Poezi nga Janaq Pani

Janaq Pani

RRËFEN DESI - pa censurë

1. Pjatën ta mbaroj me supë

mamin shumë e kam duruar,

për çdo lugë e për çdo lugë

m'i lidh fort dhe këmbë e duar...

2. Me babin shkoj në Librari

mend të më japë ç'libër të zgjedh,

por babi im hutuar rri

e për çdo titull supet i mbledh

e një buzqeshje pafaj më hedh.

3. Dikur bëri një gabim

në çast babi u bë trim,

tha: "Do heq rripin e mezit!"

frikën për t'i shtirë Desit.

Ia kthen çupa pa ngritë tonin:

"Si do ta mbash pantallonin?"

4. Ca fëmijë u vunë në garë

kush të rrëfejë më parë

kur ndodh të bëjnë gabime

nuk shpëtojnë pa dënime,

shkulje veshi e me shumicë

ca bace në prapanicë.

Vetëm Desi mbet pa gojë

se nuk ka se ç'të kallzojë.

E pyesin: "Si ke shpëtuar

asnjëherë pa u ndëshkuar,

kush i ndal babin e mamin?!"

...Është gjyshi që bën namin.

5. Xhepi i Desit dhe Bora

Arrat që u dha mamaja

Bora i hëngri të sajat,

kurse motra Desi tha:

"Pak më vonë do t'i ha,

po i shtij në xhep t'i ruaj

më presin shoqet të luaj..."

Mbas një ore ankohet Bora:

" Desi shih, më ngriu dora,

motër, a më bën pak vënd

që ta ngroh në xhepin tënd?"

Doçkë e Borës si një lodër

te xhep i Desit kullot,

hyri bosh pa asnjë kokër

e na del me arra plot...