Albina Idrizi: Sot dua të kënaqem

Albina IDRIZI

SOT DUA TE KENAQEM

O njerëz
Ju te vuajturit
Të varfërit
Më të dashurit e mij
Më ndjeni
Më falni oh, ju lus
Sot ndjehem e mbushur lumturi
Dhe s`mund të rri
Pa parë këtë diell
Tek shëndrit
Më shumë se çdoherë
Këto lule kaq bukur veshur
Kanë qenë vallë
Këtu çdoditë!?
Më e fortë nga juaja ofshamë
Më vjen këngë e zogut
Qiellit të paanë
Më ndjeni prandaj
O më të dashurit e mij
Sot dua të kënaqem
Të ndjej, të çmallem
Me afshin e mbledhur ndër vite
Të ngopem, të zbrazem
Sikur vetëm ta dinit
Si ndjej jetën tek pulson
Edhe në më të imtën gjallesë
Për të cilën as kam ditur
Se me ne rron
Sikur vetëm ti shihnit këto ngjyra
Atje në sfond jete
Qoftë vetëm për një çast
Sa të kuptonit këtë dehje
Sikur vetëm të ndjenit
Si kthehet si me magji
Erë e fortë cunami
Në më të lehtën puhi
Më ndjeni
Të vuajturit
Të varfërit
Hallemëdhenjtë e mij
Falmani këtë ditë
Sot dua, sot dashuroj
Nesër do të kthehem prapë
Me ju të qaj, të lotoj.

Zemra Shqiptare

Albina Idrizi: Sot dua të kënaqem