Janaq Pani: Meditim për dosjet

Janaq Pani

MEDITIM PËR DOSJET

E kisha një dosje me siguri

të tjerur nëpër vite,

o shpirti im, ndjej krenari

që veten nuk e shite.

Sa faqe nxirë, ec e gjeje

në vite e vite varg,

që ngrin e shkrin gjakun në deje

e tremb foshnjën në bark.

Një dosje pata dhe nuk e di

në është tjerrur hollë,

o shpirti im, ish trimëri

të mbetesh i panjollë.

Një dosje që e mbanin gjallë

ca "miq" edhe "kolegë",

ahere s'di kë ngjanin vallë

tani ngjajnë shelegë.

Një dosje qe, një Zot e di

tani ku është hedhur,

o shpirti im, qe mrekulli

që mbete i paepur.