Bukureshti historik dhe bariu Bukur

Ç’të reja ka Bukureshti i rrugëve të mbushura me plehra, e pyeste me fjalë të tjera Lasgushi Asdrenin para 70 vitesh, kur studjonte në Graz të Austrisë. Në zemër të Bukureshtit, në Sheshin e Kombeve të Bashkuara (Piata Natiunilor Unite), nja 100 metra tejmatanë godinës ku banonte Asdreni viteve të fundit të jetës së tij, gjendet restorani Bucur. Ç’të reja sjell sot Bukureshti poetik për shpirtin shqiptar? Risitë dhe hedhurinat janë të panumërta, siç janë të panumërta edhe bulevardet e bukura dhe botimet për vlerat shqiptare. Bukureshti paraqet një histori të bukur që bazohet mbi një platformë semimilenare. Gjatë këtij viti (më 20 shtator) mbushe 550 vjet të atestimit dokumentar të kësaj metropole të bukur, e themeluar sipas legjendës nga bariu Bukur. Dy ditë me rradhë (20/21 shtator), Bashkia e qytetit pregadit gëzime të shumta për bukureshtarët dhe tursitët që vinë për ta parë.

Autoritetet zbatojnë një program të gjerë për Natën e Bardhë të Bukureshtit, të gjitha duke defiluar nën mottonë Bucura-te Bucuresti! (Gëzohu Bukuresht!). Praktikisht, natën e parë gjitha muzetë dhe disa teatro janë të hapura, ndërsa hyrja në shfaqje është falas. Organizatorët patën pregaditur para pesë muajsh muzikë popullore, koncerte muzikore me trupat e minoriteve. Ishte prezent edhe këngëtari i famshëm kanadez Bryan Adams, në Lulishten Izvorul (Burimi). Bukureshti shkëlqente nga spektakli Beteja me lule (Batalia cu flori), nga një paradë kostumevsh të epokës së Mbretërisë. Kishte edhe zbavitje të panumërta, si dhe ekspozita dhe konkurse të ndryshme. Vlen të përmendet në këtë kontekst edhe hapja e ekspozitës Accent (pikturë dhe fotografi), organizuar më 22 shtator 2008 në Galerinë Apollo të Teatrit Nacional, nga Unioni i Artistëve Plastikë të Rumanisë.

Nga piktorët ishin prezentë me krijimet e tyre Albani, Jean Albu, Mirela Jordache, disa tjerë si dhe Miron Topçiu me origjinë nga Shqipëria, i biri i dr. Luan Topçiut (eseist i shquar shqiptar, sekretar i ambasadës shqiptare në Bukuresht). Kësaj ekspozite ia rriti prestigjin pjesmarrja e Ambasadorit të Shqipërisë në Rumani, Shkëlqesia e Tij, zt. Dashnor Dërvishi,  shqiptarë tjerë si zt. Aleks Jaso (diplomat), dr. Përparim Demi me bashkëshorten e tij, dr. Erion Piciri, dr. Luan Topçiu me Renatën dhe fëmijët e tij, filoshqiptari Tiberius Puiu etj. Janë momente që do të mbahen mend, siç mbahet mend edhe „bukuria” (një nga fjalët më të vjetra dhe më të bukura që i ka shqipja dhe rumanishtja që nga periudha e lashtësisë trako/ilire), me gjithë derivatet e saj në gjuhën rumune (Bucur, bucurie, bucuros, Bucuresti etj.) dhe në gjuhën shqipe (i bukur, bukuri, bukurosh/e, Bukurovc (në Kosovën Lindore), Bukurisht (një fshat afër Shkodrës), emërtime rumune si Bucura, Bucurescu (Gheorghe Bucurescu, përfaqësues i Rumanisë në trojet e Dardanisë, i cili e ka përvetësuar edhe gjuhën shqipe, njësoj si një mik tjetër i Rumanisë në Shqipëri (Gheorghe Micu, shqip: Miku).