Dy poezi nga Hasan Qyqalla

Hasan Qyqalla

ORGJISË

Në themele kulle, në dritë vajguri

Kalitë me ninullat, në djepa druri.

Arat mbjellë, me parmend, me qe

Çdo krismë pushke, për lindje të re.

Abetaren thurrë, n’ palcë Manastiri

Kambanat në zemër, mishërim Krishti.

E pollën shartimin, në ditë të zisë

Mundëm perdhosjen, emblem orgjisë!

FTESA

Me buçetë lulesh, dremitem tej deti

Në pritje të FTESËS, nga dit’ e parë

Porosi në vazo, kartolin post trageti

E lotët pikë-pikë, përlahen në valë...!

Sa urimet zihen, sa t’pergëzuan sot

Sa argëtohen n’aheng, sa ngren dolli

Me dritë shandani, do pres gjer në mot

Moroze hijerëndë, pasqyrë n’ ardhmëri!