| E hene, 05.09.2022, 08:04 PM |
Nuhi VeselaJ
NGA JETËSHKRIMI (1951-1954)
Naiviteti patriotodjaloshar dhe
burgu (1952-1954)
si mësim e sprovë hapërimi të
mëtejshëm
Sihyrje
Në pjesën “Nga Jetëshkrimi -Gjakovë 1948-1952”, të
publikuar te portali “zsh” me 12.06.2022, si shokë shkolle në Normalen e
Gjakovës, deri në klasën e katërt nga vendlindja (Suhareka) kisha Jashar
Bajraktarin (Kuçi) dhe Nezir Gashin. Të dy këta për ndonjë arsye jo të
thjeshtë, ndëprenë klasën e katërt e dolën mësues. Me thënë të drejtën sa kanë
ndikuar kushtet familjare për sukseshmërinë e tyre në mësim nuk e di, por për
nga vija patriotike u kisha lakmi familjeve të tyre, të cilat, edhe pse si
familje nga pikëpamja ekonomike nuk ishin aq të kamura, shkollimin e tyre e
ndihmonin, bile edhe me veshë e mbathë, më mirë se familja ime mua. Aktualisht
Jashari për veprimtari patriotike i kishte të dënuar që vuanin burg dy
vëllezërit e mëdhenj të tij: Zekën dhe Sefën, ndërsa Neza e kishte babën Rexhep
(dervish), burrë i fortë, i paepur edhe në pikëpamje atdhetarie. Me fjalë të
tjera ndërprerja e shkollimit dhe dalja mësues me tre klasë të normales nuk
ishte kërkesë-ndalesë e familjes, po ishte, sipas mendimit tim, mosgjeturi e
moshës së tyre adoleshente. Sidoqoftë, pra nga kjo vijë i konsideroja familje
më atdhetare se disa të tjera dhe të Veselajve të mi, seçse te këto ndaj
regjimit shtrëngues më dukej se më shumë mbizotëronte një atmosferë nënshtruese
se ajo rezistuese atdhetare.
Në të vërtetë, familja jonë e gjerë Veselaj, përveç pësimeve si të tjerët, kishte dy të humbur që në vitin e parë të instalimit të regjimit serbojugosllavo komunist, b. Aziz e b. Qazim, madje, për mos me u zgjerua rezistenca e Luftës së Ferizajt kundër pushtetit të rinj komunist prindët tanë, edhe pse pleq nga mosha, i patën burgosur e maltretuar, madje ata e përgjithësisht edhe pse i liruan, vazhdonin t’i mbanin nën vëzhgim, prandaj kjo peiudhë që në shkollë e përgjithësisht propagandohej si Çlirim, në familjen tone intimisht quhej Shtrëngim. Ç’është e drejta, vërtet, për ne, në krahasim me robërinë e përjetuar nga koha e Kralevinës jugosllave, tri-katër vitet e Shqipnisë (italo-gjemane!) ishin Çlirim. Madje, siç dihet, pas luftës NÇl, pasi Kosova përsëri u kthye nën sundimin e SerboJugosllavisë komuniste ato masa çliruese në çdo pikëpamje u shndërruan në shtrënguese, rirobëri. Kështu përveç gjendjes rënduese politike u përkeqësua skajshmërisht gjendja e përgjithshme ekonomike. Ishte kohë që ne si fëmijë-nxënës duke dëgjuar e qëndruar mes dy realitetesh asaj shkollore propagandistike, ku flitej për Liri e Çlirim dhe të realitetit në anën tjetër, ku flitej për Robëri e Shtrëngim, ne në botën reale e ndjenim shtrëngim. Dhe së këndejmi, në këtë situatë, mosha adoleshente 16-17 vjeçare në botëformimin tonë si nxënës i shkollës së mesme të mësuesisë, fillova me shprehë në vjershërime. Kuptohet nën ndikimin e mësuesve ideologjik rilindës, vjershave u jepja shpirt atdhedashurie, dhe nuk përtoja, të lëvizja si pa drojë edhe drejt asaj që quhet “lojë me zjarr”. Këtë po e ilustroj me këto vargje që më dilnin nga thelli:
Kushtrim
Çohuni djem se po myki,
Po e ha dryshku umin e rij
Kush ma i pari e cili i dyti,
Zini vend n’ front për liri,
Për shkollim, për dituni!
Kështu, po në këtë vazhdë, sidomos pas vitit 1948, kur Jugosllavia u hasmua
edhe me qeverinë e Shqipnisë, edhe pse Luftën e kishin të përbashkët dhe kishin
premtuar që Kosova pas Luftës nuk do të jetë e ndarë nga Shqipëria, me që e
ndjeja veten si njeri që bëja shkollë mësuesie që nënkuptohej vetvetiu se ndaj
kësaj tradhtie nuk mund të ishim imunë. Madje, aq më tepër, mbetjes së Kosovës
nën Serbi, filloi të shtohej një e keqe tjetër edhe më e madhe, sidomos nëpër
qytete: shkombëtarizimi i shqiptarëve në turq dhe njëherazi filloi edhe
identifikimi i ashtuquajturve muslimanë boshnjakë. Së këndejmi, përveç që
vazhdoja me vargje të kësaj natyre, por doja të tregoja se isha i gatshëm me u
sakrifikue, fizikisht e organizativisht në veprimtari kundër këtij regjimi
pushtues. Kështu, naivisht kisha bindje se kisha parapërgatitje vetjake për
sakrifica e veprime të tilla, posa të më jepet rasti, ashtu siç i shprehja në
vargje. Pikërisht, në këtë frymë po e përmend një rast si ngjarje me rëndësi që
ndjeva, të cilën po e rrëfej, për të parën here botërisht pas 70 vitesh.
Ishte buzëmrëmje vjeshte e vitit 1951 rastësisht në odën e Demlush Halitit në Gjakovë, ndesha një musafir të rrallë. Mesa mora vesh ishte nga Malësia e Gjakovës, mbase i origjinës NikëKolaj të Demlushit. Dhe kishte dalë këndej me një mision atdhetarie shumë delikat. Mixha Demlush i tregoi se jam djalë i besës dhe tregoi nga isha, i tha të fliste lirisht. Kështu ai veç tjerash i zbuloi Demlushit se Musteqja (Stalini) gjoja i paska thënë Pështjellësit të Madh (Titos) që gjithsesi Kosovën duhet me ia dhënë Shqipnisë, për ndryshe “Qysh të kam çlirue, kam edhe me të shkatrrue (!)... Folën edhe diçka tjetër, por unë nuk i kisha më mend aty, po te ky lajm-ngjarje që të bënte mos me humbë shpresën. Pasi u përshëndeten me nga një gotë: “për të mirë e suksese”, musafiri i shoqëruar me një shok, iku, pasi kishte takim me dikë nga të Fadilit.
Behpropagandim e organizim tejet sekret nën hijen e fadilistëve
Lajmi ishte i vërtetë apo jo nuk di, por mesa di dikush nga fadilistët ose
me dijen apo nënhijen e tyre, me ne të rinjtë normalistë e përgjithësisht
filluan të aktivizonin shumë me kujdes në beh një propagandim të kundërt me atë
zyrtar jugosllavotitotanefist (jo Shqipri e Kosovë në gjirin
jugosllav, që nënkuptonte përmbysje të regjimit në Shqipni, por e kundërta Kosova
në gjirin e Shqiprisë në kampin informbyroenverostalinist, që nënkuptonte
përmbysje në Jugosllavi dhe në rast nevoje luftë për bashkimin e trojeve
shqptare, gjithsesi të Kosovës me Shqipëri. Për këtë së andejmi, përtej gardhi,
kishte prova se ishte spastruar terreni nga projugosllavët apostolotanefistë
të tipit Koçi Xoxe etj.
Ky propagandim
vërehej ndër shokë të besës e sidomos në qasjen ndaj meje që isha nga
Rrethbjeshka e Prizren-Suharekës, dhe pasi atëherë në moshë adoleshente haptazi
vargëzoja vjershërime patriotike dhe tani si nxënës e pastaj si mësues si më i
shkolluari (!) shqiptarisht nga Rrethbjeshka (!) mund të isha kuadër potencial
në vendin e duhur në postin e duhur, apo së paku të shërbeja si ndërlidhës,
nëse ndodh ajo puna e madhe për bashkim kombëtar. Dhe vërtet gjatë
muajve të pranverës së hershme e në vazhdimësi në vitin 1952, dikush më “i
madh”, i panjohur me emrin Coli, që nuk ishte emri i vërtet i tij, pasi kishte
biseduar me disa shokë të mi të klasës si Mehmet Idrizi, Rrustem Ibra, e ku ta
di, m’u paraqit, se gjoja ishte i interesuar për atë që kishte dëgjuar se
vjershëroja, dhe se e mbaja Flamurin, me të cilin joshja shokët e besës.
Unë vërtet pa dyshuar fare i tregova për vjersha dhe si e kam pronësue Flamurin
kuq e zi., nga një gazetë i Qeverisë titiste të Apostol Tanefit, profesorit
tonë të matematikës, që e pata marrë nga shtrati që ia rregulloja ndonjëherë
Ferdinand Shkezit (i shkodran), edukator në konvikt dhe njëherazi arsimtar i
fiskulturës.
/P.S.
Siç më ka treguar, i ndrituri Beqir Kastrati më 1972: Pasi Ferdi, ndërkohë
sëmuret rëndë dhe shtrohet në një spital në Rijeka të Kroacisë, ishte i vetmi
ky (Beqir Kasrati),që pati mundimin dhe rastin ta vizitojë atë në atë spital.
Këtë vizitë-takim, përkatësisht atë
falenderim që i shpreh i sëmuri, kur pa pritë e kujtue e gëzon dikush i
veti, për Beqirn ishte një mrekulli
hajnore e pashpjegueshme... Prandaj më porositi që në hapje të takimit të 20
vjetërit të klasës sonë ta kujtojmë edhe
Ferdinantin me një minutë heshtje që unë
i shtova edhe emria të tjerë dhe të Mehmet Idrizit.
Sidoqë të ketë
qenë, në këtë gazetë, më drejt me fotoflamurin që kishte në mes i tregova se
kam manipuluar naivisht me shokë. Ku jemi betuar individualisht duke prekë
Flamurin se do të luftojmë për bashkimin e tokave shqiptare. Ja, teksti i
betimit, i hartuar prej nesh, të cilin ia tregova edhe mësues Colit:
Betimi
Bëj betimin me shpirt e fjalë:
Gjuhës së nanës zot me i dalë;
Bëj betimin me bindje të thellë:
Vendin tonë me dashtë, me k’ndellë;
Bëj betimin që për jetë prore
Me i dalë zot shqipes arbnore;
Bëj betimin që si parim:
Me pasë luftën për bashkim;
Bëj betimin dhe s’prapem fare:
Mos me ba kurr’ punë me marre;
Bëj betimin që për ardhe:
Me dhanë jetën si me le!
(Gjakovë, nandor 1951)
Ai pas leximit më
tha nuk ka nevojë për ceremoni tjetër betimi më tregoi që të mëdhejtë kur
betohen e bashkojnë duart mbi flamur, por afër tij kanë edhe revolen që nëse
tradhëtojnë vetë e pranojnë dënimin me vdekje. Sipas tij, gjjithsesi mund të
vazhdoja, më fort me vjersha se me prekje dore mbi këtë Flamur, sepse kjo ishte
me shumë rrezikshmëri, andaj të rinjtë duhet të ruhen nga ceremonitë e tilla të
rrezikshme.
Për shkrimet e mia
në poezi edhe në prozë ishin të njohur jo vetëm shokët e klasës: Mehmet Idrizi,
Din Mehmeti, Rrustem Ibra, Skënder Rexha, Besim e Masar Rizvanollit, Nazmi
Pula, Zeqirja Cana, Gani Hoxha, Adullah Zhuri dhe kush jo tjetër, ngase bëja
pjesë në grupin e letrarëve të shkollës, që në kohë të vona nuk kishte aq aktivitet.
Në të vërtetë,
mësues Coli, pas një cikli udhëzimesh individualisht e shkurt që na i jepte
ditëve të lira në caqe të ndryshme, vetëm njëherë ka ndodhur në një shetitje në
një shpatinë të Qabratit, ku ishte i pranishëm edhe Mehmet Idrizi e një tjetër
që nuk e njihja.
Sido që ishte
puna, pasi ishte i kënaqur me mua Coli më pagëzoi me ofiqin Pëllumbi, që
herdokur e në çdo situatë, vetëm kush të paraqitet me këtë emër-ofiq duhet të
keshë besim. Gjithkujt mos i beso, më tha se i takon një Organizate të
Madhe, ka degëzime shtrirje të gjerë, ku bëjnë pjesë edhe profesorët e
udhëheqësit tanë.
Atë njeri më nuk e
kam parë, mbase do të jetë maskuar, apo do të ketë kaluar në ndonjë qytet apo
rajon tjetër, ku ta di?!
Sidoqoftë, nga
mësim-udhëzimet formëzuese që morëm nga mësues Coli, dhe që na shtynim të
mësonim edhe më shumë, kryesore ishin këto që po i rrumbullakësojmë në këto
katër pika:
Së pari,
tashti nuk duhen organizata nacionaliste vëllavrasëse si të mëparshmet që
kërkonin përmbysje të regjimeve komuniste në Kosovë (Jugosllavi) e Shqipëri,
por tashti për bashkimin e tokave shqiptare, përkatësisht të Kosovës me Shqipni
mjafton vetëm lufta kundër regjimit jugosllav.
Së dyti, detyrë e çdo mësuesi e luftëtari apo shkrimtari mbetet me folë e
me shkrue në të mirë të bashkimit kombëtar, tue mjellë dashni për gjuhën e
shqipe e popullin shqiptar pa dallim feje e ideje. .
Së treti, kujdes në kontakte apo në bashkëpunim me anmikun e masës, me atë
që nuk e njeh, për mos me tradhtue kauzën, fjalës mundesh me i dhënë lak, po
gjithsesi me veprue përherë sipas asaj: Qite gurin e fshihe dorën.
Së katërti, assesi mos me u mashtrue me u shpërngulë nga Kosova, as në Shqipëri, ku gjoja ata që dijnë serbisht dërgohen në studime në Rusi(!). Duhet kuptue se Kosova e pashpërngulur është Shqipni. Duhet shfrytëzuar çdo shkollë në Jugosllavi, edhe shërbimin ushtarak, punësimin, madje, nëse të bie hi,se edhe burgun duhet shme shfrytëzue si shkollë dhe sa herë të jepet mundësia me veprue. atdhetarisht.
Ç’është e drejta,
unë as që kam ditë me u ruejtë. Në kontakt me një nxënës emigrant nga
Shqipëria, që quhej Hilmi Nela, kam qenë shumë i hapur. Ai i lexoi ca nga
vjershërimet e mia, po më doli shumë më i pjekur se unë si njohës i aktiviteve
dhe të rrethanave politike. Ai gazetën tanefiste ma hoqi dore. Më tregoi për
rrezikshmërinë, nëse organet e punëve të brendshme e gjejnë tek unë. Si
vjershëtar ishte më i prekur se unë. Është interesant se në bashkëbisedim me
ne, plotësisht pajtohej me ato katër pikat të ravijëzuara nga Coli. Assesi nuk
fliste keq për shqiptarë e për Shqipnnë aktuale, prej nga kishte ikur. Ai
thoshte prej Shqipnisë, kam dalë në Shqipni (Kosovë), prandaj duhet të punojmë
e luftojmë që nga Kosova mos të ketë shpërngulje, ajo duhet të jetë shqiptare
dhe të bashkohet bija me Nanën. Ai na siguronte se nuk kishte dalë këndej me
shkue në Perëndim, po me rrnue në Kosovë e me veprue bashkë me ne. Këtu
kërkonte prej nesh që si mësues sa më shumë ta mësojmë e kultivojmë gjuhën
shqipe. Nuk tregonte se ishte tanefist as antienverist. Po përsëris për ne
ishte jo vetëm me moshë më i pjekur, por edhe intelektualisht e potikisht më i
arrirë.
Ndërkohë pas dhënies së provimeve të maturës, ku pothuaj unë i vetmi katundar jashtë terrenit të Gjakovës, pata sukses me diplomue në afatin e parë, para se të ndahem shokëve u ofrova një bllok-notes që të nënshkruanin dhe të linin ndonjë fjalë për mos-harim. Të gjthë nënshruan me ndonjë fjalë, por prej tyre me nga një vjershë më patën përshëndetur Din Mehmeti e Besim Rizvanolli, i cili nuk ka vazhduar të merret me poezi si Dini. Notesi, që shpesh e shikoja, dhe shmallesha e të, nuk di si më është tretur me disa dorëshkrime e dokumenta të rrallë, të rëndësishëm.
Fillpunësimi i mbarë, vullneti e naiviteti djaloshar
dhe burgu si sprovë e përvojë
Start i mbarë
Sido që të ketë
qenë, me këtë entuziazëm, pasi e dhamë me sukses maturën, u ktheva në Suharekë,
u paraqita te kryetari Asllan Fazlia. Ai më uroi suksesin, si mësues i parë i
diplomuar pa kurse dhe më tregoi se i kishin dy progjimnaze në Suharekë dhe në
Mushtishst, mund të zgjidhja, por në Mushtisht ishte problem ekzistimi për
shkak të mungesës së kuadrit. Zgjodha Mushtishtin, edhe pse Suharekën e kisha
në derë të shpisë.
ukNë Mushtisht,
mësues progjimnazi gjeta Xhafer Kabashin, ndërsa në fillore Ukë Kabashin
(Ukukymeri). Filluam punën me shumë vullnet, Patëm sukses përveç në mësim dhe
në agjitim për përfshirje nxënësish në progjimnaz nga fshatrat për-rreth, hapëm
edhe një internat për ta. Organizuam shfaqje në Mushtishst e në Vraniq.
Vullnet e naivitet politiko-djaloshar
Meqë kujtime nga
Mushtishti kam botuar në burime të tjera, këtu po përqëndrohem kryesisht rreth
atmosferës para burgosjes dhe gjatë vuajtjes së burgut, përkatësissht rreth
vullnetit dhe pësimit nga naivitetit
politiko-djaloshar.
Ishim në valë të
aktivitetit për punë, Uka më njoftoj se paskan formuar një organizatë, unë iu
përgjigja se unë tashmë e kam po mund të ju ndihmoj dhe kështu u hesht kjo
çështje. Me Ukën e vizituam Nezirin që ishte mësues në Savrovë. Nuk e dija se
ai kishte pranuar një anëtarësim të tillë, por gjatë asaj vizite folëm e folëm,
u shprazëm mirë rreth kauzës që duhet të luftojmë për Shqipninë etnike dhe
sidomos për bashkimin e Kosovës me Shqipni, qoftë edhe me rretik jete posa të
na kërkohet.
Pas ca ditësh në
Suharekë u takova me Rifat Kabashin, student i Beogradit që punonte mësues në
klasat e nalta të progjimnazit në Qendër. Ky ishte kushëri i Ukës, dhe jetonin
në një familje arsimdashëse. Rifati meqë ishte pak më i moshuar se ne kishim
respekt ndaj tij. Ai në bisedë e sipër pasi ishte informua nga Uka. Më pyeti
për Organiazatën i thashë se në organizatën, ku isha anëtarësua bëjnë pjesë
intelektualë, nëpunës, si edhe pothuaj të gjithë profesorët tanë, e cila është
e degëzuar jo vetëm në Gjakovë po gjithkah edhe këtu. Për këtë është i
porositur dhe vëllai im që punon në prokurori të Suharekës që të mbrojë kuadrot
shqiptare. Po mesa mora vesh. Ai kishte pasur një hall tjetër. Donte të
arratisej në Shqipni. Atje në Krumë kishte krye klasat e para të fillores. Mua
aspak nuk më pëlqente ikja, ngase e dija se ne kaq shumë nevojë kishim për
mësues, njerëz të arsimuar, studentë, prandaj, lidhur me ikjen apo lidhjen me
Shqipëri, nëse kërkon në mënyrë ilegale, pa u zbuluar, më lehtë e ka me gjetë
në Rijeka të Kroacisë se këndej (!!!),
Rifati që ishte më naiv se unë e kishte zbuluar vetveten e organizatën e tij. Ai paska kërkuar nga dikushi të pajisë organizatën me një pushkë e revole. Ai dikushi ia gjen pushkën nga UDB-ja dhe nëpërmjet saj Rifati me organizatën e tij bie në kurthë. Atë e zënë me dokumenta. Në hetuesi paska pranuar deri edhe bisedën me mua për Organizatën e Madhe (!) me qendër në Gjakovë, me degëzimet e saj an’e mbanë, ku bëjnë pjesë dhe të gjithë profesorët tanë dhe që paska lidhje me jashtë në Rijeka të Kroacisë etj.
Burgu si bela, por edhe si sprovë e përvojë
Kjo deklaratë e
Rifatit ka mjaftuar të më burgosin për një ditë me Nezirin, më 17 dhjetor 1952.
Mua më arrestoi Dragi, që nuk u soll aq keq dhe pasi ngrenë dolli me drejtorin
e shkollës serbe në Mushtisht, së andejmi me xhip pa më lidhë duarsh, shkuam në
Savrovë me marrë Nezirin, të cilin Milani më i egër se Dragi, ia kishte
lidhur duart dhe me të shtyme e detyroi mbathur me hy prrockës me ujë e me dalë
te ne, Atë ashtu e afruan në ulësen pranë meje. Neziri me sy më tha që ta hiqja
unazën që e kisha me shqiponjë, të cilën e hoqa duke e futur dorën në xhep. Dhe
kështu na dërguan në Suharekë e së andejmi në Prizren, në Shtëpinë e Haxhi
Lubës që ishte seli dhe burgu i UDB-së. Nezirin më nuk e pashë deri ditën e
gjykimit pas mbi 7 muaj.
Mua, së pari, më
mori në bisedë Mehmet Maliqi, shef i UDB-së në Prizren, i cili më tregoi se çka
kishin thënë Uka dhe në veçanti Rifati për Organizatën e madhe në Gjakovë.
Unë i thash se i kam gënjye vetëm sa me u nxjerrë fjalë, me i ikë problemit,
sepse nuk kisha mjaft prova me i paraqitë.
Aty pashë librat e
shënimet që kisha pasur në sirtar të tavolinës në klasë, por edhe ato që i
mbaja në një kënd dollap të thjeshtë në zyrën e mësuesve. Dallohej qartë libri Te
praku i jetës, gramatika e Muderizit, Libri i këndimit... po jo dosja me
vjersha e punime të mia. Për fat, siç më ka treguar Xhaferi, kur dola prej
burgu, Kah i mbledhin librat e shënimet e mia nga këndi im, dosja me punime origjinale
rrëshqet më poshtë, përzhet me librat e Xhaferit dhe kështu shpëton ajo dosje,
dhe unë nga pasoja të paparsahikueshme. Atë dosje Xhaferi ia paska dorëzuar
vëllait tim, dhe kunata ime mençurake Hamidja, kur ende ishte pa u bastisur
shpia e pa e burgosur Baci Ramë, atë Dosje me shkrime e vjersha e çon në gjini,
në fshatin Sllapuzhan, ku e mbajnë fshehur ne arkën mes teshave të nuses. E
cila aty më ka pritur deri sa u ktheva nga ushtria.
Sidoqoftë, pas
bisedës me Mehmet Maliqin, më mori në dorë hetuesi Jovo Pokushevski (bjelorus),
i cili pasi nuk pranova që jam anëtar i kurrfarë organizate ilegale dhe nuk
pranoja se jam fajtor, para se të më fusë në një qeli, urdhëroi me ma heqë
mantelin dhe setrën. Qelia ishte dhomëz
e ngushte me dritare të mbyllur deri në hekura të dritares nga jashtë me dru
zjarri. Në atë dritare ishte një kalanicë me ujë të ngrirë, aq ishte ftohët ato
ditë.
Natën e mora vesh
në atë bodrum, ishin aktive tri qeli, në të parën ishte Rifat Kabashi kryesori
i Organizatës dhe në të dytën Mustafa Shehu, sekretari a komisari i asaj
organizate. Të tjerët, të gjithë ata që kishin pranuar si anëtarë dhe kishin
nënshkruar deklaratat përkatëse, i kishin dërguar, me sa di, në Burgun e Madh:
Nënkala (Terzi Mahallë). Nga kjo kuptova se nuk do ta kem lehtë. Në qeli gjeta
një këmishë si të mëndafshtë të mbytur në qelb e gjak. Dhe atë menjëherë e futa
në gji nën xhemper, të cilën do ta cek si e shfrytëzova më vonë. Kështu disa
net ngrohja trupin me të hukatur brenda xhemperit me grykë, dhe pothuaj u mësova
me u kotë në këmbë dhe me fjetë ngaluc, mbështetur me shpinë për dere, siç
kisha dëgjuar, si Azem Bejta, ndërsa kali ishte në ecje ai flinte ngaluc mbi
shalë!
Kuptohet prej meje
kërkonin se çfarë dija për atë organizatën e madhe të Gjakovës. lidhjen e fshehtë; me sigurimcat e Tropojën
etj, etj. Kërkonin prej meje edhe për gjëra që vërtet nuk dija fare dhe kjo më
ndihmonte që të fsheh edhe ato që sadopak i dija. Gjatë marrjeve në pyetje
dihet se nuk e kisha lehtë, Sidoqoftë, po i përmend nja dy raste se si dy
udbashët tanë më shpëtuan nga masakrimi:
E para, që në
fillim, pas 3-4 ditësh në në mbrëmje një një dhomë-zyrë ishin tubuar udbashë e
politikanë të lartë, ndër ta edhe Cica Patronogiq Atë e ndjeva kur tha: Uçiteska
shkola stvara nam nepriotele (Shkolla normale pa na krijon
armiq). Unë reagova shqip: Unë nuk jam anmik, E due shokun Tito, Rifatin e
Ukën i kam rrejtë, kam dashtë me u nxjerrë fakte, e pastaj me i paraqitë... Ky
arsyetim nuk piti ujë. Edhe ata dyshonin vërtet për diçka të madhe që paksa
ishin në dijeni, kishte ngjarë që edhe unë dija paksa, po nuk nuk tregoja. Në
atë çast, Mazllum Nimani, udbash që ishte me ta, ndërrhyri në shqip me fjalët. Pse
nuk po tregon? dhe m’u vërsul më kapi me dy duar për flokësh mbas veshi më
shtyu me forcë në një qoshe dhe më tha ngadalë:Ti nuk di gjë për Gjakovë.
Dhe duke më përplasur foli me të madhe: Ovaj nezna nishta (Ky nuk di
kurrgjë). Kështu, më kthyen në qeli dhe ma lehtësuan regjimin: ma dhanë
mantelin e setrën, nuk ma ndalnin bukën që na sillnin çdo dy tri ditë nga
shtëpia. Ma lejuan edhe një gëzof të vjetër që ma sollën. Më lejuan me ble
sigare. Unë nuk tymosja duhan, po bleja për hir të shkrepsës (qibritit) për me
ndezë gazeta në qeli me ngrohë paksa duaretrup. Letra-gazetat, i vidhja
nga të shtruemit e një qeni që e patën lidhur afër nevojtores. Ai ishte qen
çobani, i një familjeje shqiptare që kishte ikur këndej me grigjen e dhenve.
Qeni i shkretë lehte e lehte pothuaj deri sa plasi. Nga ato gazeta mora vesh se
Stalini kish vdekur (!). Atëherë ai farë organizimi i madh me fjalë apo
rrena të mëdha doli nul, këputi çdo iluzion.
E dyta, pasi u
munduan në mënyra të tjera me më nxjerrë fjalë, ma sollën një
natë një diversant të përgjakur!!
(i gjilanas), po uniformën nuk e kishte as të përllomur (!), i cili,
në të vërtetë më shumë më ka mësue se si mos me u mashtrue se më ka provokue.
Pas një kohe ma sollën për disa ditë, një emigrant të vërtetë, ish oficer i
Zogut, me pseudonimin Beqir Keka, i cili për disa ditë më ka rrëfye disa
histori interesante nga koha Zogut dhe tani për mënxyrat në kohë lirie
komuniste (!).
Ndërkaq pasi nuk
mundën me më nxjerrë fjalë, donin që ta gjenin një provë sado të vogël që unë
gjoja i kisha treguar b. Ramë për Gjakovën, për Nezën, Ukën e Rifatin etj,
gjë që unë assesi nuk pranoja, prandaj një buzëmrëmje më dërguan në një dhomë
ku kishte aparaturë masakrimi me rrymë etj. dhe më thanë Sada imash da
pevash! (Tash ke me këndue), por e pritnin shefin. Vërtet Mehmet
shefi erdhi e hapi pak derën, më pa. Foli me të madhe Ja në tuqem decu!
(Unë nuk rrah fëmijë!) dhe iku jashtë. Mbetën të ngrirë. Pokushevski tha
se ai kishte përgjegjësi, prandaj ekspert- instrumentistët me aparaturë ikën,
por megjithatë ndonjë sadist si Millan Gjuriqi, vazhdoi me ndonjë turturë si:
me lidhje krahësh nga mbrapa deri sa nxihej gjaku; afrimi i poqes elektrike në
sy, e ndonjë turturë tjetër, si loja nënthonj që për mua ishin të
përballueshme.
Pse më shpëtuan
këta udbashë shqiptarë? Për mos me tregue çka dija për Gjakovën, apo për hir
humanizmi apo për dhembësuri shqiptarie, le të vlerësohet. Unë mendoj për të
tria. Sidoqoftë në ato kushte këta më shpëtuan nga masakrimi, për çka me shpirt
u shprehja në vete si edhe sot falenderim.
Së treti, ndërkohë
pasi nuk tregoja asgjë edhe për atë që dija, gjeten rast dhe e burgosën bacin
Ramë, vërtet pakurrfarë fakti, vetëm pse kishte autoritet të madh në popull.
Përveç kësaj pasi nuk mund të gjenin prova të forta me më dënue, u orvatën me
më bë bashkëpunëtor të vetin. Më porositën me ndëgjue çka po flasin Mustafë Shehu
e Rifat Kabashi, me kusht se kanë me lirue Bacin Ramë dhe mua me ma përmirësue
jetën, mos me më lënë në atë qeli të filliqur, që veç kalanicës, nuk kishte lug
druni, as “qyp” që takonin me rregullore çdo dhome të burgut a të burgosurit.
U thashë se për
shkak të largësisë nuk po dëgjohen mire, po atë që dëgjoj do t’ju tregoj me
kënaqësi. Kur më thirrën pas një kohe, thashë se ata po këndojnë, Rifati këngë
të çikave të Krumës, ku paska jetuar atje si fëmijë, ku edhe paska qenë nxënës
i shkollës fillore. Ndërsa Mustafa po këndon këngë dalmatine e italiane se
paska jetue në Dalmaci.
-Po për politikë?
-Po, kam ndëgjue
se nuk kanë pasë lidhje dhe nuk kanë lidhje me krye e Sas mehqipni (Oni nisu
imali i nemaju veze s glavon, ni s Albanijom). Po të dy po flasin se kanë
gabuar e tash kanë revizionue dhe po shpresojnë se do t’i lironi.
Meqë nuk qenë të
kënaqur, hoqën dorë nga informimi i mëtejshëm, andaj nuk e liruan Bacin Ramë,
as mua nuk ma përmirësuan gjendjen. Më thane se nuk po tregon drejt. Më duket
se ata i incizonin.
Në të vërtetë,
Rifati shihej se vërtet i kishte ra pishman, tash i dhimbsej edhe e fejuara
nxënëse e tij, për të cilën ai tash ishte kujtue që, pa qenë i rrezikuar, nuk
është dashur të kërkojë ikje me pushkë?!. Megjithatë kishte marrë në dijen se e
fejuara e tij, pa marrë parasysh sa e dënojnë, ajo do ta priste.
Ndërsa Mustafa,
edhe pse recidivist, kishte povuar njëherë vuatjet nga Goli Otok, ai kishte
bindje të pashuar se Kremlini kishte politikë të drejtë dhe Stalini me Enverin
do ta përvetësojnë Kosovën. Këtë bindje nuk e kishte fituar si partizan,
pjesëmarrës i brigadën shqiptare-serbe që dhe ky kish marrë pjesë kundër
Muharrem Bajraktarit, por nga Xheladin Hana, të cilin e kujtonte me admirim, i
cili ia kishte mbushur mendjen për këtë. Xheladini më 1945 paska qenë kryetar i
Organizatës së Rinisë së Kosovës dhe njëherazi drejtor i gazetës “Rilindja”.
Në atë kohë Mustafa Shehu paska qenë bile më në pozitë udhëheqësie se Rexhai
Surroi, të cilin nga informbiroizmi e kishte shpëtuar një lidhje faniljare me
Fadil Hoxhën. Mustafa kujtonte mençurinë e Xheladin Hanës, nga i cili ka qenë i
nxitur me mësue frëngjishten, sepse Kosova do të ketë shumë nevojë për njohës
të gjuhëve diplomatike si lingua franca, siç njihej frëngjishtja në atë kohë.
Së katërti, më
pati lënë përshtypje roli i Mehmet Maliqit, të cilin këta të dy e përmendnin si
avokat mbrojtës të tyre. Mehmeti duke qenë shef i UDB-së, edhe pse i vetmi
shqiptar, sepse të gjithë operativcët legalë, mesa i shihja, ishin serbë, këta
të dy, po edhe të tjerët, i paska ndihmuar, duke u thënë pranoni, s’keni çka
fshehni për organizatën., pasi ua kemi kapur me dokumenta. Organizatën e kishin
pasë emërtuar Marksistët revolucionarë, Rifati kryetar e Mustafa
komisar, Uka sekretar dhe të tjerët anëtarë. Pasi vërtetë pranojnë e kishin më
lehtë, Nuk ka pasë nevojë për maltretime ndaj tyre. Madje Mehmeti, paska
pranuar në vizitë kryefamiljarët e këtyre të dyve, konkretisht: Brahim Ukën nga
Korisha, axha i Rifatit dhe baba i Ukës dhe kryefamiljarin e Mustafës, Sheh
Hasanin nga Prizren. Mustafës i vinte çudi, pse Sheh Hasani ishte interesuar
për të, pasi ky ishte marksist i devotshëm e ai sheh fetar nacionalist. Mehmet
Maliqi, u paska thënë: Shyqyr që i kemi zënë herët, sa nuk ishin rritë në
batalion. Me këto faje kanë me u dënue, por jo me humbje jete.
Kështu, për të gjithë të tjerët ka pasë lehtësime, vetëm për mua jo! Më mbajtën të izoluar në atë qeli, deri ditën e Gjykimit. Është interesant se atë ditë në mëngjes e sollën një berber, i cili qau me lot, kur për të parë m’i ra brisk fytyrës, të cilën mbi 7 muaj nuk e kish prekur rreze dielli.
Dita e gjykimi dhe këmisha me gjak e qelb
Ditën e gjykimit,
pasi nuk pranova kurrfarë fajsie, filluan me lexue ndonjë fjali nga
prosverbalet se kisha thënë e nëshkruar se Kosova duhet t’i takojë Shqipnisë,
le ta sundojë kushdo qoftë, edhe dreqi i zi (crni djavo), po Kosova
duhet të jetë e bashkuar me Shqipni. Unë reagova, sa i përket Kosovës më
Shqipni unë kam lexuar librin e Moshe Pijades, ndërsa për të tjera pasi serbishten
nuk e njoh e sidomos stilin administrativ, por e them të vërtetën se nuk jam
anmik i popullit dhe i shtetit, nuk di as çka kam nënshkruar, sepse jam i ri
dhe kam qenë shumë i frigësuar dhe e nxora këmishen me qelb e gjak nga gjoksi.
Ja këtë e kam gjetur aty në qeli, Aty e di se nuk prejnë pula! (ne kole
kokoshke!). Madje, madje kam qenë i sëmurë dhe kam qenë në spital, nën
mbikëqyrje mjeku.
Atëherë menjëherë u ndërpre
seanca, mua më kthyen po në atë qeli. Edhe pse pritja nuk më maltretuan.
Të nesërmen e
liruan B. Ramë dhe mua ma ndërruan nenin e fajsisë nga neni si anëtar
organizate që parashihej dënimi 8-12 vjet, më fajsuan për moskallëzim të veprës
penale, tentim ikje në Shqipni dhe më denuan 2 vjet burg të lehtë..
Pikërisht këmisha me gjak e qelb e parqituur në gjykatë, ishte një sherr naiv, ishte një goditje që ka dëmtuar shumë imazhin e hetuesisë, por njëherazi një fitore imja që pa obligim karrabythje bashkëpunimi, po me qëndrueshmëri naive munda me fitue lirimin e vëllaut dhe deri dikund sigurova liri për vete. Kjo gjithsesi ishte një sidetyrim i atij shërbimi, që të më mbajë nën survejim, madje edhe të më përvetësojë.
Nga pritja në Burgun e Madh të vendimit nga Gjykata supreme e Serbisë për ankesat tona
Sido që të ketë
qenë, pas shqiptimit të denimeve për tërë grupin, lirimit të bacit Ramë, unë
shpëtova nga izolimi. Tashti këtu në Burgun e Madh që mesa di kishte dy
dhomë-stalla ku mund të vendoseshin mbase mbi një qind të burgosur, që veç
arallëkut kishte safat të shtrua me dërrasa, ku të burgosurit vendosnin
shtrojë-mbulojat e tyre. Këtu kisha mundësi me folë e me bisedue me
bashkëtëburgosurit Mustafa Shehu, Ukë Kabashi, Rifat Kuçi që e kisha rival në
shah, po mund të kontaktonin e loznim edhe me me dhjetra të tjerë, me të cilët
luanin edhe Lojëkapuçash dhe këndonim e sajonim vargje shpotitëse dhe
kështu zbaviteshim allashqiptaro-katundarçe. Nga kjo fazë pritjeje ruaj shumë
kujtime, Këtu shkurtimisht për hir përmase po i përmend vetëm tri raste të
veçanta:
E para, vërtet
ndjeja dhëmbje kur Ukë Kabashit, që ishte një vit më i ri se unë, ashtu edhe
Mustafa Shehut, pse ishin të denuar mbi 1o vjet, u vunë pranga në këmbë,.
Pranga i kishin vënë edhe Rifat Kabashit, po ai ishte vendosur në dhomë-stallën
tjetër. Ukës i ndihmoja në këtë situatë, si me i zdeshë e veshë pantollonat,
ndërsa Mustafës, që me jepte leksione fillestare nga frengjishtja, i sillja ujë
e i bëja hyzmete të tjera, pasi me të e kisha përzie ushqimin që na sillnin nga
shtëpitë. Për të dy ndieja dhjimbje.
E dyta, ndërkohë,
e sollën me të shtyra një plak të rraskapitur. E lanë diku në skaj safi të
dhomës. Natyrisht, jo nga kërshëria po ngase isha i përbetuar me ndihmue
njerëzit në nevojë. Kështu plakun e mora në përkujdesje me lejen e kujdestarit
të dhomës. Kishte pengesa në dëgjim e shikim. Gjymtyrët i lëviste me
vështirësi. Mezi fliste, mbi 5 muaj pa larë sy e fytyrë. Madje pështymën nga
goja s’kishte fuqi ta hidhte jashtë lesh-mjekrrës e mustaqeve... të tjerat
kuptohen! Pasi e vendosa në shtrat- postajen time, i dhashë ujë me pi si dhe
pak pak ushqi me dorën time nga tepsia e bukës së Mustafës. Pasi pushoi pak e
çova në nevojtore I pastrova fytyrrë e trup me sapun... Këmisha ime i binte pak
e madhe... Dhe kështu e ktheva te shtrai. Pasi u këndell, tregoi se
kishin sjellë nga burgu i Rahovecit, quhej Zymer Hima, nga Banja. M ’u
kujtua, emër i njohur, mik pas miku. Në kohë të Kralevinës jugosllave predsednik
vendi. Edhe pse ishte kryetar shumë i vogël se Ramë Bllaca e
Banush Sedllari, edhe ky nuk kishte pri për shpërngulje.
Sidoqoftë në këtë
implikim. merita ime më e madhe ishte se nëpëmjet familjes sime njoftova
familjen e tij se Zymeri është gjallë dhe në përkujdesjen time. Po cili ishte
faji i tij që të pësonte kaq shumë nga maltretimi disa mujor??| Faji i tij,
ishte ky. Para pesë vitesh, 1949 e paska strehuar për disa muaj kaçakun e ri, Rifat
Berisha, me grupin e tij. Po kush ishte Rifat Berisha? Po mjaftohem me atë
që dinte Mustafa për të:
Rifat Berisha, ishte shok i Xheladin Hanës, si pjesëmarrë i Konferencës së
Bujanit, ishin kundër mbetjes së Kosovës nën Serbi. Xheladinin, e hetuan më
herët dhe e likuiduan, ndërsa Rifati mbeti në udhëhesi të Frontit popullor deri
pas Rezolutëssë Informbyrosë 1948. Deshti me veprue, por e hetuan. Tentuen me
burgosë, po ai si oficer me akademi i ikën arrestit dhe del ilegal. Përkundër
konktrolleve të rrepta me milici e ushtri, për disa muaj nuk munden me gjetë.
Ai si duket qenka fshehur të Mixha Zymer. Megjithatë po atë vit diktohet në
tjetër vend në përleshje me ushtri-milicinë serbojugosllave vritet.
Mixha Zymer
heshte. Ne kishim dëgjuar që mixha Zymer kur heton se ushtri e polici do të
rrethojnë fshatin, ai meë renë që ishte
bijë Berishe, inskenojnë një të pame në një fshat tjetër dhe kështu duke e
përzie me gra me mbulesë xharrash luftëtarët i qet jashtë rrezes së rrethimit.
Pra strehimi dhe ai veprim inskenimi me xharra-maskimi qenkan zbuluar tashti
dhe për këtë pas 4-5 vitesh serboudbashët për disa muaj pa mëshirë e kishin
torturuar plakun.
Nga kjo merret
vesh se sa e vështirë ka qenë lufta kundër regjimit serbojugosllav që me çdo
kusht Kosovën donin ta mbanin si koloni dhe shqiptarët të nënshtruar.
E treta, ndërkohë pasi u lirua Mixha Zymer, ndodhi një e papritur për mua. Pas 18 muaj vuajtje burgu më thanë merri plaçkat, kujtova se po më transferojnë në dhomën tjetër më derguan në zyrën e pranimit, ma dhanë lejenjoftimin dhe më thanë je i lirë. Shko ku të duash. Për këtë kemi telegram nga Gjykata Sepreme e Beogradit. Nuk pata kohë as me u gëzue as me u kthye me u përshëndetë me shokët nga dhoma e burgut.
Pas këtij lirimi
Duke menduar se
Gjykata Supreme pas ankesave tona e paska mirëkuptuar plotësisht “naivitetin”
tonë, andaj plotësisht më paska shpallur të pafajshëm, si im vëlla, Bacin Ramë,
gjithkujti thoja se kam dale fare i pafajshëm.
Pasi vizitova
familjen e ngushtë, e vizitova shkollën, si arsyetim shitesha si i pafajshëm
dhe se do të kthehem së shpejti në shkollë, po më duhej një leje nga Komiteti.
Një ditë isha në Suharekë, rastësisht mora vesh që një politiklan i lartë Jovo
Shotra ndodhej aty. Vura re se qëndronte para Kafes së Kostës, ulur në karrige
me bashkëpunëtorin e hapur Muhamet Hoti nga Leshani. Pasi u prezentova, i thash
se jam mësues i diplomuar. Kam qenë nën hetime po jam lirue plotësisht kao
nevin (si pafajshëm), andaj kërkoj me u kthye si mësues. Ai më tha
për mësues mos kërko, por paraqitu te Dragi (udbash) dhe thuaj që unë të kam
çue me të punësue. Unë nuk iu paraqita Dragit. Më mire zgjodha punë fizike
bujqësore në fanilje, siç kërkoi zotshia ynës e me më dhënë punësim udbash
Dragi, edhe pse për të nuk kam pasur fjalë të këqia.
Në të vërtetë, më
vonë mora vesh se Gjykata supreme nuk më kishie liruar si të pafajshim, por e
kishte kthye rastin rigjykim, por me ndërrim paragrafi të nenit përkatës. Gjyqi
u mbajt ndërkohë, u përsërit dekratat e Ukës rreth organiatës që nuk e kam
kuptuar si ilegale nuk ngarkohesha më. Ndërsa tentoja që edhenga deklaratëln e
Rifatit të se nuk e kam kuptuar. Gjyqtari më tha -Video si zmijin rep i
kazesh ne nisi razumeo da je zmija! (Ke parë bishtin e gjarpërit e thua
nuk e paske kuptuar se ke pa gjarprin!) Kjo nuk u shit, prandaj më denoi 18
muaj, burg të lehtë.
U graha punëve fushore në familje. Përgateshim për dasmë të përbashkët me vëllain me të cilin edhe të martoheshim në të njëjtën ditë.
Darsma e madhe si traditë, rastësia si nxitje gëzimi e provokimi
Në përputhje me titullin: Darsna e madhe si traditë, rastësia si nxitje gëzimi e provokimi mendoj se është me interes që së pari të njihemi paksa rretth obligimeve që në familjen shqiptare tradicionale patrriarkale kishin gjinia e shpisë ndaj zotshpisë apo kryefaljarit dhe vetë zotshpia (kryefamiljari) kishte ndaj tyre (anëtarëve të familjes dhe
së dyti, do të bëjmë fjalë rreth disa rastësive nga darsma jonë tradicionle që sollën gëzime në opinion, por njëherazi u cilësun si provokim nga disa qarqe të regjimit shqiptarofob.
a) Familja tradicionale dhe kryefamiljari
Ne pesë vëllezër
jemi rritur në një familje tradicionale patriarkale, ku pushtetin dhe
përgjegjësinë e mbarëvajtjes së shtëpisë (familjes) e kishte zotshpia ose
kryefamiljari. Kuptohet që atë funksion te ne e kryente Baba, Muharrem
Uka, po ai ndërkohë e sprovonte vëllain tonëtë e madh Smajlin me
marrë atë drejtim. Kështu kur vdiq Baba më 1951 vllai i madh Smajli që
ne quanim Bac, e mori zotshpillëkun. Tash Baci si zotshpie kishte
obligim për mbarëvajtjen e familjes. Kur dola mësues një pjesë të të ardhurave
duhej dorëzuar atij, siç bënte edhe Baci Ramë, që ishte nëpunës shteti. Ndër të
tjera vëllai i madh kishte obligim dhe me na martue. Unë isha i fejuar me
shkuesi me një vajzë nga një familje nga Korishi, ashtu edhe vëllai im Baci
Ali, që momentalisht ishte ushtar, të cilit meqë i kish vdekur gruaja më
përpara, sa ishte ushtar Baci e fejoi me shkuesi me një vajzë nga një familje
të njohur nga Peqani, andaj Baci bënte mend që sa të kryejë obligimin ndaj
miqve me ndonjë bashkë lesh apo shumë parash me destinim që të fejuarat të
përgatisnin pajën e nusnisë, sipas zakonit, qoftë me qendisje, kërrabzime si
punë dore, apo punë me vek (vegje), të gjitha ato e fejuara i kryente në
familje të babës, të cilat i sillte në shtëpinë e burrit kur martohej, andaj
kryefamuiliari ynë duhej të investonte rreth kushteve të martesës (darsmës
aq)që nuk ishte aq punë e lehtë. Megjithatë
pas punësimit tim punët nuk shkonin keq. Pritej që pas kthimit të vëllait nga
ushtrua të bëhet darsma jonë. Fatkeqësisht burgosja ime e papritur, më vonë
edhe e Bacit Ramë, përmbysi gjithçka nga ato plane. Kështu tërë familja ishin
në ankth, por kryefamiljarit iu shtua telashe të papapritura, përveç
përkujdesjen për familjen relativisht të madhe që drejtonte, tashti lypsej
përkujdesje edhe për të burgosurit, iati i të cilëve nuk duhej. Veç tjerash, aq
më keq kryefamiljari gjatë tërë dimrit të vitit 1953 çdo dy- tri ditë, i duhej
të udhëtonte Reçan –Pizren, 8 ose, katër orë andej, katër këndej, për me u çue
bukë (ushqim) vëllrzërve të burgosur. Kështu ndodhi deri sa Baci Ramë u lirua
nga Gjykata. Lirimi i Bacit Ramë, kthimi i tij nëpunës, dhe ardhja e Bacit Ali
nga ushtrua, si punëtor fushe fillon mëkëmbje e familjes në çdo pikëpamje. Baci
përsëri duket nga miqtë, interesohet për nuset, por kishte pak mundësi me ecë
si lypsej. Kështu tërë viti 1953 ishte vit i mëkëmbjes. Mirëpo kur fati e desh
dhe unë u lirova vitin 1954, në valën e punëve bujqësore verore, atëherë u
krijua mundësia me u realizue dëshira e para dy viteve: organizimi i një Darsme
të madhe. Kështu pas lirimit tonë Baci viziton dhe konsulton miqt. Nga kjo
vizitë ndahet shunë i kënaqur. Miqtë duke ditur gjendjen e vështrië që
përjetonte familja jonë, ata vetë i kishin ndihmuar bijat e tyre që mos të
ndërpritnin qejzitjen dhe punët e filluara në vegje, dhe kështu tashti
lypseshin vetëm disa përplotësime që kryheshin kryesisht me para. Kështu Baci
na njoftoi dhe kërkoi të punojmë pa u lodhur për mbledhjen e fryteve të verës:
drithra, pemë, sane, dru etj. Dhe pasi këto u kryen vetë me Bacin Ali kishin
gjetur një punë andej nga Reka e Shehrit (Pizrenit).Dhe kështu mbi një muajë
punuan nateditë, dhe fituan bukur mirë. Këtë kohë mua ma besuan mbjelljen e
arave me grurë. Sa munda atë detyrë e kreva me sukses.
Kështu u kijuan
kushtet për një darsëm të madhe që aq shumë e dëshironte Baci. Si duket me këtë
donte ta tregonte veten para opinionit se është trashëgimtari i denjë i Babës
dhe emrit të familjes. Kjo në të vërtetë, ishte darsma e parë që e organizonte
ai si zotshpie pas vdekjes së Babës, prandaj në këtë darsëm do të ftonte edhe
shokët e babës, kuptohet burra në zë.
Mos me zgjatë, me
miq Baci kishte caktuar Ditën e Darsmes: E djela e fundit e muajit nëndor.
Me datë binte: 28 Nëntor 1954. Darsmat atëherë zgjatnin 3 ditë te
burrat dhe 5 ditë te grate (bijat). Tërë mahalla, bile edhe katunsdi ishin
pjesëmarrës në këtë dasmë. Dhe menjëherë fillojnë përhatitjwet jo vetëm me
këngë çikash, por me planifikim serioz, në mënyrë që drasma të rrjedhë me
rregull. Planifikimi, nadraja e detyave
bëhej edhe te grate edhe te burrat. Deri pë për tëhollueset e patave për pite
te grate dhe bujtja e miqve nëpër odat e
fshatit. Mua më caktuan detyrë me shkue në Drenoc me i sigurue këngëtarët e
njohur Salih e Feriz Krasniqi, Shkova dhe i sigurova. Në të kthyer në Banjë e ftova dhe edhe Mixhe:n
Zymer po ai nuk ishte në gjendje aq të mirë shëndetësore.
…Sa hieshi kishin pritje
pëcjeljet e urimeve dhe të pëhajrimeve sit e burrat sit ë grate që vinin që
vininn grupe grupe sidomos nga mahallat e tjera të fshatit,. Madje edhe më
bukuri kishte vinin miqt, dikush edhe ne dhurat që përshëndeteshim edhe me
tupan, . Krejt këto bëheshin të premten e të shtunën, Ndërsan krushqit niseshin
të djelen.
Nuset merreshin në dy fshatra Korish e Peqan. U ndanë krushqit kush andej e kush këndej. Pas marrjes së nuseve darsmorët këmbë e nuset me qerre të mbuluara edhe me qylymat e sixhdet e nuseve mbi, do të takohen nën Suharekë, në orën e caktuar në vendin e caktuar. Pas një valle të përbashkët, tashti në njëshkolonë krushqit depërtojnë qytezën dhe njëshkolona vijon rrugën për Reçan. Pikërisht tash kishim mundësi ne dhëndurët nga vendi ku qëndronim me i pa krushqit që na i sillnin nuset. I frymëzuar nga kjo pamje dasme, e pata shkruar këtë vjershë kushtuar kësaj darsme, ku ndër të tjera bëja luftë vetëmbrojtëse kundër grykëspërbindëshmëve pushtetarë, dhe Sykuqdjajve serbofilë shhqiptarofobë. Ja teksti i vjershërimit:
OAZË
FLLADI MES SHTIGJESH NË ERRËSIRË
(Dita e darsmës, Reçan, 28 Nëntor 1954)
Në këtë të
djelë, pasdreke vonë/kthehen krushqit njëshkolonë:
Vijnë zënë
të duken pak nga pak/ sa hijeshi, bajrak, bajrak…
Këngëtarët
dhe në marshim/ kujtojnë ngjarje në galdim.
Varg e varg- vargu mban/mbrapa surla me tupan…
Darsëm:
gëzimi s’ka të ndalë…-Pa ndëgjo o shkrushkaparë,
Ndal te
sheshi, valle t’ hedhim, ndal prej thellit t’zit’ ta nxjerrim,
Ndal prej
zemrës gaz të derdhim,
Se në këtë
ditë që po shënojmë/ ne dy vëllezër, po martojmë,
Ne dy vasha po i nusnojmë…
Grykëspëbindshi
kot gajasë/ Sykuq djalli, le të pëlcasë
Se ne
tonën-tonën bëjmë:/ qiellin, tokën shëndëllejmë!
Se këto
sheshe log kuvendesh/ log kushtimesh e ahangjesh
Forcë na japin e na këndellin/ trash’gimi ndërmend na sjellin.
Poshtë-lart
grykës oshëtin/derdhin vallet në atë lëndinë…
Defatoret
në qerre të kuqe/ (lavd dhëndurëve për këto nuse)
Këndojnë
për jetën dashuri/ për dëshirën zjarr në gji.
Dëgjoj
gëzimin lart jehon /kujtoj shenjën që s’valon,
Që, medet,
ai gjakim gjani/pret palosur nën fytyrë jorgani! ...
Por prap
gazi ma prek faqen /shoh qilimin shoh sixhaden:
Në fushë të kuqe shenjë shqiponjë /Sa e thellë, them, është qenia jonë!
Mbërrijtën
kushqit hap me hap/ tubet radha pak nga pak:
Shkrep
hareja lart e më lart/ dhe ja dy nuset zbriten në cak!
(Nga vepra Shfrime nëpër mjegullnajë, Prishtinë 1997)
b) Rastësia si nxitje gëzimi e provokimi
Këto rastësi ndër të tjera
ishin ato që iritonin qarqet e larta shqiptarofobe që nuk donin sforcimin e
familjeve shqiptare në trojet e tyre të reflektuara në këtë dasëm:
E para, pse u ftuan të
gjithë shokët e babës, që disa prej tyre pushteti i quante reaksionarë. Po i
përmnd vetëm dy emra: Hamit Tahiri e Jetulla Reçani, mbi 7o vjeçarë, që të dy
mbase për të fundit hare paten kënaqësin që të loznin valle burrash si Ukë
Mehmeti (gjyshi im), valle me plot përmbajtje që nuk po i shoh në asnjë
ansambël profesional sot. Mbaj mend që edhe të rinjtë e fëmijët përpiqeshin t’i
imitonin, ndër të tjerë pati shkëlqyer ndër dasmorë vogëlushja pesë vjeçare
(tezja) Zade, me vallë burrash e valle grash.
E dyta, Nuk ishte rastësi që
Baci e organizoi darsmën e madhe për hir autoritetit personal si zotshpie pas
vdekjes së babës, po ishte rastësi se kjo ndodhi pas lirimit nga burgu të dy
vëllazërve shkollarë tëtij, që për shqiptarofobët këta ishin disidentë, prandaj
edhe këtë e cilësonin provokim.
E treta, Dita e Darsmës, Njëzetetetë Nëntor, Festa Kombëtare e popullit Shqiptar, Data e shpalljes së Pavarësisë së Shqipërisë në Vlorë më 1912 për të gjitha tokat shqiptare nga Ismail Qemali. Kjo përputhje date me darsmën tonë, vërtet, ishte rastësi, por për mua rast i veçantë, i jashtëzakonshëm, një mrekulli që vetëm Zoti mundi ta na dhurojë.
Pas dasme, ushtria, kthimi dhe elegjia
Sidoftë, pas tre muaj
martese shkova në ushtri. Andej nga Suhareka më përcollën me këtë karakteristikë: Neprijatelj,
iz neprijateljske porodice, Bio je u zatvor, Nalazi se pod istragom
(Armik, nga familje armike. Ka qenë në burg. Gjendet në hetime), për këtë dasmë më shumë pësoi vëllai im i madh
Smajli, që ishte zotshtëpie si dhe vëllau Baci Ali, në dimrin e vitit 1955. ,
në të ashtuquajturin. Në Ushtri, kuptohert pse thosha se APJ vërtet qenka
shkollë, ku farkëtohet “vëllaznim-bashkimi” i të rinjve të popujve dhe
kombësive të Jugosllavisë (Gde se kali “bratstvo-jedinstvo” omladine naroda i
narodnosti Jugosllavije), kalova më mirë se kam kujtue. Për mbresat, eskivazhet, veprimet e
kujdesshme nga ushtria në një shkrim të veçantë, ndërsa këtu po i kthehem fatit
të dy shokëve të ngushtë, me të cilët bashkëpunoja sa isha në klasën e katërt
të Shkollës normale: Mehmrt Idrizi dhe Hilmi Nela. Për fatin e tyre mësova në
verën e vitit 1959 deri sa isha me shoqen në Banjën e Pejës, Për Mehmet Idrizin
ish shoku u klasës Nazmi Pula që ishte me nënën e vet, më tregoi se atë e
kishin vra në kufi me Shqipninë. Mësova, gjithashtu, nga një emigrant, mbase
shoqërues i turupmadhit Panajot Plaka që qëndronte ato ditë në këtë Banjë,
mësova se Hilmi Nela, qenka vra në pritë brenda Shqiprisë.
Të dy këta martirë i kishin vrarë në kufirin Kosovë /Shqipëri, njerin andej, tjetrin këndej. Më shkonte mendja se për fatin e tyre të zij, kishte më shumë sherr këndeja apo andeja që i kishte qitë në pritë, apo të dyja palët si me marrëveshtje?! Vërtet, nuk di, le të vlerësohet, por di se ndjeva shumë dhimbje për të dy. Dhe pikërisht këtë dhimbje për ta, ashtu si dita, si munda e shpreha ato ditë me këto vargje:
Vrasje te gardhi i zi (elegji)
Dy djem të rinj:një elegji, Njëri në Jug tjetri në Veri...që të dy në një
pusi,
Qaj moj nënë qaj!
Që të dy, te i ziu gardhim, njeri në Lindje, tjetri në Perëndim, që të dy i mor një pushkë, për një nuse ishin krushkë. Qaj moj nënë qaj!
Që të dy me një këmishë veshur, për të dy një nënë kish qepur: Dykrenare në të kuqen fushë, që të dy ranë në një gemushë,.. Qaj moj nënë qaj!
Dhe pse Nëno, s’thuhet kot: Trimat s’vdesin rrojnë nga mot, këta dy qahen, janë për gjëmë, varret shkret Nënë ua kanë lënë, njeri në lumë, tjetri në gumë, pa gur varri pa mbishkrim, pa kurorë pa përkujtim... Qaj moj nënë qaj!
Qaj, kujto Nënë Metin, Hilin, që aq shumë ta deshtën hirin, po i ngatërroi,
nënë pabesia, n’ Gardh të Zi i rrëzoi pusia, Qaj moj zemër qaj!
Pavdekësia, nënë, t’u shkruhet në altarin e lirisë, vetëdëshmues është
gjaku i dlirë që ndrin në faqe të historisë...Qaj moj nëno qaj!
(Banjë e Pejës,
korrik 1959,
(Shih vepra Shfrime
nëpër mjegullnajë (Prishitnë 1997)
Para se të
përfundoj këtë pjesë Jetshkrimi po e përsërit se Hilmi Nela më ka shpëtuar që
ma hoqi dore gazetën tanefiste me flamur etj, kurse sa isha intim me Mehmet
Idrizin jo vetëm idealisht por edhe shoqërisht, po e vërtetoj me firmosjes e
tij origjinale që e shënoi më 1951, pasi e lexoi versionin e parë të poemës Formimimi
kooperativës fshatare (1950), e cila e përpunuar është botuar në veprën
Cace e hope djaloshare (Prishtinë 1997).
Siç po shihet nga
faksimili, ai veprën e vlerësi më përqej shumë dhe e shënoi emrin
e mbiemrin e plotë dhe klasën, duke e lënë kështu një shenjëshkrimi simbolik,
të rrallë, të pavdeksësie, me kaliografi
të bukur, siç e ka pasur prej natyre edhe bukurinë e tij fizike djaloshare,
Faqja e fundit
(dorëshkrim) e poemës, versioni fillestar 1950 ”Formimi i koopeativës
fshatare” e vlerësuar nga Mehmet Idrizi(1951):
Po e përfundoj
këtë pjesë Jetëshkrimi me tri konstatime:
E para, thuhet se qingji
i butë thith dy nana ndërsa i egri as të veten,. Kjo e fundit vlen për
qengjat poetë të lindur të familjes Nela. Kujto fatin Hilmi Nelës që thonë se e
joshin me dalë andej me marrë dikë të familjes, po e zë pusia. Kushuriri i tij
Havzi Nela, pati fatin po ashtu poet, si qengj i egër, dihet se përfundoj me
varje. Fate të tillë mos na rafshin me i harrue.
E dyta, më 1972,
në përvjetorin 20 të klasës sonë të Normales, unë naivisht, jo vetëm
propozova të përkujtohet edhe martiri Mehmet Idrizi po propozova që të
shkojmë në të pame te familjen e tij dhe ta përkujtojmë me një kurorë. Kjo
nga politikanët aktual të Gjakovës u zu provokim tejet i rëndë, prandaj u pa që
po përgatisnin arrestimin tonë. Më ndanë nga shokët dhe thanë po nisemi për
Deçan, me vlerësue terrenin, do ta vizitojmë. apo jo (!!!). Në rrugë e sipër
ishin dy shokë Masar Rizvanolli, si akvist politikan dhe si politikan dhe
Mehmet Muharremi, udbash. E mora vesh sa ishte sahati, atëherë po in them
Mehmet Muharremit (udbash) a nuk është rehabilitua Mehmet Idrizi, ai më tha
-Jo,
-Nuk e paskam
ditur, Paskam gabuar shumë!
Ai pas pak
rrugëtimi me ne zbriti nga vetura dhe kështu Mehmet Muharremi (Haskaj) tregon naivitetin
tonë dhe mua si shok shkolle më shpëtoi nga arrestimi, gjë që do të ishte
ogur që e kërkonte Dushko Ristiqi me qiri e pishë. Me fjalë të tjera, nuk e kam
me ironi, Mehmeti që më shpëtoi mua, sigurisht nuk paska pasur mundësi me
shpëtue nga prita Mehmet Idrizin që e ka pasur më të afërt dhe më shokë se mua.
apo jo?!
E treta, mësa po
dokumentohet se tri vjershërimet e para që shohin dritë edhe këtu, i kam
shkruar në vitet, kur për vargje të tilla luhej me krye, majde ato guximtarisht
u ofruan për shtyp më vonë dhe u botuan në vitin 1997, dy vjet para përfundimit
të Luftës UÇK, andaj dua të them se kësaj Lufte Çlirimtare i kanë prirë
edhe naivitetet tona, duke aluduar në Organizatën e Madhe kundër SerboJugosllavisë
shqiptarofobe, luftë kjo ku u inkuadruan jo vetëm pjesa dërmuese e
intelektualëve, të prirë nga profesorët e udbashët tanë të mençur, për
çka patëm aluduar në vitin 1952, për çka edhe vuajtëm burgun, dhe si rrjedhojë
përjetuam pasoja por edhe mësim e gëzime të paharrueshme gjatë hapërimeve tona
të sukseshme, apo jo?! Le të vlerësohen. Unë flas për vepra njerëzore jo për
ata që bënë krime monsruoze.