| E diele, 31.01.2021, 01:20 PM |
Njëqind vjet më parë (1921): Si është edukuar rinia e kohës nga një pjesë e mediave serbe!
Nga
Jahja Drançolli
Gazeta
për të rinjtë serbë, “Srpsko Kosovo” (“Kosova serbe”), është botuar dy herë në
muaj që nga 1 marsi 1920 deri më 15 dhjetor 1934. Nga janari i vitit 1921, revista ndryshoi nëntitullin e saj në
një gazetë për të rinjtë serbë dhe arsimin publik. Redaksia e gazetës ishte e
vendosur në Mitrovicë, Shkup dhe Beograd. Për studentët dhe ushtarët, çmimi i
një numri ishte 6 dinarë. Abonimi vjetor për lexuesit në vend ishte 72 dinarë,
dhe 100 dinarë jashtë vendit. Revista “Srpsko Kosovo” u botua në 16 faqe.
Revista është redaktuar nga profesorët e
shquar serbë të kohës, si dhe nga
Peshkopi N. Velimiroviç.
Përveç
të dhënave themelore për vitin e botimit dhe numrit të revistës, është botuar
një këngë patriotike në kopertinë, e rrethuar me fotografi të manastirit
të Graçanicës, Tyrbës së Muratit dhe
qytetit mesjetar të Zveçanit. Tekstet e botuara përfshijnë një përzgjedhje
selektive vetëm nga historia, letërsia, folklori, lajmet (etj.) që i referohen
popullatës serbe në Kosovë dhe Maqedoni Veriore. Së këtejmi, këshilli editorial
i revistës “Srpsko Kosovo” për objektiv të vetin kishte ruajtjen dhe promovimin
e identitetit kulturor dhe kombëtar, zakonet popullore dhe vlerat tradicionale
vetëm të popullit serb. Në këtë kuadër, në revistën e përmendur janë botuar
përralla, legjenda dhe këngë të shumta popullore, që sipas këshillit editorial
janë element i rëndësishëm në ruajtjen e identitetit kulturor të popullit serb
në territoret e sotme të Kosovës dhe të Maqedonisë Veriore!