Poezi nga Liliana Muça

LILIANA MUÇA

MERRE KËNGËN TIME

Merre ti erë këngën time

Shpërndaje brigjeve të Erzenit,

Merre dhimbjen time

Si varg të refrenit …

Merre ti erë këngën time

E shkrova me plagën e shpirtit;

Plagë e grushtit nga dimri klasor,

Më i egri dimër njerëzor.

Dimër që më ngiu buzëqeshjen

Dhe më shteroi lëngun e jetës;

Mos ardhtë më kurrë ai dimër mizor

Se do të thante gjithë planetin tokësor …

PADREJTËSI

Tradhëtia rend me galopin e marrëzisë

Të gjithë m’u bënë Brutë

Dhe më ngulin pas shpine

Thikën e hipokrizisë.

Merimanga e zezë po bëhet gati

Të më kafshojë.

Mbaj vesh !

Mbështete kokën në faqe të dheut

A po dëgjon ?!

Beteja është e përgjakshme ,

E kahershme

Për pak çekuilibrohem…

Shpatën e Demokleut po kërkoj,

Sadopak të mbrohem.

Globi tundet,

Shpërthejnë tajfunet

Djeg llava,

Rënojnë tërmetet;

Qendrat sizmike regjistrojnë

“Drejtësia po meket”

LIRIA, PENG …

Si një lodër, bota sfiduese luan me mua

Si ngahera me bukuri e shëmti

Sa u lodha në pritje të një ëndrre

Por, ah, mora një mal me mërzi …

Lirinë peng ma ka marrë varfëria

Lindjen e diellit nuk e shijoj sit i

S’më mbetet tjetër vetëm se arratia

Po kreun s’ia di kësaj udhe,

Një Zot e di.

BANALITET

Kronika dha një séance plenare

Salla mbushet me deputetë

Ngrefosur e kollarisur

Në podium ngjiten

Positë-opozitë;

Çirren,

Flasin

Për të mbrojtur partitë;

Çirren,

Flasin

Për interest dhe kolltukët e butë

Nga të cilët përkunden në ëndrrat fantastike

Fjalime slogane,

Fjalime bombastike;

Eh, si u bënë kështu këta deputetë !

Çuditërisht,

Shumë syresh edhe poetë,

E të tjerë profetë! …

Mbi tryeza një projektligj rri pezull,

I ngrirë si akullnajë

Sa shumë Shqipëria

Për të ka nevojë

Dhe bota e perëndimit në pritje

E lodhur

Dëgjon klithma histerike të deputetëve

Të cilët shtyhen,

Pështyhen,

Shahen me nënë e babe.

Ç’e pështirë maskaradë !

Më vjen prej jush vetëm neveri

Don Kishotë dhe Don Zhuanë të shekullit të ri.

GARË E ÇMENDUR

Të ftuarit nëpër kolltukë

Ndjehen rehat;

Të mundurit sërish nisin fushatë

Për të qënë sërish më poshtë,

Apo sërish më lart.

Pushteti në një garë të çmendur

Kuq e blu,

Blu e kuq pret

Në finish “Medaljen e artë.”

Me një motivacion të çuditshëm

Astronomik

“Toka nuk rrotullohet më rreth diellit

Por rreth INTERESIT, or mik !”