| E marte, 30.03.2021, 08:09 PM |
Botuesi amerikan “Jalifat Pulishing” nga Houstoni, këto ditë nxjerr nga shtypi librin historiografik “MACEDONIA – FROM ANTIQUITY TO OUR TIME”,të përkthyer nga Avni Spahiu. Pritet që libri që ka 677 faqe, i botuar në shqip në vitin 2019 “MAQEDONIA NGA ANTIKA DERI TE KOHA JONË”, fillimisht të promovohet në disa qytete të SHBA-ve (Çikago, Detroit, Nju Jork, Dallas e Boston) dhe pastaj të promovohet edhe në Shkup, Tetovë dhe qytetet tjera shqiptare në Maqedoni. Botuesi planifikon që krahas Kosovës dhe Shqipërisë, të promovohet edhe në Turqi dhe disa qendra të tjera evropiane.
Siç
është vepruar edhe me “Kosovën” në tri
vëllime të përkthyer në anglisht në vitin 2014, botuesi “Jalifat Publishing” ,
librin “Macedonia – from atiquity to our time” do ta dërgojë në Bibliotekën e
Kongresit Amerikan, në të gjitha institutet hulumtuese shkencore amerikane si dhe
bibliotekat e universiteteve amerikane.
Botuesi
amerikan vlerëson se përkthimi i këtij libri në anglisht si dhe plasimi i tij
në qarqet shkencore dhe universitare amerikane por edhe botërore në
përgjithësi, është me interes të veçantë, ngaqë përhap të vërtetën rreth
Maqedonisë si pjesë e botës ilire nga antikiteti, të përvetësuar nga grekët,
siç përhapë edhe të vërtetën se në shtetin e sotëm të quajtur Maqedoni e
Veriut, të shtrirë në pjesën më të madhe të Dardanisë antike dhe më vonë në
vilajetin e Kosovës, ndërlidhet identiteti historik, etnik, shpirtëror,
kulturor dhe politik i shqiptarëve nga lashtësia i mohuar nga historiografia
hegjemoniste serbe, ruse, bullgare dhe ajo e sajuara “maqedone” me ç’rast ata
paraqiten “ardhacakë”, “pushtues”, “zullumqarë” të ardhur në këto hapësira nga
shekulli XVII e këndej me ndihmën e osmanëve!
Mbi
këto platforma, nga Kriza Lindore e këtej, janë ndërtuar edhe hartat e reja të
shteteve në pjesën evropiane të Perandorisë Osmane, ku hapësira etnike dhe ajo
shpirtërore-kulturore e shqiptarëve është copëtuar nga shtetet fqinje (Serbia,
Mali i Zi, Bullgaria dhe Greqia). Ato u kanë sherbyer edhe programeve
antishqiptare nga shpërnguljet e deri te etnocidet dhe gjenocidet, siç ka ndodhë në vitin 1878, 1912, 1944 për
të vazhduar edhe me konventat me Turqinë për shpërnguljen e tyre në vitin 1938
dhe 1953.
Prandaj,
i konceptuar mbi këta faktorë dhe i mbështetur mbi fakte të qëndrueshme
historike, libri përhapë të vërtetën për vendin dhe rolin e shqiptarëve në këtë
shtet të krijuar politikisht në vitin 1944 nga Titoja (fillimisht si pjesë e
federatës jugosllave në përputhje me vendimet e AVNOJ-it të vitit 1943) dhe në
vitin 1992 si shtet i pavarur, me ç’rast ata do të diskriminohen qoftë si
pakicë kombëtare gjatë Jugosllavisë së Titos, qoftë me statusin e qytetarisë “me të drejta
njerëzore” në rrethanat e shpalljes së Maqedonisë shtet-komb.
Duke
marrë shqyrtim edhe zhvillimet më të reja nga shpallja e shtetit të Maqedonisë,
krahas kritikës që u bëhet politikave antishqiptare nga Shkupi dhe Beogradi, të
cilat, në forma të ndryshme, vazhdojnë edhe në rrethanat e reja, duke
shfrytëzuar në njërën anë faktorët gjeopolitikë rajonalë dhe në tjetrën anë
dobësitë e mëdha të të shtetit shqiptar dhe atij të Kosovës në raport me
injorimin e çështjes shqiptare në Maqedoni, autori, me sy kritik, vlerëson edhe
rolin e faktorit politik shqiptar në skenën politike maqedonase nga viti 1992 e
këndej. Kritikat e autorit adresohen te mosgatishmëria për të mbrojtur
pozicionin e referendumit të vitit 1992 për statusin e popullit shtetformues
mbi konceptin e një shteti
federal-konfederal të dy popujve
të barabartë (shqiptarë dhe maqedonas). Autori,
po ashtu, me sy tepër kritik
shikon edhe mungesën e konsistencës së
faktorit ushtarak shqiptar në kuadër të
luftës UÇK-së të vitit 2001 në kërkesat
politike, të filluara me ato për shtet federativ (shqiptar-maqedon), të
cilat, brenda një kohe të shkurtër do ta ndryshojnë te ato për “shtetin qytetar” , pra te korpusi i të
drejtave demokratike, për ç'gjë as që është deshtë të luftohet fare, meqe ato i
garanton Karta e OKB-së në kuadër të të drejtave dhe liritë themelore kudo në
botë. Ky degradim politik i luftës do të
pasqyrohet më së miri me Marrëveshjen e Ohrit, me ç'rast, klasa politike që do
të vijë në pushtet "me meritat e
luftës", nuk do të bëjë tjetër, pos, që duke e zëvendësuar idealin e
lirisë, për ç'gjë u derdh edhe gjak, në atë të interesave personale dhe
përfitime deri te ato meskine, do të shndërrohet në një vasale të politikës
maqedonase, në një rajë bashkëkohore të farses parlamentare, e cila, faktorin
shqiptar do ta shfrytëzojë për qëllimet e njohura shtetmëdha, ku me anën e
ngatërrimit të barazisë kushtetuese të gjuhës shqipe si parakusht i barazisë
shtetërore me atë të barazisë ligjore të gjuhës, bëhet vetëmashtrimi dhe
margjinalizimi i shqiptarëve në pakicë numrash!