Florim Zeqa: Ngulfatja e shpirtit për së gjalli!

Ngulfatja e shpirtit për së gjalli!

Shkruan: Florim Zeqa

“Nuk botohet kjo!”, ishte përgjigja e shkurtër e një portali pas shkrimit sa monumental, po aq profetik të datës 19.02.2020, me titull; “LVV+LV apo lista me 3V nuk janë formula ç’kapjses së shtetit!” Siq duket nga ky moment u mbyllën dyert për shkrimet e mia në këtë portal pas një bashkëpunimi 10 vjeçar!

Mediat janë ato që e thejnë heshtjen e qytetarëve

Mediat (të shkruara dhe elektronike) janë regjistri i veprimeve tona, janë kujdestar i ndërgjegjës sonë, mbajtës i ngjarjeve tona, të cilave ju drejtohemi për të gjetur forcën dhe kurajon, më shpresën, që më ndihmën e tyre, njeriu të bëhet ai që ka lindë: të jetë i lirë dhe i pavarur.

Një fjalë e urtë Gjermane thotë: "gazetarët shenojnë lindjen dhe përfundimin e një kohe", që do të thotë se roli i mediave në një shoqëri demokratike është krucial dhe i pa zevendësueshëm.

Në kohën kur gënjeshtra dhe mashtrimi i politikanëve janë bërë standard i jetës, i veprimeve të qeveritarëve, kur njerëzve u ka humbur dashuria në mes tyre, kur janë të hapura shumë kriza morale, kulturore e sociale, janë MEDIAT ato që duhet të thonë të vërtetën për gjithçka, për të zbardhur të vërtetën e kamufluar e të gjitha prapësive të ndodhura në Kosovë, nga paslufta e këndej.

Gazetaria nuk e nënkupton vetëm kërkimin e lajmit, përkundrazi nënkupton kërkimin e së vërtetës mbi të gjitha ato zhvillime politike dhe ngjarje që janë me interes për shoqërinë, për qytetarët, për njerëzit e thjeshtë.

Në rrethanat e pluralizmit politik, gazetaria nuk guxon të jetë partiake dhe as në shërbim të grupeve të interesit, ashtu sikurse që gazetari nuk duhet të vrapoj pas lajmeve senzacionale, pas ngjarjeve të çastit të cilat e zhvëndosin vëmëndjen e opinionit publik ndaj ngjarjeve shumfish më të rëndësishme apo të bëhet "Zogu" i dikujtë më i rëndësishëm se skandalet e qeveritarëve të vendit tonë.

Gazetarët duhet të bëhen forcë kreativiteti dhe zë i fuqishëm i i ndryshimeve të përgjithshme shoqërore dhe zë plural i respektuar nga opinioni i gjërë, në kërkim të lajmit, edhe atëherë kur ai nuk shihet dhe dëgjohet apo tentohet të fshihet nga të tjerët, për ti bërë gjithmonë të qartë lexuesit; kjo është e vërteta dhe ky është interpretimi im!

Fjala demokraci rrjedhë nga fjala Greke "ISONOMIA", që nënkupton barazinë e njerëzve para ligjit, me lirinë e shprehjes dhe pjesëmarrjen e drejtëpërdrejt të popullit në vendim-marrje.

Në një shoqëri të lirë dhe demokratike fjala "SEKRET" është e neveritshme, konspiracioni monolitik (partiak) i pa pranueshëm, i cili ju besohet mjetëve të pa ndershme të informimit, për të përhapur sferën e tyre të influencës.

Por në demokraci, kur pushteti rrëmbehet një herë nga totalitarët nuk lëshohet aq lehtë. Për t’a mbajtur pushtetin i përdorin të gjitha mjetet antidemokratike e anti-ligjore për ruajtjën e pushtetit duke perfshirë ketu: armiqësinë në vend të zgjedhjeve të lira, kërcënimin në vend të drejtësisë, gorillat e natës (njerëzit më maska) në vend të ushtrisë së ditës!

Si rezultat i kësaj intelektualët mbesin në heshtje, asnjë krim nuk zbulohet, qytetarët tërhiqen nga debatet publike.

Hyrja e mediave nën grilat e pushtetarëve, ngulfatje e shpirtit për së gjalli

Mediumet që kanë pranuar si zgjidhje financiare hyrjen nën tutelën e pushtetarëve apo subjekteve politike me ndikim, automatikisht e kanë të humbur pavarësinë e tyre editoriale, ngase politikat redaktoriale të gazetës (portalit) i përcakton subjekti që i financon.

Në këto rrethana, më së vështiri është për gazetarët profesionist që ju duhet të bien ndesh me etiken e tyre, për të kamufluar të vërtetën sipas porosive të pushtetarëve, bosëve partiak dhe pronarëve të shitur dhe servil.

A ka më vështirë për një gazetar profesionsit që të ndryshoj brenda natës,...të nesërmën t'i thotë djallit ëngjëll, apo siq e thotë populli; "dreqit dajë"!

Lum ai gazetar që arrinë ta ruaj pavarësinë shpirtërore dhe paanësinë partiake. Futja e shpirtit të një gazetari apo krijuesi nën grilat e pushtetarëve, apo hyrja nën kthetrat partiake është pak më tepër se vetëvrasje, është ngulfatje e shpirtit për së gjalli.

Pushtetarët e rinjë e kanë rastin historik që me veprime të përgjegjshme, të krijojnë stabilitet politik dhe ekonomik, të krijojnë infrastrukturë ligjore që mbronë pronat dhe pasuritë e ligjshme të qytetarëve, por që lufton pamëshirshëm të gjithë keqpërdoruesit dhe abuzuesit e parasë publike.

Qytetari i Kosovës nuk guxon të bie viktim e heshtjes, por duhet të shndërrohet në një qenje aktive politike, t'i shprehë lirshëm opinionet e veta, e jo të mbetet shikues apo monitorues i gënjeshtrave dhe mashtrimit të politikanëve të papërgjegjshëm, i krimit të organizuar dhe korrupsionit të nivelit të lartë shtetërorë.

Kur mbyllet një derë e vogël, hapet një tjetër më e madhe

Edhe përkundër mosbotimit të shkrimit të sipërpermendur në fillim, pa asnjë hatërmbetje, të njëjtit portal në vijimësi i dërgova edhe rreth 80 shkrime tjera autoriale, por asnjëra prej tyre nuk e pau dritën e botimit! Nuk është thënë kot; “kur mbyllet një derë e vogël, hapet një tjetër më e madhe”. Kështu edhe ndodhi në realitet, pas mbylljes së derës nga një portal, jo një, por u hapën disa dyer të mëdha!