| E premte, 27.08.2021, 08:09 PM |
Benjamini kishte të drejtë
Nga
Blerim Latifi
Njerëzit
që shajnë, ofendojnë, kërcënojnë e bëjnë thirrje linçuese kanë ekzistuar
gjithmonë. Qysh se njerëzimi ka filluar t’i shkruaj analet e tij. Në kohë të
ndryshme mendimtarët janë munduar të bëjnë definimin e tyre. Dikush i ka
quajtur “barbarë”, dikush “primitivë”, dikush “të pakulturuar e të paedukuar”.
Dikush ka shkuar edhe më larg dhe i ka quajtur “llum social”.
Të
tjerë janë munduar edhe t’i japin zgjidhje problemit të gjuhës dhe mllefit të
këtij “llumi social”.
Platoni
mendonte se zgjidhja ishte që këtij llumi t’i mbylleshin të gjitha rrugët e
depërtimit në nivelet e vendimmarrjes politike.
Iluministët
modernë mendonin se me arsimimin racional të të gjithë shoqërisë, edhe problemi
i “llumit social” do të zgjidhej vetvetiu.
Të
dy zgjidhjet kanë dështuar.
Zgjidhja
platonike ka dështuar sepse gjithmonë gjenden demagogë të cilët e mobilizojnë
“llumin social” për qëllimet e tyre të marrjes së pushtetit.
Edhe
zgjidhja iluministe ka dështuar, sepse edukimi racional i qytetarëve kurrë nuk
mund të jetë i plotë, shto kësaj faktin se edhe të edukuarit shpesh bëjnë
aleanca me “llumin social” për qëllime të ndryshme, kryesisht politike.
Iluministët
gabonin kur e barazonin edukimin racional me edukimin moral. Shpesh, për nga
shkalla e mizorisë, krimet e të diturve ua kanë kaluar krimeve të të paditurve.
Sot
problemi i “llumit social” është bërë edhe më i madh, sepse demagogët e të
gjitha ngjyrave nuk kanë nevojë të bredhin skutave të qyteteve e fshatrave për
ta gjetur atë. Mjafton ta kenë një telefon ose kompjuter afër vetës për t’ia
ndezur atij zemrat e mllefosura e të etura për hakmarrje.
Filozofi
gjermano-hebraik Walter Benjamin thoshte se të gjitha dokumentet e qytetërimit
janë njëkohësisht edhe dokumente të barbarisë. Interneti është dëshmia ma e re
që na tregon se Benjamin kishte të drejtë, sepse, interneti, kjo shpikje
gjeniale e civilizimit, sot po shërben si platforma kryesore e përhapjes së
gjuhës së barbarisë.
__________
Ata
që deri me 14 shkurt e çonin në qiell Albin Kurtin “e gjithdijshëm” dhe tani
kanë filluar të hedhin vrer mbi të, ta dini se nuk janë të atillë që u dhemb
zemra për këtë vend, duke parë gabimet e qeverisjes së tij. Jo, ata janë soji i
njerëzve që kanë pritur të shpërblehen me poste nga Kurti për elozhet që i kanë
thurur atij ndër vite, dhe kur e kanë parë se Kurti i ka harruar në ditën e
shpërndarjes së posteve, i janë kthyer me kritika e akuza, të cilat nuk i
pushojnë as ditën as natën.
E
kam parë me sytë e mi sojin e këtyre njerëzve gjatë viteve 2007 e 2008.
Llojlloj servilësh i shkonin pas Hashim Thaçit, shkruanin e shpërndanin elozhe
gjithandej për të, pastaj kur Thaçi nuk ua mbushi gushën me poste e privilegje,
ndërruan menjëherë fytyrën dhe filluan ta shanin poshtë e lart, ditën dhe
natën.
Në
këtë vend, kryesisht, njerëzit e kritikojnë pushtetin jo për atë se çfarë bën
ai, por për faktin se nuk janë edhe ata pjesë e tij.
Parimet
morale dhe interesi i përgjithshëm i shtetit janë gjërat e fundit për ta cilat
njerëzit e lodhin mendjen e në këtë vend.
Prandaj
edhe i kemi punët kështu siç i kemi, për faqe të zezë.
__________
Deklarata
e Edi Ramës se në familjen e tij të ngushtë ekzistojnë tri fe të ndryshme, më
kujtoi një dëshmi që e sjell Noel Malcolm në librin e tij të fundit
"Rebelët, besimtarët, të mbijetuarit": "Në vitin 1637 një
misionar françeskan shkoi në Kosovë. Në një shtëpi, në një fshat jashtë
Gjakovës, ai dhe shoqëruesi i tij u pritën me fjalët: "Ejanj etër në
shtëpinë tonë, ne kemi katolicizëm, islam dhe ortodoksi". I tronditur, Fra
Cherubino-ja, u raportoi eprorëve të tij: "Dukej se ata lavdëroheshin me
këtë larmi fesh, sikur të ishin më të mençur se njerëzit e tjerë të kësaj
bote". Në fakt përgjegjja që duhej dhënë Cherubinos është: Po, janë më të
mençurit, sepse është mençuri e madhe kur dallimet fetare nuk i konsideron si
arsye për t'u futur në sherre dhe konflikte.Noli e thotë shumë qartë: problemi
i shqiptarëve me fenë nuk qëndron në faktin se ata kanë disa fe.Problemi
shqiptar me fenë shfaqet atëherë kur klerikët shqiptarë lejojnë të bëhen vegla
qorre të klerikëve të huaj. Ajo që po ndodhë sot ndër ne e vërteton plotësisht
diagnozën e Nolit.
__________
CNN
e paska cituar një zëdhënës të talebanëve, i cili u paska bërë thirrje grave
afgane të qëndrojnë të fshehura në shtëpi, ngase ushtarët e tyre "nuk janë
të trajnuar për t'i respektuar gratë". Kjo deklaratë na e qartëson edhe
njëherë faktin se fjala është për një grup njerëzish të armatosur që standartet
e barbarizmit i kanë të njëjta me ato të hordhive të Attilës e Alarikut, të
cilat në kohën e rënies së Perandorisë Romake i sulmonin qytetet e saj dhe
vrisnin e dhunonin secilën qenie njerëzore që u dilte përpara. Dhe për
koincidencë, njësoj si talebanët që e përdorin emrin e Zotit për t'i arsyetuar
barbaritë e tyre, edhe Attila e quante veten "Kamzhiku i Zotit".