Editorial
Pensionistja i shkruan ministres: Rregulloni shkollën, që të kemi në rregull shoqërinë
E shtune, 11.09.2021, 07:49 PM
E nderuar zonja Ministre e Arsimit, Sportit dhe Rinisë,
Unë që po ju shkruaj jam një
pensioniste 82-vjeçare mësuese e leximit dhe e gjuhës shqipe.
Pas
lindjes së fëmijëve, zbrita në ciklin e ulët. Punova si mësuese 40 vjet.
Tani, në
pension, uroj me rastin e fillimit të vitit të ri shkollor të tërë armatën e
mësuesve në gjithë Shqipërinë:“Një vit të mbarë në këtë periudhë të vështirë që
po kalon njerëzimi“.
Po ju drejtohem juve, ministres sonë
të Arsimit.
Para disa ditësh dolët në televizor
dhe dhatë disa udhëzime për vitin mësimor.
E dini çfarë më bëri përshtypje midis
të tjerash zonja ministre, se sipas asaj që ju njoftuat mësuesit janë të detyruar që më 1 shtator të venë në shkollë, kurse nxënësit
sipas dëshirës.
Kjo më indinjoi shumë sepse sivjet
fëmijët më shumë se kurrë duhet të paraqiten në shkollë pas dy vitesh mësimi të
cunguar. Por, për çudi zonja ministre më 1 shtator oborret e shkollave u mbushën
me zërat gazmorë të fëmijëve. Atëherë, a ju duk i drejtë lajmërimi juaj?
Dëshiroj të shtroj disa probleme dhe
besoj se ka edhe të tjerë që do të më mbështesin.
Është nxjerrë një urdhër apo një
dekret që për mësuesi mund të shkojnë maturantët me mesatare të ulët.
Ç´është kështu? Kur ai nuk ka arritur
rezultate të larta në shkollë, si do të bëhet përhapës i dijes?
Për shembull si do t´u mësojë ai të
tjerëve gjuhën e bukur amtare, elementin e rëndësishëm e që e dallon atë nga
kombësia?
Kam dëgjuar në lajme se gjuha angleze
në shkollë do të nisë që në klasën e parë.
Si do të mësojë ai nxënës gjuhën e
huaj pa ditur ende rregullat e drejtëshkrimit të gjuhës së bukur shqipe, gjuhës
së të parëve që sakrifikuan gjithçka për alfabetin tonë?
Pranimi në universitet i maturantëve
me rezultate të ulta do të nxjerrë kuadro me nivel të ulët.
Po jap një shembull, çfarë janë ata
gazetarë apo punonjës të televizioneve private apo shtetëror që nuk dinë të
shkruajnë pa gabime?
A ka testime apo kontrolle të këtyre
që shkruajnë me titra lajmërimet plot gabime drejtëshkrimore?
Çfarë thotë dëgjuesi apo shikuesi që
sheh apo dëgjon ato gabime trashanike kur sheh si është deformuar shkrimi i
gjuhës nga këta pseudogazetarë?
Përshembull emrat e përveçëm shohim
që shkruhen me shkronjë të vogël, ndarja e fjalëve
në fund të rreshtit ka rregulla, ajo që shpesh shohim është se shkronjat e
përbëra i ndajnë një në fund të rreshtit, një në fillim të rreshtit të vargut
tjetër etj.
E di që edhe ju jeni në pozita të
vështira sepse nxënësit e shkëlqyer ose me rezultate të mira rendin pas degëve
të parapëlqyera, por vendi ka nevojë për njerëz të kualifikuar, te jenë të
përgatitur kudo ku të punojnë. Çdo punë ka sekretet
e saj, sepse edhe ai punëtori që punon në arë, fabrikë e kudo tjetër duhet të
ketë dije për profesionin ose zanatin që ushtron.
Bëni një sondazh, jo në qytetet të mëdha vetëm, por edhe në zona të
thella ku shpesh herë mungon edhe energjia elektrike. Ju dy vjet
rresht zhvilluat mësim onlain si i
thonë.
Mirë atje ka ku ka energji dhe internet i marrin ato mësime të cunguara, po atje ku
nuk kanë as aparate për të dëgjuar mësuesin që
shpjegon, si i bëhet hallit?
A mos po rrisim përsëri një brez
analfabetësh kur na u desh një kohë e gjatë për të luftuar
analfabetizmin? Ka shumë probleme arsimi!
Kam një shkollë afër shtëpisë dhe e
shoh si bëhet mësimi. Mësuesit e
fiskulturës, nuk zhvillojnë mësim fare, nxënësit vetëm lozin me top dhe nuk
dinë as kujt i thonë as majtas as djathtas dhe asnjë rregull elementar të
fizkulturës.
Në një shkollë në një fshat nuk
kishte as dritare, po në vend të xhamave kishte plasmas, bankat ishin aq të
vjetra sa kishte dalë tallashi znj. ministre.
Para 40 e ca vjetësh një nxënës imi
kishte dalë mësues dhe ishte emëruar në një fshat të
thellë.
E dini çfarë më tha, "Rrini se
jemi mirë këtu, se sa më thellë të hysh, aq më të
prapambetur janë". Kështu më tha atëherë, por mos vallë edhe tani e tillë
është gjendja e zonave të thella?
Mendoj se është mirë të bëhet një
kontroll për këto dhe për shumë të tjera që ka vendi ynë.
Krijoni dhe keni krijuar drejtori
arsimore, por a po e bëjnë ato si duhet detyrën apo mirë që
është kompjuteri dhe telefoni dhe “i zgjidhim nga zyra”.
Ka shumë më shumë probleme, por
unë kaq kisha mundësi të shkruaja.
Rregulloni shkollën, që të kemi në
rregull shoqërinë!
Me respekt,
“Pensionistja”