Kostaq Duka: Motive në prag fundviti

Kostaq Duka

Motive në prag fundviti

Ngutje

-Meditim në fund dhjetori-

Ngutje….
Një nxitim, në tejikje….
Nguten
Të dashuruarit e ndrojtur
Fjalën magjike : të dua
Ta thonë si të mundin,
Veç ta thonë
Në çastin e këputjes së vitit……

Nguten
Borxhllinjtë e ndershëm,
Paranë ta kthejnë
Me shpresë që e nesërmja
Ti bëjë dhurues për të tjerë ….

Nguten
Mashtruesit; hajdutë ,vrasës, politikanë
“Lojën” ta mbyllin
Në hapjen qelibare të vitit të jenë “ëngjëllorë” .

Ngutje, ngutje
Një nxitim, në tejikje….
Një pacient kanceroz
Pranon operacionin
Kundërshtuar 364 ditë të vitit.

Një shkencëtar
Ngulmon
Kur sekondat e fundit godasin si vare
Formulës magjike t’i japë lirinë e zgjidhjes…

Ngutje, ngutje
Një nxitim në tejikje.
Keshtu ka për të ndodhur gjithnjë
Sa kohë ndërgjegja njerëzore
Kultivon përtëritje.

Marrëzi dhjetori

364 ditë
S’i mjaftuan
Vajzës që ëndrrën ndillte t’i thosh: Të dua.
364 ditë
Veç në dialog të paprerë e takime imagjinare
Mijraherë sajuar.
Të dua, të dua, të dua
Në mëngjes, në mesditë, natën vonë dhe në gjumë.
E përsëri
Gjithçka mbetej fillim.
Veç vajza e brishtë , djallëzore
Shikimin ia hidhte tërë dritë e shkëlqim.

Dhe në të 365-tën ditë
Portën dimërore të mëngjezit e hapi ngultas si i marrë
Mes dëborës që tallej me një qeshje të bardhë.

Rendi
Ku ajo shkeli një vit të tërë
Rendi e rendi pas gjurmëve të saj
Gjersa mbeti i ngrirë
Statujë para saj diku në një qoshe, në rrugicë
Duke shkrirë akujt e buzëve
Me fjalët që digjeshin së brendëshmi: të dua, të dua!

E dashura ime e parë ishte bora

E dashura ime e parë ishte bora.
Prej saj mbi flokët kaçurrelë pata ledhatimin e parë,
puthjen mbi buzë
ëndërrimin në pafundësi të bardha qiellore.

E dashura ime e parë ishte bora,
Lozonjarja tekanjoze që vinte e ikte pa fund
Sa nisja ta përkëdhelja e përkëdhelja gjer në lëmim e shkëlqim
Ajo tretej e tretej pafundësisht duke u bëre ujë….

E dashura ime e parë ishte bora.

Tani vjen e ikën.
Më bën të mbyll sytë, të risjell atë çast kur mbeta rob i saj
I dashuruar……. ndonse fëmijë.

Zemra Shqiptare

Kostaq Duka: Motive në prag fundviti