Kleriku Nikolla Marku: Janullatos nxitës i racizmit

Fatmir Popja

ELBASAN Kryepeshkopi grek Anastas Janullatos, tregoi edhe njëherë se është një antishqiptar i tërbuar. Ai shfrytëzoi në mënyrën më të turpshme ngjarjen e fundit që ndodhi në Himarë, duke përdorur dinakërinë dhe poshtërsinë që e karakterizon për ta interpretuar atë sipas oreksit të padronëve të tij". Kështu deklaroi dje kleriku i njohur i Shqipërisë së Mesme, At Nikolla Marku, prift i kishës autoqefale shqiptare "Shën Maria" në Elbasan. Ai sulmoi sërish mjaft ashpër kryepeshkopin Janullatos. Në një intervistë ekskluzive për News 24 dhe "Gazeta Shqiptare", At Nikolla Marku e cilëson kryepeshkopin Anastas Janullatos si një nxitës të racizmit në vendin tonë. Sipas tij, veprimet e qëndrimet e fundit të Janullatos lidhur me humbjen e jetës së Aristotel Gumës, ishin të pasinqerta e të pamoralshme. Ndërkohë, kleriku elbasanas pohon se politika shqiptare gjunjëzohet para dyshes Janullatos-Bollano që me deklaratat e tyre cenuan rendin kushtetues. 
Si do komentonit qëndrimin e kryepeshkopit grek Janullatos lidhur me ngjarjen e fundit të ndodhur në Himarë? 
Nuk ka asnjë dyshim që edhe një herë kryepeshkopi grek Anastas Janullatos, tregoi se është një antishqiptar i tërbuar. Ai shfrytëzoi në mënyrën më të turpshme ngjarjen e fundit që ndodhi në Himarë duke përdorur dinakërinë dhe poshtërsinë që e karakterizon për ta interpretuar atë sipas oreksit të padronëve të tij. Shqiptarët kësaj radhe e kuptuan edhe më qartë cinizmin e tij, pasi në vend të lutjes për shpirtin e atij që humbi jetën, kryepeshkopi tregoi edhe një herë se misioni i tij është nxitja e racizmit etnik. Si gjithmonë Janullatos shfrytëzoi me dinakëri rastin për të shfryrë me urrejtje gjithë tërbimin e tij ndaj shqiptarëve. Edhe mënyra, me të cilën kryepeshkopi Janullatos foli rreth ngjarjes së Himarës ishte diskredituese për figurën e një kleriku. Nuk ka absolutisht asgjë të keqe që kryepeshkopi merr kurajën të flasë publikisht për ngjarjet, por kur ai shpreh tendencë për t'i politizuar, dhe aq më keq kur kjo bëhet për t'i shfrytëzuar ato për qëllime të tjera, është e patolerueshme. 
Më konkretisht përse e keni fjalën? 
Duke kërkuar që të mos paragjykohem, dua të them se të gjithë shqiptarët e kanë të qartë se çfarë qëllimi kishte në të vërtetë kryepeshkopi Anastas Janullatos me prononcimin e tij të menjëhershëm pas ngjarjes së fundit. Në Shqipëri kanë ndodhur incidente e ngjarje tragjike që kanë tronditur botën dhe asnjëherë ky klerik nuk ka marrë mundimin të thotë dy fjalë. Mirëpo, kur ja do puna dhe kur kjo i kërkohet me urdhër nga qendra e tij e antishqiptarizmit në Greqi, ai flet me zell aq të madh sa frymëzon edhe politikën shqiptare të bëjë të papërgjegjshmin. Tashmë në Shqipëri dueti Janualltos-Bollano tingëllon kuptueshëm. Njëri ia merr në Himarë, tjetri ja kthen në Tiranë. Ndërsa, palo politikanët në shërbim të kësaj dysheje e të prapavijës së tyre dhe ata që nuk kuptojnë ose bëjnë sikur s'kuptojnë u mbajnë ison derisa u ngjiret zëri. 
Reagimi juaj ka lidhje me përplasjet tuaja të vazhdueshme me Janullatos? 
Jam për mbrojtjen me fanatizëm të çështjes kombëtare në të gjitha aspektet. Edhe në këtë rast po të gjykosh me qetësi, pjekuri e të flasësh me logjikë dyshja Janullatos-Bollano me deklarimet e tyre kanë cenuar rendin kushtetues. Kështu që qëndrimi im nuk ka lidhje me përplasjet e vazhdueshme me Janullatos, i cili kurrën e kurrës nuk ka bërë detyrën që ka si kryepeshkop. Ai injoron gjuhën dhe kulturën e kombit tonë, prandaj e meriton të përçmohet. Por, më çudit fakti që politika gjithmonë i gjunjëzohet. 
Në ç'kuptim? 
Në kuptimin e vërtetë të fjalës. Edhe së fundi po t'i hedhësh një sy komenteve të Janullatos rreth ngjarjes së Himarës, ato nuk kanë ndryshime esenciale me ato të politik bërjes me pushtet. Më qartë se sa kaq nuk mund të flitet për gjunjëzim të tyre para Janullatos, i cili e ripërsëris që është nxitës i racizmit dhe i çdo të keqeje tjetër në Shqipëri.