Cikël poetik nga Hajdin Morina

Hajdin Morina

ÇMIMI I FITORES

Po deshe gjithë natën

Bëj plane për Arbërinë

Me Gjergjin në Krujë

Asgjë s’ke për të fituar

Në mos u frikësofsh

Lufto 24 orë përkrah Gjergjit

Liri nuk fiton

Edhe nëse je ushtar i Skënderbeut

Edhe në mos të vrafshin

Në Torvioll Albulenë  Valkal

Asgjë nuk fiton nëse shpëton

Nuk i fiton as një palë këpucë të reja

Për ato që ke lënë ndër beteja

Por ai vështrim ai sy i Gjergjit

Tejpërtej krenarinë ta shpon

Syri i Gjergjit ai vështrim

Që kërkon shpjegim

Për gjithë këto plagë

Në qiellin në tokën

E Arbërisë sonë

Për gjithë këto plagë

Në Flamurin tonë me Shkabë

TE JASHARËT

Nëpër qiell yje bëhen

Metaforat e Kadaresë

Për atë flakë-liri

Të kësaj Shtëpie

Për atë flakë-shqiponjë

Që dogji mjegullën

Përmbi Kosovë

Mbi qytete të Evropës

Dhe të Botës

Sytë e Lirisë plot Adem

Sytë e Ademit

Plot qiell Kosove

Përplot Liri

Sytë e Ademit

Birit të Lulzimit

Të Adem Jasharit

Fryn Liria e Kosovës

Asnjë re në qiellin e lartë

Mbi Jasharë

Plot qiej të kaltër

Në sytë e Ademit të Ri

Për besë zjarr del

Nga përqafimi i tij

Pranë varreve

Dhe në Kullë të Jasharëve

Ballin mbështet Liria

Dhe vijnë shqiptarët

Në Shtëpinë e Lirisë

Shprushin Jetën dhe Legjendën

EKOLOGJIKE

Pasi t’i largojmë

Të gjitha mbeturinat

Nga pragu i derës

Nga oborri

Nga fshati nga qyteti

Nga fusha nga mali

Dhe nga Deti

Si do ta pastrojmë ambientin

Nga kundërmimi i shpirtit