| E enjte, 14.11.2019, 09:05 PM |
LUMTURI YMERI
-Cikël
poetik-
Me se ta mas kohën?!
Me ditë? S’më del
Me natë? Më tepron…
VETMIA
Në truallin e hershëm të vetmisë
rrëmoj qosh me qosh të gjej gjërat e
mia
biçikletën e fëmijërisë
me timonin më të madh se krahët
atletet e grisura
ku më ngatërrohen këmbët
fustanin me lule vjollce që s’e vesha kurrë
fërshëllimat e shpërndara andej- këndej
më përplasen në fytyrë
bashkë me ankimet e nënës
që harrohem pas lojës
e ngrysem pa ngrënë…
Dhe çuditërisht, rritem!
Në këtë truall vetmie
kapërdij qiell cep me cep
mbledh gjërat e mia anekënd
Të tëra vitet, udhët, stacionet
krejt largësitë pa destinacione
gjiithë mallin e përtej detesh…
dëgjoj lumenjtë brenda vetes
të zhurmshëm, të gjithkohshëm…
Çuditërisht, pakësohem!
Apo, vetmia qënka planet?!
REKUJEM
(gegnisht)
M’a ktheve shpinën jetë!
Anì!
Unë të shoh ballpërballë
Njashtu,
si copëzohesh grimcash në mu
dalëkadalë,
tu e thithë frymën teme
at’ ma t’fismen që ta qas vdekja
N’at’ tik tak t'kohës s’fundme
që ty do t’a nguli n’sy vetëm nji rrasë vorrit…
Druj se njiherit ke m’u kthy
dorën zgat me përkitë
pllakë e ftoht ka me t’djegë
ka me t’dridhë mungesa e prehnit, ledhatimit
e turpi t’veshet me parzm’ t’burrnisë
para dashnisë…
Nën ta,
nën harresë
fminija do t’qesë duert e bukra
me ta shkye at parzmore
e me t’lanë gafil para bote,
ma zi se tash
kur, gjith’ kjo hapsanë
s’mund me e n’xanë…
LERMËNI…
Më lini të shkoj
t’i vë zjarrin
atij shtrati mëkatar
që po e grin mola e pritjes…
Të hedh mbi të
drurët e shkulur bregut të lumit
të gjitha degët e thyera
dhe folenë e zogjve
me fije bari, myshku e hala pishe…
Le të digjen bashkë me ligjet
edhe gënjeshtrat e betimit…
Kërkoni betim?!
Besa, më lini të shkoj
e ju jap fjalën e nderit
se do t’ua kthej hirin
që ju duhet për varrin e të çmendurit…
Veç, lermëni…