Çështja çame

“Do të kthehemi në Çamëri, do të përmbushim amanetin e të parëve”. Kështu ka deklaruar dje në Elbasan, deputeti Shpëtim Idrizi, kryetar i Partisë për Drejtësi dhe Unitet (PDU). Ndërkohë, Tahir Muhedini, kryetar i Partisë për Drejtësi dhe Integrim, ka kërkuar nga Durrësi bashkimin e faktorit politik çam, për të realizuar aspiratat e përbashkëta.

Idrizi: Kthim në trojet tona

Shpëtim Idrizi dhe deputeti tjetër i PDU, Dashamir Tahiri, morën pjesë dje në një tubim në Elbasan, me rastin e njëvjetorit të krijimit të partisë së tyre. Gjatë fjalës së mbajtur në këtë tubim, Shpëtim Idrizi deklaroi se “ne do të kthehemi në Çamëri, dhe sigurisht ne do t’i fitojmë të drejtat tona. Europa e sotme, Amerika e sotme nuk lejojnë që ne të nëpërkëmbemi. Ne do të kërkojmë që të dënohen fajtorët për masakrën e Çamërisë, për gjenocidin që u bë ndaj kësaj popullsie. Ne do të kërkojmë që populli grek të na kërkojë falje, pasi Çamëria ka zot, ka bijtë e saj në Shqipëri. Do të bashkëpunojmë me çdo qeveri, do të imponojmë që me negociata diplomatike me Greqinë të flasin për çështjen çame”, ka përfunduar Idrizi, duke shtuar se “ne nuk do të dalim nga Parlamenti pa bërë një rezolutë për çështjen çame”.
Kreu i PDU-së tha ndër të tjera se për zgjidhjen e çështjes çame, PDU do të bashkëpunojë ngushtë me të gjithë spektrin politik, pa dallim kahesh. Duke u ndalur te zhvillimet e fundit ku vendin kryesor e zë ngjarja në Boboshticë, Idrizi renditi edhe faktorë të tjerë që cenojnë interesat kombëtare. “Ne kemi kundërshtuar marrëveshjen e ujërave detare, marrëveshjen e varrezave të ushtarëve grekë, që ranë për një kauzë të humbur. Ne do të kundërshtojmë fort regjistrimin e popullsisë mbi baza etnike dhe fetare. I kemi kërkuar klasës politike shqiptare që të mos cenohet dinjiteti i shqiptarëve, si në rastin dhunimit të varreve të Boboshticës”, ka pohuar ai. Në fjalën e tij, Idrizi theksoi në mënyrë të veçantë se marrëdhëniet e PDU-së me komunitetin grek që jeton në Shqipëri do të jenë vëllazërore. “Ne kërkojmë marrëdhënie vëllazërore me komunitetin grek, pasi së bashku kemi ndarë të mirat dhe të këqijat, sepse ne i ndajmë minoritarët nga provokatorët e çështjes çame”, tha ai.

Muhedini: Bashkim!

Gjatë një takimi me anëtarët dhe simpatizantët e Partisë për Drejtësi dhe Integrim në Durrës, kryetari i saj, Tahir Muhedini, përcolli dhe një herë idenë e bashkimit të dy partive çame në një të vetme, duke e argumentuar këtë me forcimin e autoritetit të çështjes çame në arenën ndërkombëtare. Përfaqësimi i kësaj çështjeje me dy parti, sipas tij, e ul ndjeshëm autoritetin e çështjes, ndërsa të bashkuar në një grupim të vetëm veprimet e ndërmarra mund të kenë ndikimin e duhur. Duke bërë një ekspoze të situatës politike në vend, që ndikon në çështjen çame, Muhedini u ndal në rastin e Boboshticës. Në theksim të idesë se liria e dikujt mbaron atëherë kur cenohet liria e tjetrit, kreu i PDI-së nuk u shpreh kundër ngritjes së një memoriali, por kundër ngritjes së tij mbi varreza civile dhe nderimit të heronjve që nuk mund të jenë heronj lufte për çamët e shqiptarët. Takimi i mbajtur në pallatin e kulturës “Aleksandër Moisiu” u organizua nga dega e PDI-së në Durrës, me kryetar Indrit Hamidin. Qëllimi i tij ishte të prezantoheshin para anëtarësisë dhe simpatizantëve lëvizjet e bëra nga PDI në Shtetet e Bashkuara për lobimin në Kongresin dhe Senatin amerikan lidhur me hartimin e një rezolute për çështjen çame.
-------------------------------------------------------------------------------------------------------------

Minoriteti

Nicholas Gage “braktis” “Omonia”-n dhe Partinë Bashkimi për të Drejtat e Njeriut në Shqipëri. Në një letër drejtuar gazetës trigjuhëshe “To Opama 2000”, Gaxojanis bën me dije se mbështetja e tij dhe shpresa për përmbushjen e të drejtave të minoritetit grek në Shqipëri shkon me partinë e re të këtij komuniteti, pra, Partia Minoriteti Etnik Grek për të Ardhmen, ose MEGA. “Do të doja të përgëzoja themeluesit e partisë së re politike të minoritetit etnik grek. Të gjithë ne, që për shumë vite me radhë u përpoqëm në nivel ndërkombëtar për zbatimin e të drejtave themelore të minoritetit, mirëpresim themelimin e partisë me parime demokratike... Themelimi do të mbushë një boshllëk të madh. Në veçanti sot që organizatat kryesore të minoritetit kontrollohen nga një klikë e vogël që prej kohësh i shkatërroi ato, duke mos respektuar parimet bazë të demokracisë dhe duke shmangur bërjen e zgjedhjeve për kryesinë nga baza (ashtu sikurse bëjnë dy partitë e mëdha në Greqi)”, deklaron Gaxojanis në letrën e tij. Kështu “përkëdhelja” e pakufishme e tij për kreun e PBDNJ, Vangjel Dule, si njeri i angazhuar dhe me ndikim në diasporën helene po diferencohet në drejtime të tjera në Shqipëri, duke zyrtarizuar një thyerje domethënë në minoritetin grek.
---------------------------------------------------------------------------------------------------------------