Vullnet Mato: Arkeologu

Vullnet Mato

A R K E O L O G U

Ai zbret ngadalë

në botët antike,

në qytetërimet e lashta

që i ka mbuluar toka,

nëpër vringëllimat e armëve,

marshimet e ushtrive,

si çlirimtar i errësirave

mes brohoritjes së kohërave.

Çapi i ngadaltë

dhe spatula e tij,

zgjidh pranga skllevërish nëpër varre.

Të gjithë kërkojnë të takohen me të.

Skeletet ngrihen

e shkunden prej plagëve.

Teksa ulet në tryezën e gurtë me Agronin,

Teuta hijerëndë e fton mysafir.

Batua kryengritës e pret i dëshiruar

mes trimave shigjetarë të shtetit Ilir.

Ai takohet me të tërë

si ambasador i kohës se re,

akredituar në të gjithë shekujt

e lashtësisë pa porta.

Është dora e kohës sonë

që zgjatet përzemërsisht

dhe vendos lidhje me të gjitha kohërat.