Hamza Halabaku: Melhem për nëntë plagë

Hamza Halabaku

MELHEM PËR NËNTË PLAGË

Në shishe thonë

Ke futur djallin

“Ose ta lë fjalën

Ose ta lë djalin”

Bijë lypsari

Bijë mbreti

Je princeshë

Nënë e motër

Shtyllë e fortë në vatër

Kur je e kur s’je

Mbretëreshë

Je më e mira

Më e vështira

Ke lindur

poet

gjeneral

e mbret

Kanë thënë

fjalë të mira

E të këqija

Kanë shkruar për ty

Je si floriri

Në dorë i bie gjithkujt

Në mur të muruan

Kurban të uruan

Në urë të guruan

Melhem për nëntë plagë

Të Gjergj Elez Alisë

Të urtit e të marrët

Të duan për grua

Thonë

“Në shishe ke futur djallin”

“Ose ta lë fjalën

Ose ta lë djalin”

Nuremberg, shtator 1994