http://www.zemrashqiptare.net/
Zemra Shqiptare

Qazim Shehu: Mbeta pa të
| E Marte, 08.08.2017, 07:11 PM |

DHE MBETA PA TË

 

QAZIM SHEHU

 

Dorë e femrës nuk është dorë Kleopatre

Po një lule që mbin prej vatre;

Ajo është rreze mbrëmje mbi ujë

Për të shuar një gënjeshtër pa bujë,

Dorë e fatit është dorë e femrës

Regëtimë e parë e zemrës,

Dhe është kaq delikate

Këputet si një gjethe prej flake,

Bisht fshikullues palloi

Bie mbi një manushaqe,

Stërvitur për t`i kapur burrit

Kaq të pathëna që i shfaqen gjumit,

Dhe është aq e dashur kur ngrihet në ajër

Veç për ritakim,ndoshta dhe për ndarje,

Dora e saj,nazike,lëkundëse plot trill,

Mugullon si ngjyrë e vjedhur në prill.

Më zgafullon e më tundon,

Më grish e më mjeron,

Për një dorë dhe vetëm një

Që s`dita ta shtërngoj e ta tërheq

Dhe mbeta pa të...

 


TËHUAJSIM


Në gotën e të qeshurës tënde

Shpirti është ujë vorbullues,

Ti këtë gotë s`e ngre,

dhe shpirti më kthehet pus.

Derdhet e qeshura jote hapësirës

Në orgazmën e motit të moshës,

Dhe shpirti im copra copra mblidhet

Për të ringritur një monument të panjohur…

Dhe paskam gabuar kur thashë

Se shpirti im je ti,

Sado e përsërisim këtë fjalë të lashtë

Ajo ende s`na sjell mërzi.

 

 

JETA QË SHKET PËRBRI

 

Dielli, ky zotëri fisnik i përditshëm

Na ngroh largësitë e paarritshme

Ato zhyten në paqartësi,

Si një kod që kyçet

Në enigmat e jetës që shket përbri…

Breshëri i kohës i mjegullon,

Ose nojma largësi,

Në do çfarë të tundon,

E tashmja që zbrazet

Nga lëngu i damarëve derdhur në hi?

 

 

MINUS DASHURIA

 

Shi mosrealizimi

Orë takimi,

Indiferenca

Sëmundje plaku,

Dembelenca

Pa turbulencë.

Një aktdhënie është jeta

Një rikthim

Në breshër,

Shi.

Një stacion bosh

Mjekër  rritje

Pritjesh.

Dhe deri më tani

Thashë

Atë që më thotë

Vetmia:

Orë e takimit

Stacioni…

Dhe e treta?

Minus dashuria…

 

 

UJËVARË

 

Ato nuk e dinë si ujëvarojnë ndjenjat tona

Dhe bien e gërryejnë

Veten dhe atë që na do.

Do ndalnin ndopak vërshimin

Për të mos i imituar ato…

 

 

E FTOHTA PËRVËLUESE

 

Harbime kokëshkreta

Në një viskozitet yjesh

Merr frymë jeta.

Kur yjet dritën qartësojnë

Pa pasur faj ç`ndodh poshtë tyre,

Nga helmet e tokës që e teprojnë

Nga një zili ëndërrtare e syve,

Ata ngihen më lart e shkojnë

Në pafundësi të qiejve

Atëhere e ftohta e tyre na përvëlon

Në eshtrat e fërgëlluara prej harbimeve…

 


MBARIMFILLIMI

 

Mbaron teknologjia

Malli jo,

Mbaron venitet çdo gjë

Atëhere malli fillon,

Për të treguar se ku mbarohet

Diçka tjetër ka filluar.

Lojë fjalësh?

Mbase.

Malli -burim

Fshihet poshtë një rrase.

Dhe kush e gjen

Etjen nis me shuar,

Burimin s`e rrëfen…

 

KONTRAST

 

Të varfër ishim dikur,po pse atëhere kishim

Më tepër dashuri?

Dhe rrobat i kishim me pakicë

Me arna të qepura në gjunjë

Në mëngë.

Po pse s`na vinte rëndë?

Sot vajzat i shqepin pantallonat

Dhe i arnojnë

Për modernitet.

Për  krenari

E modë…

Po shpirti pse na u ftoh

Dhe pse u bëmë më të ftohtë?

 

 

KULPRA

 

Ajo ngjitet rreth e rreth lisit

Përdridhet aty e ligjshme

Se kulpër është,

Dhe e ngishme.

Po kur kulpëron një trup femre

Për të ndezur hiret e saj

  vështrim të meshkujve,

Kur kulpërojnë sa e sa njerëz

Veten në  lisin e fjalës

Kulpër s`mund të jetë,

Po ajo kulpër është.

Kaq e dredhët

Kaq e shëmtuar,

Po kaq e aftë

Pamjen e vet

Për ta injektuar…