Vullnet Mato: Efekti nxitës i bukurisë femërore

Vullnet Mato

EFEKTI NXITËS

I BUKURISË FEMËRORE

Nga gjurmët e paleolitit

dhe gërmimet mesjetare,

nëpër thellësitë e mugëta

të prehistorisë njerëzore,

vjen me statuja mermeri

dhe gravura murale

imazhi mijëravjeçar

i bukurisë femërore.

Nga rrënojat e Trojës,

Egjiptit dhe Mesopotamisë,

bashkë me emra dijetarësh

e shpikës të kësaj bote,

vjen dhe figura e shquar

e bukurisë së lashtësisë,

që sjell personalitetin

e femrës bukuroshe.

Sepse frymëzimi fuqidhëns

që djersiti në krijim

artistët më të talentuar

të fantazisë botërore,

luftërat dhe fitoret

e mëdha për përparim,

u nxitën nga bukuria

e magjishme femërore.

Beatriçja, Dea,

Kleopatra apo Helena,

vunë në punë

penat, brushat, daltat skalitëse,

ku ylli simbol i tyre

u bë femra,

me imazhin e pavdekshëm

të bukurisë mahnitëse.

Këtë bukuri ne e ndjekim

si hënën në qiell,

kur vesh fustanet e reve

dhe vë yjet stoli

kur me aq kujdes u bën tualet

buzëve dhe syve

të përcjellë efektin e bukurisë

në përjetësi...