YJET QËNDROJNË LART

HAJDIN MORINA

 

 

NË FIERZË

 

Mbi Fierzë

Nuk mund të bjerë nata

Janë bashkuar

Dy Drinët e Shqipërisë

Dhe bëjnë dritë

 

Ngjitu mbi Fierzë

Ngjitu lart në qiellin e saj

Mbi dritën mbi mjegullën tonë

 

Drini shpresën ta kaltëron

 

Drini rrjedh kaltër rrjedh një

Nëpër Shqipëri

 

As bardhë as zi

 

Drini rrjedh kaltër

Drini rrjedh një

Nëpër Shqipëri

 

 

YJET QËNDROJNË LART

 

Dhe ju mos më thoni

Ata janë pak

Se unë ju them

Ju jeni të verbër

Yjet qëndrojnë lart

Kurrë nuk do të zbresin

Në baltën tuaj kurrë

 

Dhe ju mos më thoni

Ata janë pak

Se unë ju them

Është vetëm një Diell

Dhe bota ka mjaft dritë

Është vetëm një tokë

Për të gjithë njerëzit

 

Dhe ju mos më thoni

Ata janë pak

Se unë ju them

Është vetëm një Shqipëri

Vetëm një tokë një det

Dhe vetëm një qiell i saj

Që na bën shqiptarë

 

Dhe ju mos më thoni

Ata janë pak

Se unë ju them

Ju jeni të verbër

Yjet qëndrojnë lart

Kurrë nuk do të zbresin

Në baltën tuaj kurrë

 

Dhe ju mos më thoni

Ata janë pak

Se unë ju them

Është vetëm në Promethe

Dhe mijëra vjet ikën si tash

Prometheu a Zeusi

Është më lart

 

 

ZJARRI

 

Ra flaka

Në prushin e pashuar

Në vendlindjen

E Shekullit të Ri

 

Zeusi zvogëlon Tokën

Posejdoni rrit detet

Zjarri ngjitet në Qiell

Të digjet Froni mizor

 

Sërish zjarri

Përqafimi i zjarrtë i Lirisë

Zjarri i Kosovës

Madhështi e Bukurisë