Duraku: Detaje që e portretizojnë njeriun e përditshëm

Detaje që e portretizojnë njeriun e përditshëm

“Libri matanë lumit” nga Rrustem Berisha, botoi Shtëpia Botuese “FAD” Prishtinë, 2018

Nga Fatmire Duraku

Rrustem Berisha është ndër shkencëtarët, krijuesit letrar, publicistët dhe përgjithësisht  një ndër intelektualët më aktivë në sfera të ndryshme të jetës kulturore e shoqërore. Libri më i ri i tij “Libri matanë lumi”, është vëllim me tregime për fëmijë, është dëshmi e një rrugëtimi të gjatë në letërsi, e një kronologjie të përhershme angazhimi për më të vegjlit.

Autori pothuajse në të gjitha tregimet krye personazh njeriun e këtij ambienti, me të gjitha karakteristikat që i ka. Ai është  Loshi. Nëpërmjet  tij ai  flet për shumë gjëra, për lodra e dukuri, të cilat  e portretizojnë gjyshin, e ndezin kërshërinë të mësojnë sesi e vrau  Albina gishtin, si ndodhi të krijohet historia e libri matanë lumi, pastaj si ngjet të krijohet dashuria për vëllain, si ndodh të  kuptohet rrëfimi për njeriu me kapelë, të cilin nuk e njeh askush nga lagjja, përveç shoqes së tyre Zanës.  Kjo, e tëra, do ta zgjojnë kërshërinë e lexuesit. Në këtë rrjedhë shfaqet dhe Loshi, një djalë çapkën, i cili dëshiron të dijë se si i mbeti shprehi gjelit të këndoj në mëngjes herët. Ai ka dëshira të shumta, të luaj në zall, t`i blej motrës një fustan të bukur, të ngas biçikletën apo trotinetin dhe në fund na rrëfen se ku shpenzoi parat nga arka e kursimeve.

Me përvojën që ka, Rrustem Berisha, ia del  të hyj thellë në botën e të vegjëlve dhe bëhet një me ta, një me lojën e tyre, me të përditshmen e tyre, një me preokupimet e tyre, një me dëshirat e tyre.

Libri, kështu,  është një vepër e shkruar  me mjeshtri prej një krijuesi të njëmend për fëmijë dhe të rinj, në të cilën shpaloset rrugëtimi i përditshëm, por dhe ai për kulturën e të kaluarën kombëtare që shfaqet si kontekst i përhershëm.

Libri me tregime për fëmijë “Libri matanë lumit”, e dëshmon dhe një herë  Rrustem Berishën, mbledhës të folklorit, shkrimtar e gazetar të dalluar, emri i të cilit ka logon në krye të shuamë librave  letrarë e shkencorë.