Hysen Kobellari: Vrasësi qan mbi varrin tim të rremë

I ngrati,

Nuk më qan vërtet mua;

Qan hallet dhe dertet e veta.

Afshi i keqardhjes për veten time

Më gufmon nga thellësi e zemrës

Trupin ma dreth si lemzë,

Psherëtima intime …

Dhe

Qaj Ai,

Qaj Unë

Siç qan kur ndesh në gozhdë, sharra …

Thjesht për qejf qajmë,

Thjesht për t’u lehtësuar nga barra

E ditës që s’ka nisur

Dhe ndër mend e mbajmë.

Gulshi gati më zë frymën, më del prej hundësh

Si me më dalë shpirti soje …

S’nxjerr dot një fjalë të vetme prej goje.

Kokat tona në falje e lutje përkulen,

U ngjajnë dy rrathëve të zjarrtë

Me avuj dhe tym…

Një engjëll mes nesh qenka ulur

Na mbledh lotët në një gjym;

I artë ky gjym qafëgjatë.

Ç’të të them ç’kam hequr

Nga ky vajtim

Mbi të rremin varrin tim !

Ai që qan me mua, që është vrasës,

Po që për mua s’është hasëm

Mban në shpirt si gozhdë pandehmën:

“Po vrave, do të të vrasin !” …

Ani, s’prish punë

Dhe

Qaj Ai,

Qaj Unë.

Një melodi babaxhane

Që s’mbaron me Of !

Mos mendoni se këtu diçka nuk shkon

E çfarë nuk ka shkuar mbroth

Në këtë botë virane ?!...

Dita ime

Ja behu agimi i purpurt, thatim,

Trim e kapedan, si pleshtat;

U pengua mbi oxhakun tim

Dhe m’i shkriu eshtrat.

Në një guaskë vetmie rroj,

Ndanë kroit që më gërryen;

Nëse zemra ime përpëlitet

Si pendë fajkoi

S’ka vetmi që më thyen !

Në sytë e fëmijës si gurameçë

Të përgjakur;

Dita ime buzët me të kuq

Nis e lyen …

Të më dashurosh në këtë kohë …

Të më dashurosh në këtë kohë zgjebesh

Është njëlloj sikur të më lësh pas sy;

Të më vrasësh mua dhe veten,

Të na lësh pa shpirt në trup, të dy …

Ty të dashuron një tjetër,

Mua një tjetër më don;

Unë, që të gjithë i dua dhe patjetër,

Mos e diskuto,

Dua, ashtu si vetë Zoti do …

Prandaj, më fshij nga kujtesa,

Më moho !

Unë mbase vdes nga egoja e vjetër …

Po e di që fuqi s’ke, për të harruar,

Vrasëse e pafajësuar;

Vetëm Zoti mund të dashurojë më shumë

Se ç’dashuron një grua…

Ç’po ndodh me ty;

Ç’bëhet me mua ?!

Dashuria jote është si ajri,

Ku qarkullojnë shpirtrat e pafaj;

Qan zemra jote;

Zemra ime, qaj !

Pagjumësi

Maçoku u shtriq gjatë e gjerë

mbi divan;

mbi tryezë prehem e gjumi s’më vjen.

Shiu mbi qelqe gufon shatrivan

Dhe nata leh si qen …

Me kokë përmbi re, të mos flesh,

Të shohësh ëndrra llahtari.

Sa ndoht ! …

Të dalësh e tek dera të gjesh

Një tog me të përgëra gomari.