Cikël poetik nga Kostaq Duka

Kostaq Duka

Qirinj apo fanarë

Mbi rruzull,

Milliona dritëza.

Mbi pemë, ballkone, dritare, çati , tarraca grataçielash gjigande......

Janë qirinj  për kohën që iku,

Apo fanarë për anijen e shpresës

Ankoruar në limanin e krishtlindjeve?!

Celulari

Plotësoi  shërbimin celulari, më duhet ta ndrroj….

Më dhimbset.

Nëpër mushkëritë e tij

Shpirti im i drithëruar la gjurmë,

Në mijra shpirtra të tjerë rregjistruar.

Duke marrë një tjetër më të ri

Më ngjan sikur braktis një mik

Që koha e nxorri  në pension.

Sy-Pikëllimi

Në rini

Kur jetës barasvlerë i vija dashurinë për ty

Pikëllim të quajta se ai të lotëzohej shpesh në  sy….

Vitet shkuan….

Thashë se nga syri yt pranë meje do pikonte gëzimi

Ti jo nuk ndryshove.

Përkundrazi me faljen pa kufi të dashurisë

Ishe ti ajo që mbi  sytë e mij mbolle trishtimin.

Te pastrehët

Per festën e Krishtlindjeve

Të pastrehët u mblodhen në nje "strehë" të madhe

Hëngrën e pinë, qeshën e vallzuan rreth bredhit deri në lodhje...

Gëzimin e tyre e rrëmbyen shpejt e shpejt kameramanët.

Sensacion për stacionet e botës....

Pastaj, pastaj

Dolën në rrugë....

Era e akullt e dhjetorit i'u hodhi cifla ngrice mbi fytyrë.

Kokëulur

Larg dritave të makinave u zhytën në errësirë

Në kërkim të kthinave.......

Dhjetor, 2010