Edison Ypi: Ne budallejt

Ne budallejt

Nga Edison Ypi

Ne budallejt themi atë që mendojmë dhe besojmë, atë që ju të squtët na thoni. Ju skilet nuk thoni atë që mendoni, dhe nuk e besoni atë që ne budallejt j’u themi.

Ne budallejt në takim me ju të përpiktit vijmë në orën e caktuar. Ju qerratenjt në takim me ne budallejt vini gjithmonë me vonesë.

Ne budallejt u besojmë Rilindasve që thanë "Lind andej nga perëndon". Ju inteligjentët që nuk dihet kujt i besoni, thoni se lind andej nga lind.

Për ne budallejt ekonominë e mbajnë në këmbë biznesmenët. Ju pehlivanat thoni se këtë shërbim kaq të çmuar e bëjnë proletarët. Thoni si të doni, veç mos u habisni kur kallaballëku të zbresi në shesh të xhvasi gjithçka pa bërë asgjë.

Ne budallejt e kemi të qartë se banakierët televizivë të së enjtes mbrëma janë pararoja e dallavereve dhe hajdutllëkut. Ju kopilat këtë bëni sikur nuk e kuptoni. Sytë j’u dalçin. Juve dhe atyre.

Ne budallejt përdorim nja një mijë fjalë kur flasim dhe nja pesë mijë kur shkruajmë. Ju eruditët as flisni as shkruani. Derisa të mësoni ca fjalë ju kokpalarët, do vazhdojmë të dërdëllisim ne budallejt.

Ne budallejt që nuk kemi asgjë dhe nuk fitojmë asgjë, e marrim faturën tatimore për çikërrimat që blejmë. Ju banditët që keni gjithçka, faturë tatimore as merrni as e jepni edhe kur blini e shisni grataçiela.

Ne budallejt nuk vjedhim. Ju gjenialët vidhni. Po të vidhnim ne, budallej do ishit ju.

Ne budallejt lexojmë poezi. Madje ka ndër ne budallejtë ca hajvanë që poezitë i dinë përmendësh. Poezitë më të bukura për ne budallejt janë ato që flasin për dallimin kolosal mes ju gjenialëve dhe ne budallejve.

Ne budallejt femrave u bëjmë komplimenta. Ju të squtët femrave u mbani leksione. Prandaj ne budallejve femrat na falin pyllit poshtë barkut, ndërsa juve noc rrokun.

Ne budallejt nuk ikim nga Shqipëria. Ju ikni. Veç një gjë duhet të dini; Duke ikur ju, ne budallejt që tashpërtash jemi pakicë, dalngadalë bëhemi shumicë. Kur të ndodhi kjo, ne budallejt që nuk ikim do bëhemi të squtë, budallej do bëheni ju të squtët që do mbeteni këtu.

Ne budallejt e dimë që era, shiu, breshëri, toka, qielli, deti, malet, kodrat, lumenjtë, përrenjtë, u përkasin juve të squtëve, por Bota është e jona, e budallejve.