Japonia goditet nga tërmeti dhe cunami
| E Premte, 11.03.2011, 08:56 PM |

Japoni, 11 mars 2011

 

Qindra persona besohet të kenë humbur jetën nga tërmeti me magnitudë 8.9, që ka goditur të premten bregun verilindor të shtetit japonez.

 

Ndërkaq, Ministria e Jashtme e Kosovës arriti gjatë ditës t'i identifikojë nëntë shtetas kosovarë në Japoni, pas tërmetit të fuqishëm që lëkundi këtë vend.

 

"Sipas informacioneve që vijnë nga Ambasada e Republikës së Kosovës në Tokio, situata në Japoni është e paparashikueshme, megjithatë shumica e shtetasve kosovarë janë jashtë zonave të rrezikut", thuhet në njoftimin e Ministrisë.

 

Kjo e fundit tha se do të vazhdojë përpjekjet për të kontaktuar dhe identifikuar qytetarë të tjerë kosovarë në këtë vend.

 

Pak orë më herët, presidenti amerikan, Barak Obama, tha se "Shtetet e Bashkuara janë të gatshme për të ndihmuar popullin japonez në këtë sprovë të madhe".

 

Ai tha se "administrata e tij do të vazhdojë të monitorojë nga afër cunamin në Japoni dhe Paqësor".

 

"Mishell dhe unë i dërgojmë ngushëllimet më të thella popullit të Japonisë, veçanërisht atyre që kanë humbur të dashurit nga tërmeti dhe cunami", thuhet në deklaratën e Obamës.

 

Valët e cunamit, më të larta se 10 metra, goditën të premten bregun verilindor të Japonisë, pas tërmetit me intensitet prej 8.9 shkallësh.

 

Qendra e Paqësorit për Alarm nga Cunami me seli në Havai, e lëshoi një alarm për cunami, për pjesën më të madhe të rajoneve bregdetare të Paqësorit.

 

Kryeministri i Japonisë, Naoto Kan, tha se tërmeti ka shkaktuar “dëm madhor”.

 

Pamjet nga helikopteri tregojnë vërshimet në qytetet veriore të bregdetit, ku valët e cunamit kishin marrë çdo gjë me vete.

 

Nga pasojat e tërmetit u shkaktuan zjarre, përfshirë edhe atë në një rafineri të naftës në Tokio dhe në një uzinë metalike.

 

Disa stacione atomike të rrymës u shkyçën automatikisht, ndërsa zyrtarët thanë se nuk ka pasur rrjedhje radioaktive.

 

Ushtria është dërguar në terren për t’i ndihmuar rajonet e goditura nga tërmeti..(f.b.& v.t.)

 


Evropa e Lirë

(Vota: 0)

Komentoni
Emri:
Emaili:
Kodi i sigurise:
Titulli:
Komenti:

Publikime te tjera ne kete kategori: