Janaq Pani: "Trimëritë" e xhaxhi gjeologut - Të qeshim pak

Janaq Pani

"TRIMËRITË" E XHAXHI GJEOLOGUT - Të qeshim pak

Kur xhaxhi gjeologu, një ditë

si malet e brodhi gjithandejë

u ul e të tij "trimëritë"

nisi me nge t'i rrëfejë.

...Në shpatet e malit Korab

dikur u hasa në arushë,

nuk dita nga ia mbajta me vrap

për pak dhe brekët i kam mbushë.

Kush thotë që unë s'jam trim,

t'ia mbathësh duhet guxim.

Në pyllin e Malit të Dajtit

hunguroi ujku aty pranë,

i qetë të rri nuk ma mbajti

nga vrapi desh brekët më ranë.

Mos thoni pastaj se s'jam trim

t'ia mbathësh duhet guxim.

Te Mali i Shenjtë Tomor

fishkëlleu nepërka tek shkoi,

ia mbatha pa më ardhë hiç zor

përpak pipia më shpëtoi.

Si unë nuk gjen tjetër trim

t'ia mbathësh duhet guxim.

Pa lere një herë, vogëlushë

kur mali qe fshehur nga bora,

sa brofi thëllëza nga gëmusha

më ra çekiçi nga dora.

Çdo trimi kjo na i ngjet

kur ndodh ajo që s'e pret.

Për fat, sa isha i ri

nuk nisi betejë gjëkundi,

se unë me kaq trimëri

i vija të gjithë përfundi.

Kur thonë kam zemër për luftë

Zoti atë mos e pruftë,

u them ballëhapur ta dini

se frikë nuk njoh unë trimi.

Por jeta është përvojë,

kush këmbë nuk ka të vrapojë

më pas nuk ka ç'të kallzojë...