Cikël poetik nga Hajdin Morina

BISEDË E MUNDIMSHME ME AZEM BEJTËN

Ti luftove për Arbëri
Kundër Serbisë së Parë
Kundër Serbisë së Dytë
Nuk luftove për demokracinë
Me liri të terratisur
Ç’faj tjetër ke bërë o Azem Bejta

Dëgjomë të lutem dëgjomë o Trim
Kanë ndryshuar format e dashurisë
Ndaj Atdheut tonë të moçëm
Janë zbuluar pamje të tjera
Për lirinë për Kosovën për Shqipërinë
Me ndihmën dhe kontributin e pakursyer
Të ekspertëve specialistëve dhe analistëve tanë
Dhe të atyre ndërkombëtarë
Ti Azem nuk i njeh rregullat e reja
Për lirinë e veprimeve demokratike
Për lirinë e integrimeve

Mbi varrin-shpellë dritë ndër shekuj
Kulla jote e vrojtimit
Plot Liri e guxim më mbush
Mbi Kosovë kur e lëshon vështrimin

Gjithnjë rritet trimëria jote
Kënga e Kosovës thirrja e shokëve
Mbështjellë me ajrin e Arbërisë
Me prushin e legjendës
O prite prite Azem Bejtën

VENDIM

Duke mos u mbështetur
Në asnjë Ligj të Drejtësisë
Në asnjë nen
Në asnjë pikë të nenit
Marr vendim t’i dua njerëzit
Marr vendim ta çmoj Lirinë
Dhe atë gjak- rrënjë të saj

Duke mos u mbështetur
Në asnjë Kushtetutë
Marr vendim ta bëj
Një buzëqeshje të fëmijës
Me zjarrin e yjeve në qiell

Duke mos u mbështetur
Në asnjë Legjislacion
Marr vendim të rri me kafshët
Të bisedoj me to
Nuk e di për sa kohë
Nuk e di për sa kohë

VONË

Të ishte shkruar më herët fjala
Më herët të ishte pjekur në pllaka dheu

Të mos i kishin djegur
Të mos i kishin vrarë librat

Si qielli të paprekshme
Të pashkelshme do të ishin
Hapësirat e lirisë
Dhe krojet e gjakut

Zemra Shqiptare

Cikël poetik nga Hajdin Morina