Janaq Pani: Meditim i një mërgimtari

Janaq Pani

MEDITIM I NJË MËRGIMTARI

Përfundova dhe unë nga halli shtetar

i vendit bujar - Kanada,

por malli m'u bë për fyti kular

e skajin Shqipëria e mba:

Djeg e fashitet flaka e mallit,

më dhemb e i dhembem baltës e vjetër,

sytë e zemrës fshihen mbas të ballit

e ndodh të flas si i belbër.

E di, do bëhet edhe pa mua atdheu,

në mitrën e tij ka rritur breza,

nga Kryetrimi Skënderbeu

gjer te Shenjtorja Nënë Tereza.

Ndaj krenarinë lastar të mbjellë

e kam në shpirt e fort e ruaj,

te vend i largët e kam sjellë

të zbutë çastet kur nis të vuaj.