Presidenti Bamir Topi viziton poetin Xhevahir Spahiu

Tiranë - Presidenti i Republikës, Prof. Dr. Bamir Topi vizitoi sot pasdite në Pavionin e Neurologjisë, poetin e shquar Xhevahir Spahiu, cili gjendet i shtruar prej disa ditësh në gjendje të kritike shëndetësore, si pasojë e goditjes nga një ishemi celebrale. Kreu i shtetit shqiptar u shoqërua nga mjekë e drejtues të Qendrës Spitalore Universitare “Nënë Tereza” të Tiranës, të cilët po e ndjekin intensivisht situatën.

Pasi u interesua hollësisht për gjendjen dhe shëndetin e poetit dhe anëtarit të Akademisë së Shkencave të Republikës së Shqipërisë, Xhevahir Spahiu, dhe si u vu në dijeni nga Dr. Mentor Petrela se gjendja e z. Spahiu po shkon drejt stabilizimit, Presidenti Topi shprehu urimet më të përzemërta për shërim sa më shpejtë dhe i siguroi familjarët e poetit për mbështetjen e pakursyer humane dhe institucionale si President i Republikës.

Nga ana e tyre, familjarët e zotit Spahiu e falënderuan Presidentin Topi për vizitën, duke shprehur mirënjohjen për interesimin e vazhdueshëm të Kreut të shtetit për gjendjen shëndetësore të poetit dhe për njerëzit e shquar të artit në përgjithësi. Nesër, zoti Xhevahir Spahiu do të niset për një kurim të specializuar në Turqi.