Dibran Demaku
NË MBAMENDJEN E KOMBIT
(Hasan Mekulit)
E kërkova Hasan Mekulin
rrugëve të Prishtinës
dhe askund nuk e gjeta
emrin e tij
Tek liqeni i Plavës
një peshk si i përrallës
deshi diç të më thotë
por...iku me not
Në Gusi tek shkolla
çelur lule-molla
e pyeta një Pip
nuk më foli shqip
Më thanë kërkoje
në Fakultetin Filologjik
aty ku shpaloste
Epin e Gil Gameshit
dhe fliste shqip
me Homerin dhe Eskilin
E kërkova në Bibliotekën kombëtare
ku ai bënte luftë
me ujqër e dhelpra
ishte kohë lehonë
kur edhe dita pillte gjarpërinj
Më thanë kërkoje
në parathënie librash
në faqet e "Jetës së re"
ishte pishtar i dijes
krenar aty e ke
E kërkova profesorin
e ku nuk e kërkova
dhe e gjeta...
në mbamendjen e kombit
AI E DINTE NJË FJALË PREJ GURI
(Azem Shkrelit)
Ai e dinte një fjalë prej guri
dhe me të fliste shpesh
se vet ishte gur i rënd Rugove
Ai e dinte një fjalë prej guri
e shkëmb e fortë ishte zemra e tij
kur bisedonte me burrat e Shkrelit
Ai e dinte një fjalë prej guri
se edhe ëndrrat i kishte të gurta
e rimat e strofat i lindnin të flamurta
Ai e dinte një fjalë prej guri
xhoksin e kishte xhamadan guri
Edhe në amshim i qesh nuri
Ai e dinte një fjalë prej guri
me lisat e fisit një plis Rugove
shpresë ndritur, dëshirë bardhë-Kosove
https://www.zemrashqiptare.net/