash
Që përshkojnë
Hekurudhën - J E T Ë . . .
13 gusht 2007.
DËSHIRË
Në shkretëtirën e pa skaj
Gjendet oaza e mendimeve të mia
Që pi lotin e mallit tim
Duke bredhur kësaj shkretëtire
Në qiellin e hapur
Retë shtrydhin ditën
E atë e freskon era e lehtë
Dhe pak riga shiu nëse mund të bien
E unë...
Desha të nisem për atje
Ku mund të lagem...
Ku mund të dehem...
Ku mund të freskohem...
Nën shiun e qytetit tim
13 gusht 2007.
BOTËPENDËL
Nga larg
Sikur ndiej dorën tënde
Tek më lëmon flokun
Dhe m’i merr brengat e mia
E mbi supet e tua i vë
E mua: Botën Pendël
ma bënë...
19 tetor 2007.
NDËRDIJA
Alarm... alarm
Në gjendje gatishmërie
Menjëherë
Helmetë ushtari mbi kokë
Dhe jeleku plumb veshur
Diktonte Zëri diktues
Me fytyrë të mbuluar
Ah,
Sa m’u rëndua
Ndërdija
Në këtë ritual përditshmërie
LARG KOSOVE
Nuk do jem me ju
Kur nis pranvera e blertë
As në mëngjesin e ri...
S’do t’i dëgjoj
Krismat e dashurive
Me shekuj mbledhur në këtë pllajë
As shpërthimin e lotëve
Gëzimet e përhershme
Dardani - në kurorë mbuluar
Liburna del mbi valë
Nami Yt ringjallë - Kosovë...
Unë larg teje Atdheu im
Ti afër me zemër
Do mbetesh ajo
Kurrë më tjetër emër
17 shkurt 2008.
DITË LEHONIE
Thonjtë i hante nga (pa)vetëdija
Ose nga uria
Për të parë qetësinë
Si zorrë nëpër këmbë
Mbështillen çastet e ikura
Në këtë rrëmujë alarmesh
Marrëzisht të patrazuara
I kërkoj
Netët e mia të mjalta
Ah, ti kohë... grabitqare
Që merr e gjë s’kthen
Shëro dhembjet nga lehonia
E këtyre ditëplagosurave
Nëpër fronte lufte
Këndej...
nëpër mërgimet e mia
24 janar 2008.
7.
Mëngjesi i zymtë
Frymëmarrje e rëndë
Ndjenjë e turbullt
Në këtë mëngjes
Qerpikët u rënduan
Bebëzat e syve mbyllen
Nga mjegullnajë pluhuri
Me hapat e të verbëritë
Ecje e pasigurt
Ujku do mjegull
Po njeriu veç dashuri
Eh, dikush lëshoi
Një alarm..........
Që përhapi ushtimë e frikë
7 sekonda në pritje
Të jetës a vdekjes
E mua...
Për çudi
Më e ëmbël Jeta
m’u duk!!!
17 prill 2008.
Ditë sulmesh të pandërprera në Balad.
ENIGMË
Shpirti i lodhur
Bredh nëpër shkretëtirë
Nga thatësia
Dejtë e zemrës tkurren
Hapat rëndojnë
Sa malet
Që këtu zoti s’i krijoi
I frikohem
Vrapit deri në cak
Se mos më merr jeta në thua
Më thyhen dashuritë
E pastaj qesh Sizifi...
me mua
20 prill 2008.
MASKË E TRISHTUAR
Ditë e mundimshme
E plagosur rëndë
Orët u zgjatën pa fund
Shpirthelmuar një gjarpër
Ia mbështolli trupin ditës
E fytyra i mbeti maskë e trishtuar
Në dhomën e zbrazët
E bëra botën e lumtur
Krijova qetësinë e paqenë
Nën një melodi të panjohur
E ngushëllova natën futë të zezë
Se hëna kishte ikur nga llahtaria
E unë symbyllur u luta
Që e nesërmja të mos lëngojë
Nga plagët e marra sot
23 prill 2008.
TRESHE
Falë zhurmës së gjeneratorëve gjigantë
Rryma kurrë nuk mungon
S’ka as restrikcione
Edhe pse luftë është
Njerëz robotë
Që përpijnë rutinën me frikë
Të mos u mbetën sekondat në fyt
Kalitur në ushtima gjithfarëshe
Të etshëm për pushtime
Për më shumë se botë
Mbase e vogël është
Karshi lakmisë së madhe
Këtu koha shitet për para
E ditët mbeten më pak
Edhe më pak...
Se që ishin dje
Në këtë qytet të improvizuar
Ku nuk vlen njeriu as 5 pare
E ku jetojnë bashkë
Mërgimi e Frika
Dhe Lakmia për çudi...
27 prill 2008.
HIPOTENUZË MUNGESE
Diçka endet në mua
Si rrjetë merimange
Ditët i shndërron
Në hipotenuzë mungese
E katetet
Luftojnë netët e zhurmshme
Ku fishekzjarrët nuk janë të rrejshme
Si për dekor e spektakle
Diell e pluhur bëhen pëlhurë
E sytë verbohen nga matematika
Që s’ka lidhje me gjuhë
Nën thembrat e mia
Ndiej gurët e thepisur
Që ecin rrugën e njëjtë
Prush të nxehtë
Vitet shpejt ikën, u bënë hi
E hirin e mori era në pa kthim
30 prill 2008
LEMZA
Më fal Nënë
Nëse të ngacmon lemza
Për fajin tim
Se në heshtje
Të thërras emrin përditë
Zgjohem
Me emrin tënd në buzë
Pimë kafen bashkë
Si dikur...
Kur kujtoj zërin tënd
Marr fuqi këtu larg
Me emrin tënd, më lehtë
E mposht edhe një ditë
Edhe një tjetër...
... edhe një tje...
3 maj 2008.
UDHËKRYQE
Pështyjë poshtë
Në gji
Pështyjë lart
Në sy
Desha ta pështyjë
Kohën mashtruese
...
Por në duar më mbeti
Faculetë e zhytur
Nga pështyma
në fytyrën time...
Balad, 22 shtator 2008.
OPERACION PA INFUZION
Punë praktike
Në prerjen kirurgjikale
Të ditës
Pa pasur lidhje me mjekësi
Në trend...
Sipas rregullës në shkretëtirë
Me maska të bardha
Gojëmbyllur pa dallim
Të mos ndihet
Kundërmimi i gjymtyrëve
Të shkapërderdhura
Valë e nxehtë fryn
Verbon sytë që flasin
Në vend të gojës
Mushkëritë rëndohen
E frymëmarrja gulçon
Provim i mjekësisë ligjore
Pa ligje
Shpresa ruhet diku në brendi
Se dita do të ringjallet
Çuditërisht
Edhe pa infuzion
Balad, 22 shtator 2008.
NATË HIPOKRITE
Rafalët (në)pasdarke
Dëgjohen nga afër
E mua më janë përzier
Bashkë me muzikën shqip
Nga ky zjarr
Mundohem t’i largoj
Të paktën mendimet e mia
Që gërmojnë thellë në të kaluarën
Ku më riNgjallin kujtime...
E më sillen vërdallë
Në të tashmën që po e rijetoj
Ehu i plumbave
Dhe e rrahura e zemrës vazhdon
Me të njëjtin ritëm
Dridhet gjithçka
Në shkallë të lartë Rihteri
Pastaj...
Mbulohem nga qetësia
Gjumi më rrëmben
Ah,
Ç’natë hipokrite
...më rrethon!!!
21 korrik 2009.
SOMNAMBUL
Rrëshqas shkretëtirës
Rëra përcëlluese më djeg lëkurën
Zhytur...
Gjurmëve të vjetra
Ku dikur Lindje e Perëndim
Kryqëzoheshin në Bagdad
Nuk e shikoj dot Heliosin
Se më verbon dritën në sy
Somnambul shoh Perlat...
Aty ku së pari u gjet koha e humbur
Ngjitem qiellit si feniks
Kur digjej e shkatërrohej nëpër histori
U lodha duke bredhur
Civilizimeve të lashta
Sumeriane
Babiloniane
Asiriane
Hapa sytë, për çudi
Frymova lirisht vetëm
...në Iliri
21 korrik 2009.
NË EDEN
Rrugë e gjatë
Mendje e shkurtë
E largët Lindja
Tretur nga Perëndimi
Me kokën në trastë
Dheu i huaj prush i gjallë
Mbi tokën tënde
Ecim këmbëzbathur
Në vend të luleve – zjarr
...
Në vend të dashurisë
Urrejtje e marrë
27 nëntor 2006.
NË BABILONI
Gjea... u rizgjua nga Kaosi
Qindra shekuj
E rëndojnë mbi supe
Në një cep
Damarët e shterur nga thatësia
Hermesi pa mëshirë
Ditët ia lidh me zinxhirë
Heliosi i pjek në rërën zbrazëtirë
Mijëra thërmi pafundësisht
I merr era
Nga lufta qiellore
Për pak çaste
Pikëza që bien vertikalisht
Zeusi dhuroi freski
Në një skaj të botës
Diku në Babiloni
27 tetor 2009
KULLA E BABELIT
Kjo natë e pagjumë
E gjatë sa Eufrati
Si Hadi e errët
Nga plagët e marra
Dhe ëndrrat e vrara
Eosin, yllin diellor
Zështerur e thirra kot
Se më la të pres
E strukur në një qoshe
Deri në mëngjes
Mendjelodhur
Krijova Kullën e Babelit
Desha të prek qiellin
Të marr pak shpresë
E të lutem për njerëzimin
Siç bënte dikur qytetërimi
Në thellësinë e shekujve
30 tetor 2009.
NË KËTË AMFITEATËR
Në Tokëjetim pa afërdet
Ku kriposet gjithçka
Të çon peshë gjer në qiell
E përplas përtokë
Asht ngjitur s’të lë
Pluti qesh me ne
Si uni mbetet i paprekur
Prej kundërmim – barotit
Nga fillimi i pafund
Ende për diçka
Të tretur mbesim
E vërteta
Sillet vërdallë në eter
Si në amnezi
Shtiremi se nuk e dimë
Mbase vetë s’duam ta kapim
Të humbur e të pangopur
Sa aktorë të këqij jemi
Në këtë amfiteatër
6 nëntor 2009.
ME DIOPTRI
Në qytetin e përkohshëm
Që përkohësisht
Muri gjembor
Na ndan nga realiteti
Makinat lëvizin në perimetër
Të tjerat marrin fatin me vete
Rrugëve gjarpërore ec jeta
Ata me sy të uritur e trupleckosur
Pafajësisht qeshin me ne
Ne po ashtu me ‘ta
Ata me dorë na përshëndesin
Ndjejnë fajësi për mungesë bardhësie
Ndihet kudo
Muri, gjembat, ndarja
Ah, ç’fatkeqësi
Jeta shikohet me dioptri
Kampi në përditshmëri...
30 nëntor 2009.
MPREHTËSI SHQIPONJE
Ditë e natë zogj të hekurt
Sillen vërdallë mbi kokë
Vështrojnë nga lart Shkretëtirën
Ruajnë përditshmërinë...
Të mos shndërrohet
Në hije të frikshme
E përsëri në shkretëtirë
17 nëntor 2009.
LLOGARITJE
Papritmas u tha
Të mblidhemi në një vend
Të numërojmë njëri-tjetrin
Si kokrra fasule
Ata të Ditës
Shfaqën fytyrat për llogaritje
Të Natës me pikëpyetje
Symbyllas hapën derën
Të zemëruar i lamë
Për ndërprerje ëndrrash
Askush nuk e tha pse-në
Nuk deshën të na trembin
Pranuam heshtjen
Të vërtetën lexuam pa fjalë
11 nëntor 2009.
SI GILGAMESHI DIKUR...
Në rrasa argjile të kohës së arratisur
Të shkruara mbetën
Frymëmarrja e ditëve të fjetura
Nëpër Babiloninë e lashtë
Kërkuam së koti
Si Gilgameshi dikur
Pavdekshmërinë
E ëndrrave të blera
Duke ecur pavetëdijshëm
Në fije peri
Jeta qëndroi e pa këputur
Duke shpresuar...
Dhe lutur...
5 janar 2010.
PA PROTOKOLL
(Vizitë në Qendrën Presidenciale të Bill Klintonit)
Nga Vendi i Shqiponjave
E patrembur fluturova tek Ti
Pashë me bebëzat e mia
Piktura të së kaluarës
Të varura në Qafën Tënde
Fytyra që më flisnin pa fjalë
Për ankthin e përjetuar dje
Kujtova ditët e humbjeve
Frikën e netëve pa gjumë
Vagonë të mbushur përplot
Që tretnin shpresën në pa kthim
Si thesar...
M’i kishe ruajtur të gjitha këto...
Të sodis në qetësi yjet në shtat
Tek shkëputen e shndërrohen
Në pëllumba të bardhë
Ndalen e pushojnë
Në vija pentagramesh
Se jetën e njeriut mbrojnë
Erdha sot... pa protokoll...
Veç me shpirt
Të të them nga zemra
Faleminderit Amerikë
Në kohë të vështira
Dhe të Lirisë
15 maj 2009.
TRETJA E ENKI-IT
Në shkretëtirën e pambarim
Oazat e pakta
Pinë ujë nga lumenjtë e vjetër
E pashuar ende mbetet Etja
Se Enki u tret
Nëpër plasaritje shekujsh
La tokën shterp
Shtjellat e rërës
Verbojnë sytë e kohës së re
Madhështi...
E shkruar nën tokë e mbi të
Nga lart...
Anu përcjell gjurmët
Kacavjerrë mban mendimet
Thërret Enlil-in - Perëndinë
T’i fryj larg dhimbjet
Dhe këtë shkretëtirë
Me bari ta mbijë
7 janar 2010.
Anu – Perëndi Mesopotamiane e Qiellit
Enlil – Perëndi Mesopotamiane e erës (ajrit)
Enki - Perëndi Mesopotamiane e ujit dhe tokës pjellore
E patrembur nga e nesërmja
Pushoj në Panteon
Kur ditës i zihet fryma dhe mua
Me eter sytë fërkoj
Nëpër epe e mite duke bredhur
Alivanosur dhe ringjallur
Lot i dhembjes në Tigër derdhur
Shpirti shëtit karvanëve n’shkretëtirë
Ndër tempuj e trungje palmash
N’kërkim të sekretit të lavdisë dikur...
Dërguar nga Mbretëresha në Fron
Shqiponja fluturimthi më vjen në Mesopotami
Aortë e saj më mban ende të gjallë
Sot e shumë shekuj më parë
Më mbron me krahët e saj
11 janar 2010
NGA MBRETI NEBUKODONOSOR
(Kopshtet e varura të ndërtuara 590 p.e.r)
Nëpër kopshtet e varura të Babilonit
Bukurinë rrëmbeva
Atë e bëra kurorë
Mbështjell me aromën e përjetësisë
Në këndin e padukshëm të kohës
Lëshova letrën e pashkruar në erë
Të aterojë në Al Hilla
Ndër gërmadha shekujsh
Të shkruhet poezia e vjetër
Kur për Semiramidën mbretëreshë
U fal mrekullia
Nga ndjenja dhe dashuria
29 dhjetor 2009.
TË TASHMËN PREK
Në pamjen pa fjalë shikimi flet vetë
Pafundësia hap gojën të të përpij
Shfaqje e zymtë shkronjash
Që nuk lindin dot fjalët
Kur në vallen e tyre pa ritëm
Lozet me hapa të dehur
Ndër shtrëngata të çoroditura
Zgjohem në një botë tjetër
Të tashmen e prek nga afër
Jetoj me shekujt që ikën
E përgjumur...
Mbulohem me jorgan lashtësie
Shtrij këmbët në Babiloni
Se ëndrrat m’i përkund Iliria
5 shkurt 2010.
UDHËTIM PA ITINERAR
Në syprinën e huaj
Gjerë e gjatë
Shtrihen mendimet
Duke udhëtuar pa itinerar
Poshtë e lart bredhin
Si Baltazari
Pastaj kthehen sërish
Në një skutë
Ku pika pikën tërheq si zhiva
Engjëllor vjen bekimi
Kur ditët ecin me hapa kërmilli
Nëpër çmenduri dallgësh
Besimi rritet dhe më shumë
Jeta e pakërrusur mbetet
Në luftë sfidash
Blasfemia fundosur në humnerë
Apostazisë i mbylla derën
Kurrë s’e pranova për mik
E çova në dreq të mallkuar
Dhe pikë(.)
29 janar 2010.
SHAMATË
Shikim i zbrazët
Më e zbrazët se retë
Që nuk sjellin shiun
Zhurmë gjithfarësh përzier
Që nuk i ngjan melodisë
Numërojmë në vend
E ditët pa emër i lëmë
Javët na kujtojnë harrimin
Në duel me vetveten
Kënaqemi me Fitoren
Qoftë kjo si e Pirros
Kohë e tretur në infinit
Që nuk përsëritet si stinët
26 dhjetor 2009.
E VËRTETË E AMPUTUAR
Në sfondin e mëngjesit
Të shtënat sporadike
Shkundin gjumin
Erë baroti përkujton se
Ende jemi këtu...
Në djepin ku dikur
U përkund civilizimi
Zëri shteret
Qielli gri i lë retë të flasin
Mendimet mbështillen
Me vello shkretëtire
Fillim e fund ngatërruar
Si flokët e pakrehura
Verbërisht...
Amputojmë të vërtetën
Edhe sot si dje
Mashtrojmë veten
15 janar 2010.
PENEL NË ZEMËR
Netët njëra – tjetrën filtrojnë
Nga zhgjëndërr e përsëritur
Në kohën e pafjetur
Rrëfyer Herodotit
Lindjen e agimeve të errëta
Nën breshëri plumbash e mortajash
Edhe më tej s’i besohet vetes
Jeton ëndrrën
Atë të vërtetën e hidhur?
Me penel në zemër
Duke pikturuar shpresën
Me ngjyrat që falin
Një të nesërme të ndritur
23 janar 2010.
ME FLOTË LIBURNE
Përtej vetëhijes
Mas kohën në lashtësi
Valë jete thyej me flotë Liburne
Kryq e tërthor i bie historisë
Në qiellin e pafund të Babilonisë
Gdhendur shqiponjë e gjallë
Më jep fuqi në ditët e stërzgjatura
Krahët e saj m’i falë
Të fluturoj etshëm në Dardani
Sa herë damarët më shteren
E sytë verbohen nga kjo thatësi
Oh, sa herë kthehem atje
E vij këtu përsëri
25 janar 2010.
VEGIM MITIK
Zeusi me skeptrin e tij
Nuk i la ditët
Të ndryshken nga frika
Se aty pushonte shqiponja
Që prej se u krijua jeta
Shikimi...
I padjegur mbeti
Kur Karrocë e Diellit
Zbriste në shkretëtirë
Për të fjetur
Nën Mburojë Akili
Mbijetoi njomësia e shpirtrave
Thembra nuk u zbulua
Sizifi i kohës së re
Thanatosin lidhi sërish
26 janar 2010.
KOHA
Në ekuacion ngjet
E barabartë me asgjë
Me plus një ditë të re
Minus një të vjetër
Që ik në pa kthim
Pjesëtuar me para
Koha më e madhe se infiniti
Shumëzuar...
Me humbje momentesh
Të pakthyera
Gjeometrikisht koklavitje
Në trajta të ndryshme
Ende me të panjohurat luftohet
Nëpër boshtin e jetës
Sinus e kosinus thyhen
Tangjentja ecë më tutje...
28 janar 2010
NË ORIGJINË
Do të kthehem
Ndër fushat e gjera
E malet me legjenda
Aromë e barit të njomë
Zemër e ndjenja t’i ringjallë
Symbyllur si në ëndrra...
Do të ndiej aromën e Karadakut
Ajri i vendlindjes
Mushkëritë do m’i shpërlajë
Nga pluhuri i shkretëtirës
A harresës, as vet nuk e di
Yjet do të shndrisin në mua
Pastaj me mua ata do të ecin
Nga Edeni e gjer në Dardani
Në krahët e Atdheut
Do të ëndërroj e qetë
përsëri
2 dhjetor 2009
POEZIA IME...
Ti lum...
Nëpër kthesa e lakesa
Herë e drejtë
Herë gjarpërore
Më e gjatë se Nili je...
poezia ime...
E pafund...
Sa Oqeani Paqësor
Por jo e qetë
Dallgëve të rrepta
Lind e çiltër si mëngjes
poezia ime...
Ti vullkan...
Lavë shpirti
Që shpërthen si Etna
Mister i gjallë
Nëpër kohë e pashuar mbete
Gjithmonë Ti
poezia ime...
18 shkurt 2010.
Zvicër/St. Gallen, 26 dhjetor 2010.
Përgatiti: Sh. Dibrani
SHËNIME PËR AUTOREN:
Sevdije Rexhepi, përveç gjuhës shqipe zotëron mirë edhe anglishten e frëngjishten, kurse poezi shkruan në gjuhën amtare dhe në anglisht. Ajo, momentalisht punon në Kopshtin e Edenit në Irakun verior.
“Baladë mbi Balad” është libri i katërt me poezi.
Është prezantuar në këto antologji:
1. “Mozaik të një portreti”, Tirane, 2004.
2. “Gjuha e dashurisë poetike”, Tirane, 2006.
3. “Nënës”, Tirane 2007.
Veprat letrare:
1. “Simfoni e heshtur”, poezi, Gjilan, 2003.
2. “Orët e mungesës”, poezi, Gjilan, 2004.
3. “The Sounds of Waterfalls – (Tinguj ujëvarash)”, poezi, Gjilan, 2004.
4. “Baladë mbi Balad”, poezi, Prishtinë 2010.
5. „Between Rivers of Babylon”, poezi, Prishtinë 2010.
(Sh. Dibrani)