Cikël poetik nga Kalosh Çeliku

KALOSH ÇELIKU

 

PORDHA E NJË PELE

 MA PRISHI GJUMIN

 

Gjumë. Nata e gjatë me ëndrra

Hëna e plot zbret në dritare.

Xhindet më hedhin dorë më dorë majë lisave

Parajsë. Lulet më rrinë mbi kokë.

Kush thotë se Zonja Vdekje s’është e bukur?!

 

Gjumë. Nata e gjatë me ëndrra

Pordha e një Pele ma prishi gjumin...

 

 

Aferë nëpër Qytet

 

Qyteti më merr nëpër gojë

pse rri me Ty në Tavernë

e më vë pusi me verë.

 

Qyteti kurdis edhe aferë

se u mbytëm në lumë.

Kot u përpoqën tellallët

Poet jam Unë.

 

Dexhalli shpalli shpërblim:

një nënshtetësi në Xhenet:

për atë që më zë në Tavernë

me dy shtamba verë...

 

 

Rrokullisje në Qeveri

 

Kur dilni në skenë

me buzë të kuqe - pispillosur

kravata e tespihe kuqezi

ngreni duart - bythët

luani popullorçe në foltore

e rokenroll në Qeveri

natë e ditë luteni në xhami.

 

Sa bukur ua tërheqin penjtë!...

 

 

Mikes me ferexhe

 

Tre vakte i fal në ditë

e mbuluar me sako nate të zezë.

Vështirë e ke ta fshehësh bukurinë

ballin - hënë, me dy yje me vesë.

 

E Unë kur të them sa e bukur je

përgjigjesh: „ është haram

t’i shijosh frutat që kam!... „

 

 

Shtatë orë mbyllur

     në Tavernë

 

Zagushi.

Muzikë e vitit njëmijenënqineshtatdhjetedy

m’i kujton vitet e studimeve në Prishtinë.

Rrapin tim të vetmuar para „Bozhurit „.

Dhe, një dashuri...

 

Kamarieri i zi katran

Mikja trembet mos na vdes mbi tavolinë.

 

Mikja do të ikë në një shpellë

e ka lodhur jeta.

Civilizimi mes ferexheve...

 

 

Minare për ezanin

 

Vapa e ka mbyllur derën

terri nëpër dhomë e heq një valle.

Miken e kanë dhunuar fjalët.

Mëngjes. Mikja para mikrofonit

kërkon një minare ta thirrë ezanin...

 

 

Gratë besnike

 

Mikja dhe Unë mes ferexheve

bëjmë dashuri nën Rrap.

Ku dinë ç’është dashuria

të mjerët që i tredhi Partia

për një kolltuk, një apartmant.

 

Mikja dhe Unë te Shadërvani

e mbyllim sonte Natën nuse.

 

Ku dinë oborrtarët - hadumë

ta kosisin Livadhin:

që s’duan tjetër veç Partisë.

 

I tradhtojnë gratë besnike...

 

 

Nata e fundit

 

Më e bukur kurrë s’m’u duke

se atë natë kur më ike

u arratise mes ferexheve

për një gotë verë

për një poezi.

 

Më e bukur ishe asaj nate

kur para Agimit bëmë edhe një luftë

e nuk i thamë njëri – tjetrit:

Lamtumirë... 

 

 

Shenjë Zotit 

 

Nata i vari ibrikët. Shtambat

Shën Gjergji flinte nën Rrap.

Unaza Yte gjarpër e ngriti kokën

E zbuta me sy. E nxorri gjuhën.

Zingjirka Yte në qafë. Magji

E argjendtë që mi çmendi poezitë.

Vjeshta është grua vejushkë. Brymë

Që djeg pemët. Lulet. Mua kaçakun

Duke pritur lindjen e Diellit. Agimin.

 

Unë nuk jam poet. Bohem i vonuar

Përderisa nuk të zgjidh nga zingjirët.

Magjitë. Dhe, i dërgoi shenjë Zotit…

 

 

E përcjellim Ditën

 

E di, Ti je e çmendur. E egër

Edhe unë jam i çmendur. Ujk.

E përcjellim Ditën. Natën

Matanë, me verë. Dhe, poezi.

 

Ebu Xhehli vjen e të pyet :

Nga e kemi Mikun. Asganin.

Ti heshtë para shtambave me verë

Miku i përgjigjet: nga do ti të jem?!

 

Ebu Xhehli thotë: kjo tokë është e mallkuar

Miku i përgjigjet: nuk është ashtu. Gabon.

Ebu Xhehli mbledh plaçkat. Frikën

Dhe, si këlysh del për dere. Veshëprerë

Me bishtin nën këmbë. Ikë.

 

Ne vazhdojmë ta përcjellim Ditën. Natën

Te “Hani i Dy Robertëve”. Rezidenca

Me koçi e krushka matanë Atdheut…  

 

 

Nuk e di 

 

Nuk e di ç’kisha bër për Ty. Nesër

As Ti për mua mbi varr. Rrëzë Çukës.

Natën e gjykimit kur do më merrnin në pyetje

Pa dy shtamba me verë. Rrapin.

Dhe, pa Ty. Qiririn e ndezur mbi kokë

Zonjën Vdekje me të cilën ngrita dolli.

 

Nuk e di. Vërtetë, nuk e di. Nesër

Kush cilin do ta ngrente nga varri…

 

 

 Mëngjes i Ditës

       së pestë

 

Mëngjes i Ditës së pestë. Turpfitoreve

Bërllok ende më hedhin para Shtëpisë.

E kanë mbuluar gjelbërimin. Parkun

Veranda ime me parje në hedhurina.

Shteti nuk mërzitet. Qeveria sakate

Partitë politike çdo katër vite zgjohen

Dhe, vinë gjatë zgjedhjeve parlamentare.

 

Bërllokun ende ma hedhin para Shtëpisë

Trusakatët me gojën plot fe - demokraci.

 

Dhe, presin të shpërngulem në Turqi...

 

 

Rihabilitim i Dexhallit

 

Dexhalli e heq vallen artistike

në një Akademi solemne

me Kopenë e vet komuniste.

 

E ndjekin hap pas hapi:

Dumdumët, rrumaducët

Faqekuqët e poetucët

se mos i bien udhës...

 

 

Dritë e ndezur

 

Ditën vdes, natën zgjohem jerm

kështu jetoj me ZonjënVdekje

në një dhomë me ditë, muaj e vite

e kurrë s’u lodha mes librave.

 

E ndez llambën, vjen Vdekja

i them: prit ta shuaj dritën!

Ajo pret matanë hekurave

Unë harroj ta shuaj dritën.

 

Zemrohet, ikën më lë për nesër...

 

 

Kush do më shpie në varr

 

Gjithë natën vras Veten

mes librave, bocave me verë

në mëngjes e ringjall.

 

Gjithë natën vras Veten

e s’ka njeri të më shpie në varr...

 

 

E pashë Vdekjen

     në Voskopojë

 

E ndeza një qiri në kishë. Voskopojë

Meshë bëra me poetë. U luta për Ty.

Matanë flakës e pashë Zonjën Vdekje

Buzëqeshi. Edhe ma bëri me sy.

 

Ia ktheva përshëndetjen. Buzëqeshjen

Edhe për Të ndeza një qiri.

E ngrita me fund një gotë raki…

 

 

Ditë e bukur

   për vdekje

 

Nesër, kur do të kthehet Moti i Madh

E do të na e hapë kafazin drejtë maleve.

Poeti do t’i hipë këngës, shalojë vargun

Penën do ta shkrep në Hënë. Diell.

Zgjohuni! Nisuni burra drejt varreve!

 

Nesër, kur do të kthehet Moti i Madh

Nisuni! Është Ditë e bukur për vdekje...

 

 

Zonja Vdekje nuk më deshi

         në Qafë Thanë

 

Edhe një herë erdha nga mesi i të vdekurve

Shkaku: premtimeve. Borxheve ndaj Atdheut.

Ende nuk e fitova Lirinë. Gruan besnike

Hajmalinë e Baba Shehut në Baba Tomor.

 

Edhe një herë erdha nga mesi i të vdekurve

Shkaku: premtimeve. Borxheve ndaj Atdheut.

Zonja Vdekje, në Përrua. Në Qafë Thanë

Përsëdyti më bëri remont ta vazhdoj jetën.

 

Edhe një herë erdha nga mesi i të vdekurve

Zonja Vdekje, nuk më deshi në Qafë Thanë...

 

 

Testament para Vdekjes

 

Ebu Xhehli më pret te xhamia

e di, do të më shpjerë në Xhehenem.

E Unë do ta lë me testament:

të më përcjellin rrugës pas Çuke.

 

Mike, shqyeji daullet e ciganëve

poetë, mbani një minutë heshtje

para dy shtambave me verë

sa ta mashtroj Ebu Xhehlin

t’i futem tinëz në Xhenet!...

 

 

Kohë do të ketë

        për takime

 

Mos u shtyni me bërryla. Dhe, bythë

Vend ka për të gjithë në Ferr. Parajsë.

Pas dere nuk do të mbesë njeri

Dikushi arnë kazani. Dikushi qen.

 

Mos u shtyni me bërryla. Dhe, bythë

Kohë do të ketë për takime. Ferrparajsë...