Suzana Kuqi: Bijës sime për ditëlindje

Suzana Kuqi

Bijës sime për ditëlindje

Dje...

Gëzuar vajzë e vogël që luan me rrezen e dritës, ç'shtigje do të marrësh sot... në ç'yll do të qëndrosh?

Në më të shndritshmin, thotë ajo.

Përse?

Sepse është më i bukuri.

Shpesh bukuria është mashtruese, të tërheq, të mbërthen e të bën të vuash...

Ani, thotë ajo, do të di të vuaj...

Sot...

Gëzuar bija ime

Gëzuar

për sa pranvera të kanë lulëzuar

për sa vjeshta të kanë zbukuruar...

Gëzuar

për aq herë sa ishte e para herë

për aq herë sa ja dole mbanë

për lotin që të shndriu qerpikun

për buzëqeshjen që të ngjyroi ditën...

Gëzuar bija ime

Gëzuar

për sa herë u ndjeve e rritur

për sa herë fëmija thellësive të është strukur...

Gëzuar

për aq miq me të cilët gëzove e qeshe

e për aq sa kur qave pranë t'u gjendën...

Gëzuar

për çdo rrahje zemre

për çdo shkëlqim të syve që diellit i bënë strehë

për çdo grimcë hënëze në qënien tënde

për çdo gjethe ëndrre rrugës të rënë...

Gëzuar...

e të uroj të mësosh të ndjesh tingullin që lëshon dielli

kur lind nga deti mbi horizont

perëndia mbret që nuk ka nevojë për fron e për skeptër

të vdesë e të rilindë përditë

me gëzimin e dashurinë e lindjes së një dite...

...se asnjë ditë nuk meriton të jetë kopje e zbehtë e ditës tjetër...

Qoftë e ardhmja jote zbulimi i këtij gëzimi dhe i kësaj dashurie bija ime...