Vangjush Ziko: Zogjtë këngëtarë

Vangjush Ziko

ZOGJTË KËNGËTARË

Sa zogj këngëtarë

paska në botë!

Sa zëra,

sa ngjyra magjike!

Zoti,

s' i krijoi së koti.

Nga misteri i tij

u dha nga një çikë.

Poetët janë një racë me zogjtë.

Pendën zogjve ua kanë marrë.

Por kanë një ndryshim të vogël,

të vogël fare kanë.

Sytë s' i mbyllin

siç i mbyll bilbili.

Nuk dridhen në erë si laureshë.

Ata këndojnë vesën e prillit

që çel oazin e jetës.

Ata këndojnë dhe për stuhitë

që shembin pyjet,

vrasin zogjtë.

Ata

edhe të qajnë dinë

për hallet e kësaj bote.

Zoti

u dha diçka më shumë

se zogjve këngëtarë.

Ata i bëri të pagjumë.

I bëri të mençur

dhe...

të marrë.

Dhjetor, 2010