Gazmend Papa: Në jalli

në jalli

buzë ujit me gjurmë të shenjtit me orë

spërkatur në vesën e artë nën yllin polar

mblidhnim sanën kositur ditë më parë

t`i ushqenim kafshët në kohë me borë

s`lëvizte kaq me ag asgjë fare në barë

veç iknim gjurmët e të urtit në vetmi

zbritur nga qielli me lule xheneti në jalli

ndërsa veten e shikonim në ujëvarë

ka qëndruar këtu i urti e ka gjetur ilaç

ta shëronte me kaq durim majën e cicës

ja pse s`e harron dot hijen e dumnicës

nëna e lodhur mblidhte sanë në djersë

unë lozja me kërcej shevari dhe me llaç

e e shikoja nga sillet toka në univers

Gazmend Papa