Nikoleta Kovaçi: Fatos Nanon nuk e rehabiliton dot as Zoti!

Fatos Nanon nuk e rehabiliton dot as Zoti!

Nga Nikoleta Kovaçi

Kam kohë që nuk i ndjek debatet televizive në TV-të tona. I refuzoj për mungesa të shumta sidomos në artikulimin e gjendjeve reale në të cilat gjendemi dhe lëngojmë. Po ashtu se rrallë thuhen të vërteta. Aq më pak hasen qasje të drejta! Lëndohen të pamundurit, ata që s’kanë asnjë za përfaqësues, e nga ekranet tona vijnë modele dhunuesish të shumtë, por kryesisht ata politikë.

Mramë pashë që Fatos Nano paska qenë tek “Opinioni”! Mirë ka ba! Ai ka pasë nevojë me u rrëfye, e Fevziu me tërheq shikues! Fundja te dy janë në të drejtën e tyne! I pari si domosdoshmëri jo vetëm për vete për tu ngjitur pas këpucës së të gjithëpushtetshmit, por edhe si mbajtje gjallë të traditës së 1-it! Tashmë e pranon të jetë edhe patericë, ani pse patericë e një dordoleci të shpikun dhe lanë prej tij. I dyti të mbajë ngërthyer shqiptarët tek ekrani i tij me një figurë që ma shumë se qesharake asht i pavërtetë! Ngaqë nuk e kam ndjek, nuk di nëse Nano ka rrëfyer (a e pyeti Fevziu?) mbi një mori aktesh vandale, kriminale dhe mafioze të qeverisjes së tij dhe të miqve të tij!

Meqë nuk harroj, sepse nuk më lë vetja dhe principet, do t’doja që Nano mramë të kishte shpjegu pozicionin e tij në rebelimin e 1997-s! Miqtë e tij u gjenden krah bandave të armatosura, duke gjeneruar vrasje masive në Lushnje, Durrës, Vlorë, Fier e Berat! Miqtë e tij, më vonë bashkëqeverisës me të, u panë në krye të turmave teksa vrisnin e masakronin punonjës policie! Miqtë e tij, ma vonë ministrat e tij, lanë vilat në dispozicion të vrasësve për të qëlluar mbi njerëzit e shtetit.

Do t’doja shumë që Nano t`ketë folë për trafiqet që lulzuan në kohën e tij; për korrupsionin e kthyem në sistmem, për një polici të gjithën të inkriminueme, për një mori vrasjesh deri edhe politike për të cilat nuk u hetue kurrë; për një mori aktesh kriminale për të cilat gojët e liga akuzonin drejtpërdrejtë mekanizmat që lidheshin me qeverinë e tij të 2001-2004; për vrasje barbare grash, burrat e të cilave ishin me lidhje të forta pushteti; për tragjedinë e 9 janarit; një prej turpeve më t’mëdha që mund t`i ndodhin një shteti dhe trajtimi më kriminal dhe monstruoz që një kryeministër ordiner bënte për shtetasit e vet!

Do t’doja shumë të ishte pyetur për fuqizimin e klanit të cigareve në Durrës, të drogës në Vlorë, Fier e Durrës, për përplasjet e dhunshme të policisë me qytetarë në Shkodër, për sundimin me anë të bandave në një sërë rrethesh, duke i kthye këto të fundit në një hambar malli e gjaku për të dhe njerëzit e tij! Po ashtu do t`doja të pyetej dhe të fliste për ekzekutimin e Fatmir Ramës (Mirit të Xhikes) te Kartodromi; për ekzekutimin e biznesmenit të hekurit, Florian Vila; për ekzekutimin e Vajdin Lames, për trafikun e drogës me Greqinë që bëhej me autobusët e tij. Për aksidentin në Shkallnur, ku për t`i mbyll gojën familjes së viktimës përdorte miqtë e “Cigareve” nga Durrësi, etjjj!

Do t`doja të pyetej për gjithë maskaradën e atyne viteve! Ka pafund ngjarje të asaj kohe që lidheshin me pushtetin mafioz të Fatos Nanos. Kumarxhiu që i pëlqente të sillej si gangster dhe sheik nuk kurseu asnjë njeri që nuk dorëzonte tek ai dhe të vetët haraçin që i kërkohej. Historia e qeverisjes së Nanos asht as ma pak dhe as ma shumë se sa modeli ordiner të cilin po ndjek Edi Rama me shpurën e tij! Sido që të tentojnë ta sjellin, dikujt edhe mund t`i pëlqejë ta bëje hero, por ai është një prej njollave të më kqija të sundimit me banda dhe vrasës tëpamëshirshëm në këtë vend!

Nuk duhet të harrojmë! Jemi shumë pak për t`ju dhanë kaq pamëshirshëm harrimit!