Kristaq Turtulli: Pikërisht në orën 5 mbasdite

Kristaq Turtulli

Pikërisht në orën 5 mbasdite

Pikërisht në orën pesë mbasdite...

Shkava, u rrokullisa brenda oqeaneve të syve,

Ti ishe e befasishme,

E pushtetshme,

Magjike,

Nazike.

U përpoqa të mbahesha mbas qerpikëve,

Por ato ishin elastike,

Butë si në filmat vizatimorë u thitha prej thellësive.

Pikërisht në orën pesë mbasdite.

Jashtë, mbi ujë frynte erë,

Binte borë,

Bënte ngricë.

Shkisnin slitat mbi akullin e fortë.

Brenda thellësive dukej si me ngrohtë,

Mrekullisht tretesh prej ujërave,

Joshes mbas korale të fshehura mes shkëmbinjve,

Shkujdesur pranon ngjitjen e luspave, leshterikëve, zvarranikëve,

Gjelbërimin e avullt të ëndrrave,

Puthjet tinëzare të sirenave.

Ujëvarat e lotëve,

Kriposnin kripëzimin e oqeaneve.

Pikërisht në orën 5 mbasdite...