Cikël poetik nga Suzana Kuqi

Suzana Kuqi

Cast

I humbur mendimi im

në labirintin memec të heshtjes tënde...

Mundohem të të vjedh pak nga ata sy

të qetësoj shpirtin që më përpëlitet brenda...

Ndoshta, gënjehem si valët që rrëmbejnë një rreze mbi shkumë

e rendin t'ja çojnë bregut me të shpejtë e plot vrull...

… I humbur... hutuar mendimi im

në morinë e fjalëve që ti bluan në heshtje

nuk të dalin nga buzët, nuk ja beson as erës...

Një skifter shkëputet lartësive e një pëllumb

pranë këmbëve më bie...

… gjak i kuq mbi gjoks të bardhë,

era ja ngrë puplat në një fluturim që nuk është i tiji...

… I ethshëm

i ethshëm mendimi im në kërkim

të gjërave të çmuara që ruan me xhelozi në log të zemrës

Përgjërohem... përgjërohem e lus qiellin të jem dhe unë aty...

Se të dua...  Se të dua siç duhet jeta kur të lë pa pritur e

pa të lajmëruar...

...gjak i kuq mbi gjoks të bardhë... në sy një fluturim i munguar...

Prapë në udhëkryq...

Dhe jam përsëri në një udhëkryq...

Dëshira, mëkatin e virtytin

i mbars e i lidh në një kërthizë...

murgeshë e mëkatare

më kacafyten në çdo qelizë

teksa një ëngjëll e një demon në pritje

shqyejnë qiellin së qeshuri

mbi kryet e mi...

Këmbët e murgeshave

Kush i ka parë këmbët e murgeshave

farfurima që sfidon najlonin e çorapes

sensuale nga mbaron këpuca

e  nis poshtë gjurit fundi i fustanit

klithmë njerëzore që gjen rrugë

e i shpëton veladonit...

Sensuale duken këmbët e murgeshave

mbase...

se i janë premtuar qiellit

mbase...

sytë na i ka lodhur zhveshja...

Mendim i çartur

Sepse mendimi im të rrok përtej

përtej qiellit që e gervishin kryqe

madje

përtej ku ai shkon  të bjerë në gjumë

(vallë ku shkon të flejë qielli)

sa lotë i fala erës të të ndjekë

e pashë se asgjë...

asgjë nuk thahet më shpejt se loti i ëndrrës

që tjerret me mua në një pritje

herë të vogël sa unë

herë të pafundme sa malli që rrok diellin...

mendim i çartur

i urtë dhe i çmendur si universi...