Kalosh Çeliku: Miqtë e Rrapit me poezi erdhën në Shkup
| E Shtune, 06.10.2012, 05:43 AM |

MIQTË E RRAPIT ME POEZI ERDHËN NË SHKUP

NGA KALOSH ÇELIKU

Takimet poetike nën Rrap sot fesotojnë pesëmbëdhjetë vjetorin e themelimit si manifestim kulturor i veçantë i poezisë erotike, në Shkup. Poashtu, edhe revista e pavarur letrare STILI 97 (56 numra), organ i Lidhjes të Shkrimtarve Shqiptar, që në këtë anë të Atdheut erdhi si një zë i ri kryengritës në letërsinë shqipe. Hapi dyert krah më krah edhe për krijuesit e rinj, sidomos të femrës krijuese rebele shqiptare. Sot një numër i tyre që kanë kaluar nëpër gjirin dhe djepin e Lidhjes të Shkrimtarve Shqiptar në Shkup, janë emra të njohur në Letërsinë Shqiptare mbarëkombëtare, po edhe atë botërore. Njëqind vjet shtet shqiptar nuk janë pak në këtë Ditë të Madhe. Poashtu, nuk janë pak edhe njëzet vjet veprimi të Lidhjes të Shkrimtarëve Shqiptar, në Shkup. Nën Rrap ka jehuar vargu i poetëve shqiptar më të njohur anembanë Atdheut dhe botëror edhe para tytave të tanksave (2001). Nata e Madhe është përcjellur me poezi, këngë e valle deri në agim.

Nën Rrap, sonte me ne festojnë poetët e gjallë e të vdekur fizikisht kokë më kokë, siç i shihni edhe ju brez për brezi në valle me poezi. Ngrejnë dolli për Ditën e Madhe. E shoh matanë tavolinave Fredrik Rreshpen, Pano Taçin. Zyhdi Moravën, Hida Halimin, Mehmedali Hoxhën, Sadudin Gjurën, Abdylazis Islamin, Murat Isakun, Ramadan Sinanin, Daut Gurrën, Fadil Bekteshin, Shaqir Sadikun dhe qindra poetë të tjerë të gjallë duke u nisur nga Dritëro Agolli, Xhevahir Spahiu me Visar Zhitin e përfunduar te Vahit Nasufi e Gani Xhafolli me shokë se si e heqin vallen e Lirisë nën Rrap. Vetëmse, nuk i shoh dudumët. Ngatërraçët e tredhur, që na janë ngatërruar rrugës nëpër këmbë dhe janë strukur sonte si lakuriqë nate e sorra të zeza nga vargu kryengritës i fuqishëm shqiptar nëpër zgavrat e Rrapit ta festojnë dështimin e tyre historik.

Lidhja e Shkrimtarve Shqiptar këtë vit festiv në Njëqindvjetorin e Shtetit të pavarur Shqiptar i organizoi dy Manifestime kulturore tradiocinale ndërkombëtar bashkë, njëri pas tjetrit: Takime nën Rrap (29, 30 shtator dhe 1 tetor 2012), në Shkup dhe Ditët e Humorit dhe Satirës: Xha Deralla (01, 02 dhe 03 tetor 2012), në Kërçovë.

Nata e parë, Ora simbolike letrare: Na bashkoi Rrapi u hap me një minutë heshtje për poetët që ikën papritmas nga mesi ynë letrar: Hida Halimi, Pano Taçi dhe Ali Podrimja. Poezia tradicionale e Pano Tatiçit: Na bashkoi Rrapi të cilën e recitoi artisti Ali Qerimi i ngriti të pranishmit më këmbë. Kryetari i Lidhjes të Shkimtarve Shqiptar, Kalosh Çeliku i përshëndeti të pranishmit me një shkrim profetik duke u dëshiruar mirëseardhje nën Rrap. Ora letrare simbolike filloi me poezinë e dashurisë të Gani Xhafollit. Papritmas, në skenë del shkrimtari nga Prishtina Reshat Sahitaj me një poezi të poetit Agim Vinca, përkushtuar Ali Podrimjes. Prend Buzhala e shalon vargun matanë Vardarit. Fitore Gashi me dy shtamba verë del para poetëve me një poezi të “egër”. Gjon Gjergjaj me një poezi azgane i ngjitet Kalasë Dardane, në Bit-Pazar. Mëhill Vellaj ka ardhur nën Rrap nga Amerika. Pandeli Koçi pa mikun e Rrapit Pano Taçin nga Tirana, kësaj radhe me satiristin e mirënjohur shkodran Nikolla Spathari. Dashmir Malo nga Saranda me poetin rebel Xhelal Toskun. Dima Çomova me një çantë plot me punime artistike-figurative nga Bullgaria. Kosta Valetas, Iliaz Bobaj dhe Dashnor Selimi nga Greqia. Valles tyre poetike i ngjitet edhe shkrimtari maqedonas Paskal Gilevski. Skender Rusi vetë i dyti me Artur Ballin me poezinë: Korça ka lindur nga puthjet. Bujar Plloshtani me një poezi filosofike nga Tetova. Seida Beganoviq me biçikletën simbolike në poezi bregut Vardarit. Beatriçe Balliçi nga Elbasani i bukur i këngës popullore. Fatmir Musai po nga i njëjti qytet i Konstandin Kristoforidhit. Remzi Salihu me një shkrim burgu për Pano Taçin. Fadil Curri nga qyteti i nemur prej turqve te kënga popullore: Kaçanikut i raftë pika, nantë sahat asht therë me thika. Rexhep Bajrami nga Haraçina heroike. Edurd Sulollari, Istref Haxhillari e Bujar Balliu krah për krahu nga Lini i Shqipërisë. Mariana Shkurti me Festim Tomorin nga Poradaci. Dhe, poetë të tjerë nga Shkupi e Kumanova si për çdo verë u strehuan si zogjë shtegëtar nën Rrap.

Vargun dikur pasmesnate e lidhin nën Rrap. Shtambat me verë i rrokullisin para syve të Hënës mbi mal. Poeti popullor kur i lutet Karadakut: Ulu mal, të dalë Hana. Tri Zana nën Rrap u japin gji me shtamba. Fuqi për poezi. Shtatë sahat larg ta flugin vargun.

Ditën e nesërme, poetët ulen këmbëkryq rreth sofrës poetike. Sipas programit të paraparë nga organizatori, përgaditen t’i përkujtojnë me portrete letrare, miqtë e Rrapit: Hida Halimi dhe Pano Taçi. Reshat Sahitaj për disa çaste në mesin tonë me një poezi e ringjallë Hida Halimin: Dhe nisem, e hap krah më krah portën letrare. Rreth veprimtarisë letrare të Hida Halimit flasin miqtë e saj të penës: Gani Xhafolli, Reshat Sahitaj, Beatriçe Balliçi e Kalosh Çeliku. Mikun tjetër të Rrapit, pano Taçi e përkujton Pandeli Koçi. Remzi Salihu me një shkrim artistik: Dy net burg me Pano Taçin. Përjashtim radhe, bëjnë miqtë tanë nga Greqia: Kostas Valetas dhe Iliaz Bobaj. Natën e Madhe ata nuk do ta presin me ne nën Rrap. Shkaku se, duhet të udhëtojnë për në Greqi. Nesër janë në punë. Librat e tyre më rrinë kokë më kokë mbi tavolinë. Përurimin e tyre do ta hap poeti Iliaz Bobaj me librin e Kosta Valetas: Drita e Lesbos. Paskal Gilevski edhe ai ka përgaditur një diskutim për librin me tregime të mikut vëlla grek. Tashti, sipas zakonit fjala i jepet edhe Kosta Valetas. Reshat Sahitaj i përkthen fjalët e tia nga gjuha frënge. Shkrimtari i madh grek gjatë diskutimit i lëvdon shqiptarët duke thënë se janë vëllezër me grekët. Thotë: Unë i dua patriotët dhe nacionalistët, po jo edhe shovenistët e pushtuesit. Radha i mbetet poetit Iliaz Bobaj me librin e tij satirik: Kali i pushtetit, që posa ka dalë në dritë nga Shtëpia Gazetare Botuese “ASDRENI”, në Shkup.  Rreth librit flasin Pandeli Koçi dhe Prend Buzhala. Në fund e merr fjalën edhe vetë autori. Përgëzime. Urime.

Gjatë kësaj nate bëhet edhe përurimi i dy numrave më të ri të revistës letrare: STILI 97, përkushtuar njëri Mikes të Rrapit, Hida Halimi dhe tjetri Mikut të Rrapit Pano Taçi. Fjalë miradie flet kryeredaktori i revistës, Kalosh Çeliku.

Pasmesnate, juria profesionale e përbërë nga Reshat Sahitaj (kryetar), Remzi Salihu (anëtar) dhe Kalosh Çeliku (anëtar) i ndanë edhe çmimet letrare: Për vepër jetësore e rrëmben shkrimtari Kosta Valetas. Tjetrin, për vepër erotike e fiton poetja nga Elbasani Beatriçe Balliçi. Një çmim Mikja e Rrapit  i ndahet edhe poetes bullgare Dima Çomova. Çmimi i poezisë erotike kësaj radhe i jepet poetit Fatmir Musai.

Agimi më ka zbritur me të dy këmbët në Shkup. Poetët i pret rrugë e gjatë për në vendlindje. Satiristët i shalojnë kuajt e shalës për në Kërçovë, në Ditët e Humorit dhe Satirës: XHA DERALLA. Plaku mjekërbardhë si dikur me shkopin me kërrabë përpara këmbëve u ka dalë para te porta me anekdota...

Gjon Gjergjaj, Xhelal Tosku, Fadil Curri e Prend Buzhala me shoqe e shokë…


Gani Xhafolli, Kostas Valetas, Nikolla Spathari, Dashnor Selimi, Iliaz Bobaj dhe Pandeli Koçi gjatë Ores letrare simbolike: Na bashkoi Rrapi.


Poetët gjatë përurimit të librave dhe revistës letrare: STILI 97.


Prend Buzhala e përkujton poetin Pano Taçi me një studim letrar.


Pandeli Koçi, Gani Xhafolli, Dima Çomova, Mëhill Vellaj dhe Gjon Gjergjaj përcjellin me vëmendje Orën letrare.


Seida Beganoviq me poezinë e saj në mesin e poetëve.


Rexhep Bajrami, Bujar Plloshtani dhe Beqir Osmani (pronari i hotelit “Hamburg”) duke përcjellur Orën e Madhe Letrare.



(Vota: 236 . Mesatare: 5/5)

Komentoni
Emri:
Emaili:
Kodi i sigurise:
Titulli:
Komenti:

Publikime te tjera ne kete kategori: