Demir Krasniqi: ''M'rrove e t'rrova - brisku i berberit''!

Fjalë e urtë popullore shqiptare:

            “M’ RROVE  E  T’ RROVA – BRISKU I BERBERIT”!

            Kishte shkuar në një dyqan të berberit , një fshatar i varfër dhe i dërmuar nga puna e  rëndë dhe mundimi .

            Në dyqanin e berberit nuk kishte qenë i pranishëm pronari i rrojtores – berberi, por në vend të tij , po punonte një punëtor praktikant i cili atë botë quhej shegert .

            Fshatari hyri brenda në berberhane dhe pasi ia tha një “puna e mbarë” shegertit, u ulë në karrigen e rrojës dhe i tha shegertit që t’ia rruaj fytyrën .

            Shegerti ia uli fytyrën mirë me sapun dhe e rruajti me kujdes në mënyrën më të mirë të mundshme .

            Pasi e kreu rrojën , i tha myshteriut :

- Me shëndet, myshteri !

Fshatari (myshteriu ) ia ktheu:

-          O, shëndet paç e faleminderit shumë dhe ditën e mirë e bëfsh !

Shegerti:

-          Jo, more jo! S’ ka faleminderit, por paguaj paret që të rrova !

Myshteriu:

-          O, pasha Zotin, o vëlla, nuk kam para me të pagua! Po ti a po më sheh që unë jam një njeri i ngratë, i varfër dhe i dërmuar nga puna!

Shegerti:

-          Po, përse , or vëlla, nuk më tregove me kohë se nuk ke para për të më paguar? Po çka t’i bëjë unë tash Berberit (pronarit)?!

Myshteriu:

-          E po kollaj ia bëjmë. Ulu të në karrigen e rrojës dhe tash do të rruaj unë ty dhe pastaj do të barazohemi !

Shegerti u ulë dhe myshteriu e rruajti ashtu së që diti dhe i tha:

-          E  tash  jemi të barabartë . M’ rrove e t’ rrova -  brisku i Berberit !

Shegerti i tha myshteriut:

-          Po, bre po! Ama, kush ia mprehë tash briskun Berberit?!

Nga goja e popullit , shënoi:

            Demir KRASNIQI