Kastriot Dervishi: Bijtë që krenohen me krimet e baballarëve

Bijtë që krenohen me krimet e baballarëve

Nga Kastriot Dervishi

Bijtë apo nipërit nuk kanë asnjë faj për paraardhësit e tyre. Prej tyre nuk mund të kërkohet mohimi i paraardhësve, sepse kjo nuk do kishte kuptim, por distancimi nga vepra e tyre. Por ata janë më shumë fajtorë se paraardhësit e tyre kur krenohen me krimet e tyre. Kjo përbën edhe dukurinë për shumicën e rasteve.

Diku andej nga viti 2014, partia kish çuar një komisare policie në komisariatin e Librazhdit, bijë e një ish hetuesi. Ishte indoktrinuar aq shumë, a thua se jetonte në vitet ‘50. Në komunikimin e parë me vartësit ajo tha se ishte krenare se në këtë rreth, babai i saj kish zbuluar “grupin armiqësor të kulakëve të Bërzheshtës”, i cili për kohën kish qenë më i rëndësishmi pas “grupit puçist” të Beqir Ballukut. Kur kjo injorante e quan Vilson Blloshmin “kryetar grupi” e “sabotator” dhe rrjedhimisht ligjëron krimin ndaj tij, çfarë të drejte mund të mbrojë sot? Prandaj po i dendin me tesera “veteranësh” bijtë, për ta mbajtur të gjallë urrejtjen ndaj “armikut”, domethënë pjesës më të mirë që ka prodhuar ky vend.