Këze (Kozeta) Zylo: Më zuri gjaku…

Këze (Kozeta) Zylo

Më zuri gjaku…

O nxënësit peng të Atdheut tim,

Sa afër jemi dhe sa larg,

Lëvozhgë e territ ju mbështjell sytë,

Oh, c’sy të bukur, plasin gjak!

Zemra juaj,

Brenda rrethit të gjaksit,

Regëtin pa faj!

As qeshni as qani,

U rritët pa zërin e gjysheve,

Në vend të tyre, krisma e hasmit…!

Ti Perëndia ime,

Më trego rrugën si shkohet në Parlament,

Të marr prej dore ëngjëjt e gjakosur,

Dhe të izoloj ligjet e tyre,

Të çngjyrosura nga veremi i shekujve!

Ju Parlamentarë,

Dëgjoni ofshamat e fëmijëve,

Nëpër mjegull nate,

Dhe ndiqni udhët e rrëkeve të gjakut,

Për të ndaluar përmbytjen e madhe,

Të tokës sime,

Nga Antarktida me akuj të kuq.

Ndërsa mua mos më gjykoni,

Me ligje të çmendura,

Që më viktimizuat,

Pa u ngjitur me ëngjëjt në Foltore,

S’mund të shkruaj më,

Më zuri gjaku…!

Manhattan, shtator 2009

Zemra Shqiptare

Këze (Kozeta) Zylo: Më zuri gjaku…