http://www.zemrashqiptare.net/
Zemra Shqiptare

Sejdi Berisha: E Ti nuk vjen...!
| E Diel, 08.07.2018, 09:59 AM |

Sejdi BERISHA:

 

E TI NUK VJEN...!

 

Këto vargje tash i kam shkruar

Nuk e di dje apo pardje

Nuk më kujtohet

Nuk po t’i them për të lënduar

Por TY po t’i këndoj

Në lumturi për të të shndërruar:

 

Sa afër jemi e nuk takohemi

Mos i mallko kujtimet

Se përqafimet tani janë ndryshe

Telave të violinës së vjetër u ngjajnë

Tani përcëllojnë më shumë

E nëse njëri-tjetrit

Vetëm dorën ia shtrëngojmë

Ledhatimet

Ndoshta i çmendin netët pa gjumë...

 

Sa afër jemi

E Ti nuk vjen

Shikimi më ngelet

Si etje në shkretëtirë

 

Mos harro

Çdo kujtim stinën e vetë e ka

Që mund t’i shembin

Që mund t’i forcojnë kohërat

Që mund t’i grisin ato letrat

Ndoshta të kujtohen

Ishin më shumë se dhuratë Zoti

Ishin këngët tona

Ishin sytë e mi

Vetëm Ti

Madhështinë e lumturisë për ta shijuar ...