Janaq Pani: Bisedë e hapur me nipin

Janaq Pani

BISEDË E HAPUR ME NIPIN

Ky poemth u mbrujt me pak miell hua nga Rudyard Kipling - autori

1

Ja mbërrita të jem gjysh

e të kem një nip me halle,

e gëzuar pesëfish

shpresa ime merr një valle.

Nipi im, më lodhi jeta

nuk më la të fluturoj,

sot me ty ca të vërterta

nxitem që t'i kuvendoj.

Jo, nuk lodhem ta gjej fillin

si t'ia nis, ndaj më mbaj vesh,

gjithsekush atë fat-yllin

e ka lart përsipër resh.

Na ndrit udhën ai yll

është, o nipçe fati ynë,

qofsh me shokë, a vetëm fill

veç tek ty e drejton synë.

Ai yll e ka të shkruar

si në libër fatin tonë,

por askush s'e ka lexuar

sot e mot e përgjithmonë.

2

Njoha shumë mëndjendritur

tek i shkela udhë e shtigje,

nipçe, bota qenka ngritur

mbi ca shtylla, mbi ca ligje.

Yt gjysh sot e ndjen detyrë

të vërtetat sa kam mbartur

të t'i them, o ëmbëlsirë

çkoqur në bisedë të hapur.

Trashëguar a në letër

këto shtylla Drejtësie

vijnë që nga kohë e vjetër

si Dhurata Perëndie.

3

Prin e para Dashuria

për një vend që ka një emër,

Shqipëria, Shqipëria

do ta mbash thesar në zemër.

Fluturimthi si nositi

do të ngrihesh në qiellin tënd,

por për baltën që të priti

mbi të tjerët zemra dhëmb.

Ç'rrit me vlerë brenda teje

kudo qofsh, në fund të dheut,

kalëruar sipër reje

nipçe, ia blato Atdheut.

Dhe për njerëzit që ke rreth

veç me zemër fort i duaj,

për të tjerë që nuk i  njeh

dhembshurinë - naforë ruaj.

Mirësia - shtyllë e dytë

ëmbëlsinë i vesh fjalës

që të ngrihesh mbi mëritë

e të gjesh guxim të falësh.

Ndershmëria është e treta,

jo, nuk blihet me monedhë,

se në provë na ve jeta

prapësitë t'i shtrojm' nën zgjedhë.

Na fal jeta plot dhuntira

e na do me shpirt të bukur,

disa janë të arrira

ca të tjera rrinë strukur.

4

Krenaria të rrit vlerën

jo ajo që të verbon,

çmoje veten ti ngaherë

për aq sa e meriton.

Në çdo kohë e në çdo vend

n'u përballe me delirët,

ti inatin, si një dem

kape fort nga të dy brirët.

Veç me punë do arrish

të fitosh, jo si në lojë,

në betejë jeta të grish,

humbjet mos i ze në gojë.

Kur gjithçka të ngjan e kotë

se të shkoi kot mundimi,

thirr vullnetin të të thotë:

"Nise luftën nga fillimi!"

Dhe kur nervat ndonjë rast

do kërkojnë të ngrejnë krye

maturisht ti i bëj zap

e qëndro si të ka hije.

Në se shpifjet të kan' mrrolur

e ngulmojnë të hedhin baltë,

kur të nisësh për të folur

zbute fjalën, bëne mjaltë.

Ndodh që turma e humb fillin

e të le fajin në derë,

me ata që s'të përfillin

në mëkat, jo ti mos bjerë.

Arësyeja - gur i çmuar

lartëson njerinë e ditur

urtësisht duke gjykuar

vlerën vetes ia ke rritur...

Se dhe gjyshit ia ka ënda

të të shohë në fluturim,

brenda zemrës bën vend kënga:

" O gëzimi mbi gëzim!"