Idriz Zeqiraj: Komandanti i Rugovës
| E Marte, 27.01.2015, 08:32 PM |

KOMANDANTI I RUGOVËS DHE SHPËTIMTARI I POPULLATËS TË DUKAGJINIT

SHKRUAN: IDRIZ ZEQIRAJ

"Ata që po i vret UÇK-ja, po i vajton LDK-ja." Kështu ka shkruar një kuadër i lartë i PDK-së, vite më parë. Duke qenë kuadër i PDK-së, parti e cila e identifikon vetën me UÇK-në, atëherë, më sakt, duhet thënë: "Ata që po i vret PDK-ja, po i vajton LDK-ja". Ky vetëdenoncim, madje me shkrim e publik, në njërën nga gazetat e ekstremit të majtë, është një fakt domëthënës, sepse, siç thonin latinët e vjetër: "Verba volant, scripta manent", e thënë shqip: "Fjalët fluturojnë, e shkruara mbetet".

Nisur nga ky vetëdenoncim publik, organet kompetente të Kosovës, duhej të fillonin hetimet. Dhe, nëse këtë nuk e bënë organet e sigurisë dhe të ligjit, atëherë, këtë fakt tejet domëthënës duhej ta aktualizonte LDK-ja në organet e larta të Kosovës, si Parlamenti, Qeveria, UNMIK-u dhe deri ke Qendrat Ndërkombëtare të vendosjes. Sepse LDK-së po i vriteshin kuadrotë, veprimtarët e saj, oficerët dhe komandantët ushtarakë institucionalë, të cilët bënë luftën e Kosovës. Në mesin e tyre ishte edhe Smajl Hajdaraj, kuadër i LDK-së dhe Komandant i Shtabit Rajonal të Rugovës.

Smajl Hajdaraj u lind më 1951 në Dugaivë të Rugovës. Shkollën fillore 8 vjeçare e kreu në Rugovë, për të vazhduar Gjimnazin, drejtimin shkencor, në Pejë, të cilin e përfundoi me sukses të shkëlqyeshëm. Fakultetin e Inxhinierisë, dega e elektroteknikës e mbaroi në Prishtinë, për të qenë, së fundi,  në prag të magjistraturës.

Smajl Hajdaraj u lind dhe u rrit në shtëpinë konak të Arif Rekës, ish i burgosur politik për 9 vjetë radhazi në burgun - ishull të Goli Otokut, së bashku me: Haxhë Kerin, Cufë Sokolin, Bajram Ramën, Sylë Mehmetin, Azem Jakupin, Ali Hysin, Bajram Haxhinë dhe rugovas të tjerë. Nga kjo familje regjimi mbretëror jugosllav kishte pushkatuar 4 meshkuj. Gjyshi Reka, me të vëllanë Adem Smajlin dhe kushërinjtë Hajdarin e Bajramin, morën pjesë në mbledhjen e Junikut neutral, krahas burrave të shquar të Kosovës.

Në këtë trung bazal familjar, Smajl Hajdaraj mori një edukatë sipërore morale dhe atdhetare. Qysh si gjimnazist u shqua në disa veprime, siç ishte sigurimi dhe shpërndarja ndër shokë të literaturës, e cila për regjimin përbënte blasfemi kundër pushtetit. Pikërisht, për rrjedhën familjare dhe sjelljet e tij të dyshimta, do të kishte shumë telashe me profesorin e gjuhës serbokroate.

Smajl Hajdaraj punoi mësimdhënës në Shkollën Teknike "Shaban Spahia", më 1977-79, më vonë si bashkëpunëtorë i jashtëm.

Pastaj punonjës i KEK-ut, shef i Distribucionit.

Në vitin 1990 ishte nga të parët që largohet nga puna, meqë ishte themelues dhe kryetar i Sindikatës të Pavarur në ish organizatën punuese "Elektrokosova" në Pejë.

Në një mandat 4 vjeçar ishte kryetar i kësaj organizate për të gjitha distribuimet e Kosovës.

Edhe aktiviteti politik i Smajl Hajdaraj është i begatë:

- Anëtar i LDK-së që nga themelimi i saj;

- Kryetar i Aktivit në Vendlindje;

- Sekretar i Nëndegës të LDK-së për Rugovë deri në vitin 1997;

- Kryetar i Nëndegës të LDK-së për Rugovë;

- Komandant i Shtabit Rajonal të Rugovës;

- Kryeshef i Operatives në Brigadën 136 "Rugova".

Pas luftës i kthehet profesionit të inxhinierit dhe aktivitetit politik si dhe ndërtimit të vendit.

- Në zgjedhjet e para lokale, të pas luftës, zgjidhet deputet i Asamblesë komunale në Pejë;

- Anëtar i Komitetit për politikë dhe financa;

- Deputet në Parlamentin e Kosovës, legjislatura e parë.

Pas plot 38 ditësh jete parlamentare, më 17 janar 2002, në hollin e hyrjes të banesës të tij, në lagjën "Fidanishtë" të Pejës, ekzekutohet në një pritë mirë të organizuar nga njerëz të panjohur. Kanë kaluar plot dhjetë vjetë nga vrasja e trishtme e trimit Smajl Hajdaraj dhe ende nuk është bërë asnjë hetim serioz, nuk është arrestuar askush.

Kur Smajl Hajdaraj themeloi Forcat e Armatosura në Rugovë, duke përcaktuar edhe konturet e reziistencës, kishte kontaktuar me Njerëzit e Rrafshit të Dukagjinit, për ta koordinuar luftën. Si epror institucional, Smajl Hajdaraj mbante kontakte të rregullta, me ministrin e mbrojtjes Ahmet Krasnqi. i cili aplikoi taktikën dhe strategjinë e luftës të Kosovës, me komandantin e Zonës të Dukagjinit, kolonel Tahir Zemaj, sepse respektimi i shkallës hierarkike në luftë, është bazë e zbatimit të ligjeve të luftës, larg anarkisë dhe bashibukizmit, siç ndodhi në kampin tjetër, atë të UÇK-së të SHIK-ut, të cilët, me veprimet banditeske, gjatë dhe pas luftës, tani po përballën me arrestime, hetime, gjyqe, dënime, burgosje.

Smajl Hajdaraj, si epror i formacionit ushtarak të krahinës të Rugovës, ishte i hapur dhe deklarues publik se i përket organizimit institucional dhe njeh për Komandant të Përgjithshëm të forcave të Armatosura, Presidentin e Kosovës, dr. Ibrahim Rugova.

Smajl Hajdaraj ishte admirues dhe zbatues i pahezitueshëm i vijës dhe filozofisë rugoviane, madje i gatshëm për çdo detyrë, deri në sakrificë.  Pas luftës ishte i pari që hapi zyrën e LDK-së në Pejë, në një kohë që "këmerët e kuq" të Lëvizjes, me shantazhe e terror, ishin dyndur në tërë Kosovën dhe pak kush guxonte të shpërfaqej si përkrahës i dr. Rugovës. Në mjediset e afërta me dr. Rugovën, është e njohur afria dhe përkujdesi i Smajl Hajdarajt për kryetarin Rugova, madje në momente të vështira ekonomike, duke i ofrua ndihmë materiale për Familjen Rugova. Përkujdesja e Smajlit nuk mungoi as për sigurimin e financave për udhëtimet, organizimin e siguris fizike të Presidentit Rugova si dhe blerjen e një mercedesi të blinduar. Dhe, e gjithë kjo shton dyshimin e bazuar se përbën një arsye më shumë për vrasjen në pusi të trimit Smajl Hajdaraj.

Nga ekspozeja e bërë rezulton se Familja Hajdaraj për një shekull ka rezistuar, është përgjakur, duke dëshmuar atdhetarinë e saj. Edhe Smajl Hajdaraj, në vazhdë të traditës familjare, është shquar si punonjës shkencor, kuadër drejtues dhe komandant i luftës. Atëherë shtrohet pyetja: Pse duhet vrarë kuadri i LDK-së, komandanti ushtarak i Rugovës, dhe deputeti i Parlamentit të Kosovës, Smajl Hajdaraj?!

Përgjigjen pse duhej vrarë Smajl Hajdaraj me shokë, e ka dhënë njëri nga SHIK-asit vrasës, por i penduar: "Porosia ishte se duhej vrarë x-y-ni, për ta marrë pushtetin në atë komunë. Nëse Istogu kishte 70 % të votave për LDK-në, Theranda e UKë Bytyçit printe me 72 % të votave. E sigurtë ishte edhe Klina e Ismet Rracit. Por, edhe Peja nuk do të ishte në këtë katandi, po të jetonte sot Smajl Hajdaraj. Të gjitha vrasjet politike në Kosovë, kanë një emërues të përbashkët: marrjen e pushtetit me dhunë e terror fizik dhe psikologjik.

Kush e vrau Smajl Hajdaraj me shokë, është një pyetje tjetër, e cila nuk mund të tejkalohet duke e heshtur. "Edhe këtë përgjigje e ka dhënë kuadri i lartë i PDK-së, duke denoncuar: "Ata që po i vret UÇK-ja, po i vajton LDK-ja". Edhe vajtimi është i saktë. 1000 kilometra rrugë ardhje e vajtje, për mua me shokë nga Bavaria e largët, për të qenë pjesë e këtij vajtimi të madh. Dhe, këtë rit e bëjmë për më shumë se një dekadë radhazi. Por lindë pyetja: Cila UÇK-e vrau Smajl Hajdaraj. Ajo që Smajli i komandonte formacionet e saj, apo një UÇK-e tjetër, e ideuar dhe e themeluar në vilat e Bllokut të Tiranës, nga zyrtarët partiakë dhe Sigurimi Shqiptar.

Përgjigja e prerë është se vrasjet i ka bërë kjo, UÇK-ja e dytë, UÇK-ja e SHIK-ut, e themeluar enkas për marrjen e pushtetit me dhunë. Andaj edhe krimi politik nisë në Tiranë me vrasjen e gazetarit Ali Uka, ministrit Ahmet Krasniqi, zhdukja pa gjurmë e oficerit Sadri Ramqaj, vrasja e Ilir Konushevcit, së bashku me doktorin vendor Hazir Mala, vrasjen në pritë të Rushit Elezit kukësian, aktivist i Emergjencës të luftës dhe të tjerë. Është kjo UÇK-e që iu shmang luftës kundër pushtuesit, për çka i akuzon edhe shefi i shtabit, Sylejman Selimi, duke shtuar se nuk ishte Ibrahim Rugova ai që nuk deshti unifikimin e faktorit ushtarak, por ishin krerët e PDK-së të sotme dhe të Parlamentit, që ai i përmend me emër, duke sjellur fakte se nuk ishin pjesë e luftës dhe se në Rambuje nuk kishin përfaqësim, ishin të paligjshëm, ndërkohë që pretendonin ta kryesonin atë! Ndërsa UÇK-ja e Smajl Hajdaraj, me serinë e betejave të Kosharës të Sali Çekaj e Agim Ramadanit, të Rrustem Berishës me oficerët dhe ushtarët trima, betejen fitimtare të Loxhës, me komandant kolonel Tahir Zemaj dhe të tjera, legjitimoi luftën e Kosovës.

Për krimin e organizuar politik në Kosovë, tashmë, nuk ka asnjë enigmë, asnjë të panjohur. Jo vetëm tani, që janë berë vetëdenoncues pjesëmarrësit në krime faktike, por edhe më parë dihej se në timon qëndronte PDK-ja me partitë simotra të saj të majta. Sepse në një vrasje merrnin pjesë një duzinë njerëzish. E pabesueshme, por krejt e vërtetë, se një gazetë e ekstrmit të majtë lajmin për vrasjen e kolonel Tahir Zemaj me djalin Enisin dhe kushëririn Hasanin, përshkrimi i aksionit, është dorëzuar në shtyp pesë minuta para ekzekutimit.

Oborri i shtëpisë, korridori i saj, janë mjedise ku njeriu ndjehet i lirë, i sigurtë. Por, UÇK-ja bandë e SHIK-ut e përdhosi shenjtërinë e oborrit, të shtëpisë. Madje me terror në familje konkuruan dhe tejkaluan pushtuesin. Edhe Smajl Hajdaraj u ekzekutua pikërisht në korridorin para derës të shtëpisë. Në prag të shtëpisë, edhe brenda shtëpisë, në mesin e familjarëve, u ekzekutuan edhe shumë të tjerë.

Shtrohet pyetja: A duhet ndejur duarkryq dhe vetëm të presim përvjetorët për vajtim, apo të kërkojmë llogari e drejtësi? Askush nuk i bën gjyq vetës, as banda e kuqe e Lëvizjes, e SHIK-ut. Atëherë, çfarë ka bërë e po bënë LDK-ja e përgjakur? Mendoj se vetëm po i vajton të vrarët dhe asgjë më shumë. Kjo është skandaloze, madje e pafalshme për një parti numerike dhe dinjitoze.

Pak kronologji:

1.- Vite më parë kur një deputet i LDK-së, Fadil Geci, kërkoi të hetohet rrahja e deputetëve në Qirez dhe të vrasjeve të kuadrove të LDK-së, kryetari i atëhershëm i grupit parlamentar të LDK-së tha se "është kërkesë personale e deputetit"! Pra, e devalvoi, e heshti kërkesën!

2.- Votimi i LDK-së, përkrah PDK-së, kundër heqjes të imunitetit të deputetëve është skandaloz. Kjo ishte marrje në mbrojtje të deputetëve të inkriminuar të SHIK-ut. Dhe, Parlamenti i Kosovës i ka 21 deputetë aktiv, dje dhe sot, të SHIK-ut. Dhe, për këtë mbrojtje të krimit thonin se "nuk e ndjejmë veten fajtorë"!

3.- Kur një deputet i Vetëvendosjes shprehu dyshimin e bazuar se në Agjensinë e Inteligjencës dhe në institucionet eprore dhe vitale të Kosovës, janë infiltruar njerëz të SHIK-ut dhe se kërkoi hetim për të gjitha Sherbimet Informative. LDK-ja, në vend të përkrahjes, kundërshtoi këtë hetim, kinse duke refuzuar të ashtuquajturin "Sigurimi i Atdheut". Po pse duhej përjashtuar ndonjë Sherbim Informativ nga hetimi?! E pa kuptueshme dhe e tmerrshme!

4. - Pretenduesi themelues i UÇK-së të SHIK-ut, Azem Syla, në intervistimin hetimor nga prokurori nderkombëtar, për rastin Kleçka, thotë se luftëtarët nga LDK-ja ishin fare pak, minoritet në luftë, ndërkohë që Fatmir Limaj e pranon se të gjithë ushtarët vinin nga LDK-ja. Çuditërisht, me gjithë armatën e kalemxhinjëve që ka LDK-ja, askush nuk i tha këtij zotëriu, shef i grupeve ekzekutive seriale, se simbolkike është pjesëmarrja në luftë e Lëvizjes, përkatësisht PDK-së, sepse "ushtarët" e saj ngelën në sallat luksoze të Perëndimit, duke u çjerrur me thirrjet "UÇK-e", por në fakt vilnin paratë nga mërgimtarët për Fondin "Vendlindja thërret", fond ky fort i shpërdoruar dhe kurrë i shfrytëzuar për luftën.

Me keqardhje, as LDK-ja e mërgatës nuk ka ushtruar ndikim në LDK-në Qendër në Kosovë për këto probleme. Ndërkohë që në lavdata nuk është kursyer, madje edhe atëherë kur duhej bërë e kundërta. Madje edhe zërave të shkëputur, siç ka qenë Nëndega e LDK-së të Rheinland Pfalz-it, ua kanë zënë për të madhe, kur kanë denoncuar publikisht batakçillëqet e Qendrës, të cilat kanë qenë numerike dhe me pasoja fatale, duke sjellur në qeverisje njerëzit e krimit politik dhe ekonomik.

Kush nga mërgimtarët, në takimet me ministrin e mërgatës, Ibrahim Makolli, i tha atij përse provokoni mërgimtarët, duke emëruar për zëvendësministër një njeri, emri i të cilit është lakuar për krime, në kuadër të SHIK-ut, një halabak që, turpshëm, duke qenë në krye të Gardës të Republikës, për të bërë nderimet në ceremoninë mortore të Presidentit Historik, dr. Ibrahim Rugova.

UNMIK-u, një konglomerat zyrtarësh burokratë botërorë, i cili, jo vetëm nuk zbuloi  dhe as nuk hetoi krimin e organizuar politik, korrupsionin, reketin, uzurpimet e pasurisë private dhe shoqërore, në të kundërtën, favorizoi krimin dhe kriminelët. P.sh. vrasësitë e 4 (katër) oficerëve të Kosharës u dënuan nga 2 deri 5 vjet burg, por i liruan para kohe, madje u priten me lule, përfshi edhe kryeministrin e majtë!

Shefja e Emergjencës për luftën, Sabahate Tolaj, një vajzë që natyra kishte harmonizuar bukurinë, zgjuarësinë dhe trimërinë dhe me të cilën kam pasur nderin dhe fatin të bashkëpunoj përgjatë luftës, në Kurbin dhe Malësinë e Gjakovës, vite më parë e ekzekutuar nga banda e Dukagjinit, në vitin 2004, në Koshare, do të më thoshte se puna e UNMIK-ut, për zbulimin e krimeve është shumë e dyshimtë, sepse kur jemi në përfundim të dosjes, me fakte të bollshme për krimin dhe kriminelët, na e heqin nga dora, duke thënë: "merruni me një lëndë tjetër"!

Me ritmin aktual të hetimeve të EULEX-it, do të duhet një shekul, për të zbuluar dhe dënuar shumësinë e krimeve dhe të kriminelëve të Kosovës, të cilët e kanë përgjakur atë, duke i shkaktuar 1300 viktima, të vrarë prapashpine, në pusira, duke lënë jetimër shumë qindra fëmijë, duke veshur në zi prindër, gra, motra e vëllezër si dhe duke pikëlluar qindra - mijëra familje, të cilat ndërlidhen me viktimat.

Edhe problemi i Veriut të Mitrovicës një ditë mund të zgjidhet, por Kosova ka pak shanse të dalë nga rrethi i krimit, sepse SHIK-u ka 30 mijë anëtarë dhe është në rritje. Në ekran vazhdojmë të shohim intelektualë, akademikë, së fundi, edhe grupe studentore, në mbrojtje të krimit dhe të kriminelëve. Dhe, këta janë banda më e re e SHIK-ut.

Kryeministri jonë është peng i krimit, sepse janë këta eksponent të krimit, të cilët e kanë sjellur PDK-në në pushtet dhe atë në kupolën e pushtetit. Kur mësoi se EULEX-i do ta filloi hetimin për krimin e organizuar politikë në Kosovë, ai i strehoi në Parlament, duke i veshur me imunitetin e deputetit, shefat e SHIK-ut, shefat e krimit. Një biçim "komandanti", në LLap, të dënuar nga gjykata me burg, për krimin e torturës, por edhe i akuzuar për vrasjen e të burgosurëve gjatë luftës, e bëri deputet, bile edhe kryetar të Komisionit Parlamentar për Siguri!

Janë tre kryetar komunash që duhet të ishin prapa grilave për krime të ndryshme. Njëri syrësh zbulohet të këtë qenë shef zonal i SHIK-ut dhe nga një vilë bllokiste e Tiranës, u telefononte vartësve të tij: "Të burgosurit, (të gjithë ishin shqiptarë, aktivistë të LDK-së - shënimi ynë), i dërgoni afër pozicioneve serbe, i vrisni të gjithë dhe hapni lajmin se i vrau pushtuesi! E gjithë skema vrastare, me qëllim të marrjes të pushtetit, është marrë e gatshme nga instruktorët e Tiranës zyrtare të 97-ës: Rexhep Mejdani, Skënder Gjinushi, Paskal Milo, shefi i SHISH-it Fatos Klosi.

Porosia e shefit  zonal të SHIK-ut na sjell ndërmend intervistën e fundit të plakut shkrimtar dhe politikan, Sabri Godo, dikur ushtar i LDB:

-Gazetari: "A keni luftuar kundër armikut?

-Godo: Rrallë kemi bërë ndonjë aksion nga largësia. Armikut i shkonim prapa, sepse ndeshjen me te nuk mund ta përballonim.

-Gazetari: "A keni luftuar kundër "Ballit Kombëtar"?

-Godo: Po, ajo ka qernë tamam luftë, i vrisnim kudo që mundnim. Bilëz, jo vetëm ata që i kishim kundërshtarë të hapur, por i vrisnim edhe ata që ishin partizanë, me ne, por që mendonim se një ditë mund të jenë kundër nesh. Por, këta i vrisnim prapa shpine dhe përhapnim lajmin se i vrau armiku. Njëri nga këta ka qenë edhe përfaqësuesi i PKSH-së në mbledhjen e Mukjes më 1943 Mustafa Gjinishi, i cili nënshkroi Marrëveshjen për bërjen e Shqipërisë Etnike. Vetëm në vitet `90-a, u zbulua urdhëri për ekzekutimin e tij, i dhënë nga Enver Hoxha me shokë.

E vetmja shpresë për ta bërë shtet ligjor Kosovën, për ta stopuar krimin, për t`i vënë prapa grilave vrasësit e Smajl Hajdaraj, Tahir Zemaj me shokë,  është nëse Kosova do të vihej, për një kohë të caktuar, nën një protektorat të një shteti ligjor e demokratik, siç është Amerika, Gjermania, Britania. Dhe, LDK-ja duhet të ngulmojë në këtë kërkesë. Përndryshe, shteti i sotëm i Kosovës, ka elemente të bollshme të fashizmit, sepse fashizmi dhe komunizmi, si dy ideologji fatale për njerëzimin, kanë shumëçka të përbashkët, bilëz  komunizmi është shumë më vrazhdët. Kosova gjithnjë e më shumë po përkeqësohet dhe në çdo kohë mund të stërkeqet.

Në vitin 1997 askush nuk e ka menduar se shqiptarët e Kosovës, një vit më vonë, mund të kërkonin strehim tek armiku më shumë se një shekullor, Mali i Zi, por ja që ndodhi, sepse siç thuhet, "shpirti është i ëmbël dhe halli të çon në derë të armikut". Nëse krimi heshtet dhe kriminelët vazhdojnë të sundojnë institucionet, nuk është çudë, që, kur të largohen ndërkombëtarët, ne ta kemi mall Kosovën, ndërsa me familjet tona, të cilat, aktualisht, jetojnë në Kosovë, të takohemi dhe të çmallemi diku në banovinat e Serbisë.

Edhepse kanë kaluar shtatë dekada, gjithnjë mbetet aktuale porosia - kushtrim e Julius Fuçik-ut, para një skuadre pushkatuese: "Njerëz, ju kam dashur. Jini vigjilentë!"

Lavdi jetës dhe veprës të Smajl Hajdaraj me shokë!



(Vota: 5 . Mesatare: 4/5)

Komentoni
Emri:
Emaili:
Kodi i sigurise:
Titulli:
Komenti:

Publikime te tjera ne kete kategori: